LUKA 1 - Cho Bible Common Language 2016

Teihpüi Theophilus aw:

¹ Mikmi ah yum nak ung dang pyi ciah a mawng tung gui cu chang akda naw aknipi ah gu ne pyang pyi ci gui.

² Cun ah ami guk cu akhtük ung hmuhmat ci gui la pyeinsak ci gui ah m’thein m’kan ba gui ah kyak ci.

³ Cun ah kyasei shin ah mawng gui cu, kei naw va tün ne teng kheng netah, na hmat thei vai ah guk ung nik khai ah ngai ne ka guk nei.

⁴ Shin cu nang naw na hmuh ng’yak man phung akcang ah küm khai ah na shüm hmat vai ah ka guk ah kyak ci nei.

Tuihnim Johan Ang Tüi Vai ah Mawng Shäu Nak

⁵ Judea kho ung Herod ghangpughang naw a uk sang ung Taigü kyong chang Zechariah ming nak ciah taigü om ci. Ak chu cun phi taigü kyong ungka Eliyabeth ming nak ciah kyak ci.

⁶ Ngani cu Khanpughi ah ng’yak hlü ah om ni ne, Bawipa ah thukhän shaitaak cun phi läk ci goi.

⁷ Ngani cu ghi law pyi ci goi, Eliyabeth kä hta sei ani hta kä om ci.

⁸ Hnüüp ät ung Zechariah cu Taigüim kyong ah taigü ah bi cu bi ba ci.

⁹ Taigü gui ah thung man ah mangkiang ung phyuh vawi khai ah ghü u sei, Bawipa ah Taigüim ah hteit ci.

¹⁰ Ani naw kyong ah vawihpeh vai m’khih ne ak phyuh theh yah ung chang gui akpung ah taigü ci gui.

¹¹ M’khih ne vawihpeh nak mangkiang k’patlam ung Bawipa ah khankho chang dang law sei;

¹² Zechariah naw hmu netah cäi ne kyik ci.

¹³ Cun ung phi khankho chang naw, “Zechariah aw, kä na kyih vai nei, Khanpughi naw na k’taigü cu ng’yak ci, na k’chu Eliyabeth cu pamihta ah hta lawk khai, ang ming cu Johan ah na sui vai.

¹⁴ Ani ang tüi law ung a i hlawk ah na yeikyai khai ang? na püipaw gui mä a i hlawk ah yeikyai tuk khai gui ang?

¹⁵ Ani cu Khanpughi lam ah chang m’gäi ah kya ci. Awktat man phung kä ei awk khai, anu puk ge ung Mumcha Theing awn kümbe khai.

¹⁶ Ani naw Israel chang van cu ami Bawipa Khanpughi ah law püi ba gui khai.

¹⁷ Ani cu Bawipa ah lam ung lam ma ciah kya ne, profet Elijah ah mäih ah khüighaat ne hlüngtai khai. Ani naw pa la hta atäng ah om ba sak goi khai; ani naw ng’thu kä ngai ciah chang gui düng ciah lu ng’lang nak ung ng’hlah law ba sak gui khai; Khanpughi ah hmawk ah ng’düi ge khai gui ah Bawipa ah chang gui cu ana m’cäi gui khai,” cine pyein ci.

¹⁸ Zechariah naw khankho chang-am, “Cun ah a kyak vai cu a i hawk cha ka hmat khai ang? Kei phi ka ghi lawk ci, ani phi ghi lawk ci” cine pyein ci.

¹⁹ Khankho chang naw, “Kei cu Khanpughi ah ma ah ng’düi ciah Kabriel nei; shin ah ng’Thu Ni nang-am ka ning m’thein khai ah Khanpughi naw ana tüih law nei.

²⁰ Cun ung phi akhin a khüm law ung bä khai ah ng’thu kei ah pyein cu nang naw kä na yum ci. Cun kä na yum ah hmawk ah nang cu na aang khai, kei ah ng’thu bä ne kä ang dang pha güt käng thu phung ah na om khai” cine pyen nak ci.

²¹ Cun ah khin pum ung Zechariah cu chang gui naw ging law yai u netah, a i haw ne shin güt leng leng pum im kyong ah a ding ang? ci ne cäicat ci gui.

²² Ani cu a luh law ba ung kä ng’thu ba thei ci. Cun ah kya sei ngami naw Taigüim kyong ah mikhmuk ciah ah hmat ci gui. Kä ng’thu ba thei netah a kut awn nüt püi gui ci.

²³ Taigüim kyong ah taigü nak a khin ng’pyi sei, Zechariah cu a im ah hteit ba ci.

²⁴ Cun kawn ah shou hta khätah Eliyabeth cu m’gai law ne cha hma ung kä luh law ah om ci.

²⁵ Eliyabeth naw, “Khanpughi naw kei cu nam gein pyi ci, Chang ah ma ah lü ng’aa nak ungka nak phiawn pyi ci” cik ci.

Bawipa Jesuh Ang Tüi Law Vai ah Mawng Ami Shäu Nak

²⁶ Eliyabeth am gai nak ak cha chuk nak ung, Khanpughi naw khankho chang Gabriel cu Kalile kho Nazaret gawnu ah tüi lawk ci.

²⁷ Khankho chang naw David ghangpughang ah ng’shon Josef ah k’chu vai ami beit ah Mari-am ng’thu m’thein lawk ci.

²⁸ Khankho chang naw Mari ah ma ah, “Na khan ah ding gei nak om sä, Bawipa naw a täng ah ning om püi ne, küikyang ciah hrilham ning k’be sä!” pyen nak ci.

²⁹ Mari cu khankho chang ah ng’thu ng’ya ne cäicat netah, “A i a pyein ni mä” cine ngai ci.

³⁰ Khankho chang naw, “Mari awi, kä kyikyawk ä, Khanpughi naw ning m’hlüngtai pyi ci nei.

³¹ Nang cu m’gai ne pami hta ah na hta lawk khai.

³² Ang ming cu Jesuh ah na sui vai. Ani cu hlüngtai ne hlüngtai pi ciah Khanpughi ah hta ah kyak ci. Ani cu David ghangpughang ah ang shon ah kyasei, Khanpughi naw ghangpughang ah ngoh sak ba khai.

³³ Ani cu Jakob ah hta ng’shon ung ngawi yä ghangpughang ah kiak khai, a uknak cu kä düt hlawt khai” cine pyein ci.

³⁴ Mari naw khankho chang-am, “Kei cu ng’lamihta nei shin ah na pyein gui cu a i hawkcha ah kya thei khai ang?” cine ng’shik ci.

³⁵ Khankho chang naw Mumcha Theing nak khan ah gawk lawk khai, Khanpughi ah hlüngtai nak phi nakkhan ah gawk lawk khai. Cun na kia sei theingthap ciah ak hmaw cu Khanpughi ah Htapa ah ming khai.

³⁶ Na paw Eliyabeth ah mawng cu ngai shüm ä, ng’yüü ciah ami pyein, ghi law pyi ciah chang ani cu, tuhbäi cha chuk m’gai pyi ci nei.

³⁷ Khanpughi ah kä m’khüt a i kä om ci nei” cine pyein ci.

³⁸ Mari naw, “Kei cu Khanpughi ah changshäm ah ka kyak ci, na pyein ah mäih ah kya sä” ci khätah, khankho chang cu maih ba ci.

Mari cu Eliyabeth ah Hteit ci

³⁹ Cun kawn ah Mari cu pawng m’hteim ne, Judea kho, khosiip lam gawnu tumat ah hteit ci.

⁴⁰ Mari cu Zechariah ah im ah hteit ne Eliyabeth cu yavaih nak ci.

⁴¹ Eliyabeth naw Mari ah yavaih nak ang yak sang ung a puk kyong ah ak hmawhta cu hnün ci. Eliyabeth cu Mumcha Theing awn be netah,

⁴² “Nang cu hnumi gui nüng ung hlüngtai nak om pi bäih ci, na hta law nak vai ah ak hmaw cun phi hlüngtai nak om ci!

⁴³ A i ah kya ne, kei ah khan ah shin ah hlüngtai nak gui a gawk law ang?

⁴⁴ Ka Bawipa ah anu cu kei ah gawk lawk ci nei. Nang ah yavaih nak kang yak vai-am kei ah puk kyong ah ak hmaw cu yeikyai ne hnün ci nei.

⁴⁵ Khanpughi ah ng’thu akcang ah bä lawk khai cine, na yum ah hmawk ah nak khan ah yeikyai nak om ci nei” cine m’lau ne pyein ci.

Mari ah M’hlüngtai nak Ng’Äi

⁴⁶ Mari naw, Ka m’lung naw Bawipa m’hlüngtai ci;

⁴⁷ Khanpughi Hunbawi hmawk ah ka mümcha yeikyai ci,

⁴⁸ Ani naw yoken ciah akchang shäm cu na shüm ci nei, Tuhbäi tün ne chang van naw yeikyai chang ah na khü Khai gui nei,

⁴⁹ A i ah kyasei ci ung hlüngtai säih ciah Khanpughi naw kei ah hmawk ah aküikyang cu bi pyi ci nei. Ani ah Ming cu theingcim ci;

⁵⁰ Ani m’tamkhah ci gui ah khan ah ang shon päng ung am gein nak cu dang sak ci.

⁵¹ Am gäi nak ah a kut awn am lung m’däm ci gui cu, m’taai gui yawp ci.

⁵² M’gäi ciah ghangpughang gui mangkiang ung kaa yuk chah gui ne, yoken ciah chang gui han chaang gui ci.

⁵³ Cawigha ci gui-am tuihlim ci tumbei gui ne, bämang ci gui cu ami yüng ah hteh sak gui ci.

⁵⁴ Pupa gui ah ma ah a shaitaak cu kümbe sak ne, ak chang shäm Israel chang gui cu m’htei gui khai ah law pyi ci nei.

⁵⁵ Ani naw Abraham am am dang ah am gein nak cu, hta ng’shon ung dang lä ci nei” cine ng’äi ci.

⁵⁶ Mari cu Eliyabeth ni ah cha thum om tu netah, a im ah hteit ba ci.

Tuihnim Johan ah Ng’tüi Nak

⁵⁷ Eliyabeth cu akcha küm law sei pami hta ah hta lawk ci.

⁵⁸ A im ng’phei la a mätyah gui naw, ani ah khan ah Khanpughi naw cäicat vai abi cu hmu u netah, ani awn a täng ah yeikyai tuk ci gui.

⁵⁹ Ak hmawhta hnüüp chih lüng sei, vun-ah pawi ami bi nak ung law tuk ciah chang gui naw, apa ah ming, Zechariah bä ah sui ba vai ah ng’ya hlük ci gui.

⁶⁰ Cun ung phi anu naw “Johan ah sui vai nei” cik ci.

⁶¹ Ngami naw “Nangmi ung cun ah ming kä om man ci” cik ci gui.

⁶² Cun kawn ah apa naw a i ah a sui hlü ah nüt ne ng’shik ci gui.

⁶³ Zechariah naw guk nak vai k’thäh gui netah, “Aming cu Johan nei” cine gu khätah, chang gui cu cäicat ci gui.

⁶⁴ Acun vai-am Zechariah cu ng’thu law ba thei netah, Khanpughi cu m’hlüngtai ci.

⁶⁵ Ami im ng’phei gui cu ami van kyikyawk ci gui.

⁶⁶ Cun ah a mawng gui cu Judea kho, khosiip lam avan ung thang yawp ci. Cun ah mawng ng’ya tuk ciah chang gui naw, “Cun ah ak hmaw cu a i ah mäih chang ah kya lawk khai ang?” cik ci gui. Cun ah ang htei kawn ah Bawipa ah hlüngtai nak cu ani ah khan ah om ci.

Zechariah ah Ng’cä Nak

⁶⁷ Johan ah pa Zechariah naw Mumcha Theing awn be netah, Khanpughi ah ng’thu a pyein cu:

⁶⁸ “Israel gui ah Khanpughi Bawipa cu m’hlüngtai tu vä, Ani cu akchang gui m’htei gui khai ah law ne, phiawn sak gui pyi ci nei.

⁶⁹ Ak changshäm David ah hta ng’shon ung, hlüngtai ciah Hunbawi cu dang sak pyi ci nei.

⁷⁰ Cau theingthap ciah profet gui-am shaitaak nak a peit gui ah mäih ah,

⁷¹ Ani naw ga ah kut kyong ungka la, na thüi na gui ciah kut kyong ungka na hun gui pyi ci nei.

⁷² Ani naw mi pupa gui am gein nak gui cu pyein ne, ang thu khän theing cun phi shüm ci nei.

^73-74 Mikmi cu ga ah kut ung nak phiawn gui ne, kä kyikyawk ne abi mi bi vai ah mipa Abraham ah ma ah shaitaak nak pe pyi ci.

⁷⁵ Cun ah kyasei mikmi cu theingcim nak la düng nak awn Khanpughi ah ma ah mi ghin nak chuih mi om khai.

⁷⁶ “Nang, kei ah chang hmaw, a hlüngtai säih Khanpughi ah profet ah ning khü vai nei. Nang cu Bawipa ah ma ung law ne, ani ah hmawk ah lam na pyang khai.

⁷⁷ Bawipa ah ak chang gui-am, ami katnak m’gein gui sei, hun nak ami gah vai ah mawng m’thein gui khai nei.

⁷⁸ Mikmi ah Khanpughi cu m’gein nak la k’dük nak awn be ci. Ani naw a hun nak ah akdei cu mi khan ah ng’shü law sak ne,

⁷⁹ Sihnak ah ang hnim ka ah om ci gui ah khan ah khankho ah akdei cu khang lawk khai, mikmi-am phi ding gei nak lam nam shüm gui khai” ciah kyak ci.

⁸⁰ Ak hmaw cu däm ng’vai law ne pumsa, mümcha avan ung kümbe lawk ci. Ani cu Israel chang gui ah ng’lung ah dang khai ah bi kä abi pha güt ung kho ng’gau kho ah om cang ci.