LUKA 10 - Cho Bible Common Language 2016

Bawipa Jesuh Naw Chang Chih-kip-lei-goi Tüi Gui Ci

¹ Cun kawn ah Bawipa Jesuh naw ang khah püi chang sing chih-kip-lei-goi cu ghü ba gui netah, chang sing goi ciah ng’khap sak gui ne, amät ah a hteh law nak vai ah pigaw gui ung tüi gui ci.

² Bawipa Jesuh naw, “Htang m’guh ah vai akda om ci, cun ung phi aat ciah chang cu ken aih ci. Cun ah kyasei htang m’guh aat khai akda tüih vai ah htang m’guh nak ciah ma ah taigü vä.

³ Hteit vä! Hngei khli ah ng’lung ah htome chah mäih ah ka ning tüi gui ci nei.

⁴ Ngui ng’ip, ng’ya, phahnak a i phi kä nami hteh püi vai. Lam ah ng’düi ne a u phi kä nami yavaih vai.

⁵ A u ah im ung phi nami luh ah a kyak ung, “Shin ah kyong khui ung ding gei nak om sä” cine nami taigü vai.

⁶ Cun ah im ung dim deeih nak ng’ya hlük ci a om ung, nangmi ah taigü cu ani ah khan ah gawk khai. Cun ah mäih ah chang a u kä ah om ung nami k’taigü nak cu nami mät ung gawk law ba khai.

⁷ Nami om nak tu ah im ung ami ning m’bei m’awk tu gui nami ei awk tu vai, a i ah kyasei ci ung bi bik ci naw ng’cheng gah khai ah kyak ci. Nami om nak tu htük ah im ungka naw, a hei im ah kä nami ng’plon-en vai.

⁸ Nangmi ning dou gui ciah pigaw ung ami ning tu m’bei tu gui nami ei awk vai.

⁹ Cun ah pigaw ung gawpai ci gui nami gai sak gui vai. Cun kawn ah ngami ung, “Khanpughi ah Uknak kho gawk law pyi ci” cine nami m’thein gui vai.

¹⁰ Nangmi kä ning dou gui ciah pigaw ung lam ung ng’düi netah, “Nangmi ah ma ah ng’thu m’shi sho ah kami kho ungka m’vut kami khawng shüt ci.

¹¹ Cun ung phi Khanpughi ah Uknak kho cu nangmi ah pei ah gawk law pyi ci, nami hmat vai nei” cine nami m’thein gui vai.

¹² Kei naw akcang ka pyein cu, m’khoichaa nak ah hnüüp ung cun ah gawnu cu Sodom gawnu ah mä she tu ba khai nei.

Kä Zum Ciah Gawnu Gui

¹³ Aw Chorayin! Nang ah phäh ah kyikyawk aih vai kyak ci nei, Aw Bethsaida! Nang ah phäh ah phi kyikyawk aih vai kyak ci nei. Nangmi ung bilawh gui ah cäi aih vai gui cu, Tire la Sidon gawnu gui ung bilawh vai sü ung, cun ah gawnu gui cu a cau ä pui ge ung ng’yu nak sui sui ne m’vut khui ung ngo ne ng’yu ba pyi khai sü gui ah kyak ci.

¹⁴ M’khoichaa nak ah hnüüp ung nangmi ah mä Tire la Sidon ah khan ah Khanpughi ah m’gein nak cu ng’dang tu ba khai nei.

¹⁵ Aw Kapernaum gawnu! Nang cu khankho ah gawk khai ah m’hlüngtai vai na ng’ya hlük ci ang? nang cu m’htei kho ah ning yuk buh hlit vai nei” cik ci.

¹⁶ Bawipa Jesuh naw, Ang düihpüi gui-am, “Nangmi ah ng’thu ngai cicu kei ah ng’thu ngai ci, nangmi ning nawng gui ci cu, kei na nawng ci, kei na nawng ci cu, kei na tüi lawk cicu nawng ciah kyak ci” cine m’thein gui ci.

Ak Chang Tüih Chih-kip-lei-goi Gawk Law Ba Ci Gui

¹⁷ Ang khah püi chih-kip-lei-goi cu ang htei ah yeikyai ne law ba u netah, “Bawipa, nang ah ming awn khoshe gui phi kami näng ci nei” cine pyein law ba ci gui.

¹⁸ Bawipa Jesuh naw, “Khankho ah kho alai-läp ah mäih ah Satan cu kya law sei ka hmuk ci.

¹⁹ Ngai vä, nangmi-am m’khüt näng nak ka ning pe gui pyi ci nei. Am äm-ah k’phyu m’khaw gui la Satan khoshe ga nüng nüng nami m’khüt näng khai nei.

²⁰ A i gaa phi nami khan ah gawk lawk khai, cun ung phi khoshe nami m’khüt näng ah phäh ah kä yeikyai vä, khankho ah nami ming guk pyi ah phäh ah yeikyai vä” cik ci.

Bawipa Jesuh Zeikiai ci

²¹ Cun yah ung Bawipa Jesuh cu Mumcha Theing awn yeikyai nak gah netah, “Khankho la khomdek ah Pa Khanpughi, hmuhmat tatlah ci gui ah ma ah, nam yih cu kä hmuhmat ci gui ah ma ah ng’dang sei ka ning m’hlüngtai ci. Aw Kapacun cu na mät ah ng’yak hlü ah kyak ci.

²² Kapa Khanpughi naw a päng avan na pyi ci. A Htapa cu a u ciah hmat cicu Kapa ah kawn ah a u kä om ci. Kapa cu a u ciah hmat ci cun phi A Htapa la A Htapa naw m’dang khai ah a ghü ah chang ah kawn ah a u kä om ci.

²³ Cun kawn ah Bawipa cu ang düihpüi gui lam ah ng’hlat netah, “tuhbäi nami hmuh teng gui hmuh teng nak cu ang htei ah yeikyai vai kyak ci.

²⁴ Kei naw akcang ka pyein cu, profet gui la ghangpughang gui naw, nangmi ah hmuh gui shi hmu hlü te ci gui, cun ung phi kä hmu hlawt ci gui. Nangmi ah ng’yak gui shi ng’ya hlü te ci gui, kä ng’ya hlawt ci gui” cik ci.

Nik Ciah Samaritan Nawn M’tumtäng Nak

²⁵ Thukhän saya tumat cu Bawipa Jesuh ah pei ah law netah, “Sayapa, angtäi ghin nak ka gah vai ah a i ang ka bi kaw?” cine a phawtcam nak ah ng’shik ci.

²⁶ Bawipa Jesuh naw, “Cacim ung a i ah nei a om? Nang naw a i ah nei na hmat?” cine ng’shi tu ba ci.

²⁷ Acun ah chang naw, “Na Khanpughi na Bawipa cu, na m’lung kyong avan, na hmuhmat nak avan, na k’thagui avan la na ngaih-tüh nak avan nawn na m’hni vai; na ng’kho chang cu na mät awn m’täng ne nam hni vai” ciah om ci nei cik ci.

²⁸ Bawipa Jesuh naw, “nang cu na hman ci, acun ah na bi ung ang täi ghin nak na gah khai nei” cik ci.

²⁹ Thukhän saya naw amät ah hmuhmat nak m’dang hlü netah, “Kei ah ka ng’kho chang cu a u ang?” cine ng’shi ba ci.

³⁰ Bawipa Jesuh naw, “Hnüüp ät ung chang tumat cu Jerusalem ah kaa Jerikho ah a hteh nak lam ah, m’guk ei gui naw hmu u netah asuisak a khawh avan gut u ne, m’ghuih yät yät ne m’shäm shüt u sei, kä sih kä ghin ah a na ng’yän ci.

³¹ Taigüpa tumat cu cun ah lam ung hteit ne ani cu hmuk ci, Cun ung phi lek ne hteh tak ci.

³² A cun ah mäih ah levi chang tumat cun phi law ne, leim ciah chang cu hmu ne teng netah lek ne hteh tak ci.

³³ Cun ung phi Samaritan chang tumat cu cun ah lam ung a hteh nak lam ah leim ne ng’yän ciah chang cu hmu netah, ang htei ah m’gein ci.

³⁴ Ani cu a pei ah hteit ne ak hma leim gui cu tui la sapyit tui gui awn, m’si pe ne akni ah hlawp tu netah, ang se ung taih ne ng’et ciah im ah hteh püi ne m’hteit tuk ci.

³⁵ A ngawi ung hteit law ba vai netah, im mah-am ngui phe m’ku pe shüt ne, “shin ah a leim cu akni ah m’htei tu vä, ng’pyi ciah a phu avan ka law ba lam ah ka ning pe gui khai nei” cik ci.

³⁶ Cun ah thum gui ung kaa, m’guk ei ah k’phleim ah chang ah ng’khochang cu a u ah kyak khai ah na ngai ci ang?” cine ng’shik ci.

³⁷ Thukhän saya naw, “Ak leim cu m’gein ne m’htei tuk ciah chang ah kyak ci nei” cik ci. Bawipa Jesuh naw, “Nang hteit ba ne ani ah mäih ah na bi vai” cine pyen nak ci.

Bawipa Jesuh cu Mahta La Mari ah Im ah Hteit ci

³⁸ Bawipa Jesuh la ang düihpüi gui cu lam ami hteh nak ah pigaw tumat ung gawk lawk ci gui. Cun ah pigaw ung Mahta ming nak ciah hnumi tumat naw dou ne khin na gui ci.

³⁹ Mahta ung Mari ming nak ciah a nau tumat om ci. Ani cu Bawipa ah pei ah ngo ne ang thu ngai ci.

⁴⁰ Mahta cu khinchah nak gui vai bilo tawtlaw aih netah Bawipa ah ma ah, “Bawipa, ka nau Mari cu khin chah nak vai bilawh avan, kei bäng am na bilawh sak ci kyasei, law ne ana bilawh law püi vai ah pyein ä,” cik ci.

⁴¹ Bawipa Jesuh naw, “Mahta, Mahta, nang cu bilawh gui vai ah nang ä aih ci, nang ung hlü ci tumat om ci.

⁴² Mari naw aknipi ghü pyi ci, cun cu a u naw kä gut hlawt khai” cik ci.