LAMKTU 8 - Cho Bible Common Language 2016

Soul Naw Khritha Bum Dudeiu nak ci.

¹ Cu hnüüp ung tün neh Jerusalem ung om ciah khritha gui cu, ak she ah dudeiu nah gui ci ci gui. Cun ah kiah sei ngah mi cu Judea khaw lah Samaria khaw yung ah püipiang yawp u sei. Ang düihpüi gui bäng om ba ci gui.

² Zum ciah chang amshah cu Stephen nah gook cu m’cim u neh thui sei kyap m’lau ci gui.

³ Cun ung phi Soul naw khrithabum gui cu m’di gui vai ah k’tha nak ci. Ani cu a im tung päng ung hteit neh, hnumi, pami sawkaih gui neh thawng ung chum gui ci.

Samaria Khaw ah Thu K’ni Pyein Ci Gui

⁴ A khaw hei hei ah püipiang ci gui ah yum ciah chang gui naw ng’Thu Ni cu hei pyein vük ci gui.

⁵ Philip cu Samaria khaw pigaw ak däm pi ung hteit neh Messiah ah mawng cu pyein ci.

⁶ Chang gui naw Philip ah m’dang ah cäi aih vai gui cu hmu u netah, ang thu cun phi akcang ah ngai ci gui.

⁷ Khaw she ah kai gui ah chang akda ung ka, khaw she gui cu m’lau ne lut law ne dawng ci gui. Akut khaw shum ciah chang gui phi gai ba ci gui.

⁸ Cun ah kyasei cun ah gawnu ung om ciah chang ami van cu yei kiai ci gui.

⁹ Acun ah pigaw ung Simon ming nak ciah chang tumat om ci. Ani cu amät naw amät ang vai pi ah pyein neh, k’ce kya ne Samaria chang gui cu cäicat sak gui ci.

¹⁰ Ak kyom akshe, akpyam ang mang chang akda law u netah, “Ani cu hlüng tai pi ciah Khanpughi am hlüngtai ah kyak ci nei” cine ang thu cu ngai ci gui.

¹¹ Ngami cu Simon ah ce ah mawng ung ami cäicat nak she law pyi ci kiah sei cun nah m’hteih ne ngai ci gui ah kyak ci.

¹² Cun ung phi Khanpughi ah uknak khaw a mawng ng’Thu Ni lah Bawipa Jesuh a mawng Philip naw a pyein yum ciah chang hnumi, pami cu tui ng’hnim ci gui.

¹³ Simon amät cun phi yum law tu netah, tui ng’hnim tu neh Philip ah pei ah om tuk ci. Ani cu cäi aih gui vai lah ngaih khit gui vai cu hmu netah ang htei ah cäicat ci.

¹⁴ Jerusalem ah om ciah ang düihpüi gui naw, Samaria chang gui naw Khanpughi ah ng’Thu ami do cu ng’yah u netah, Peter la Johan cu ngah mi ah om nak ah tüi gawi ci gui.

¹⁵ Ngahni gawk law ni netah yum ciah chang gui naw Mumcha Theing ami gah vai ah taigü pe gui ci gawi.

¹⁶ A i ah kiah sei ci ung cu hnüüp ung khüt sei, Mumcha Theing cu a u ah khan ah phi kä kyum law phak ciah kyak ci. Ngami cu Bawipa Jesuh ah ming awn tui bäng hnim phak ci gui ah kyak ci.

¹⁷ Cun kawn ah Peter lah Johan naw ami khan ah ani kut taih ni khä tah ngah mi cu Mumcha Theing gah ci gui.

¹⁸ Ang düihpüi gui naw ami kut ami taih nak ah chang gui, Mumcha Theing ami gah cu Simon naw hmu tu netah,

¹⁹ “Kei naw ka kut ka taih nak ah chang, Mumcha Theing a gah vai ah, kei am phi hlüng tai nak cu na pe tu vä” ci neh ngui pe gui ci.

²⁰ Cun ung phi Peter naw, “Nang naw Khanpughi ah m’gein nak cu ngui awn nak khleih khai ah na ngaih ah phäh ah na ngui cu, na mät awn a täng ah m’htei khaw a hteit sä;

²¹ Khanpughi ah ma ah nang ngaih käng düng ci kyasei kei mi ah bi nak ung, nang kä na bi tuk khai.

²² Cun ah na shet kat ah phäh ah nang yu ba vai, Cun ah na ngaih tüh cu Khanpughi naw a ning m’gein vai ah nak taigü vai.

²³ Nang cu m’thüi nak awn be neh katnak ah thawng ung na kium ciah ka ning hmuk ci nei” cine pyen nak ci.

²⁴ Simon naw Peter lah Johan am, “Tuhbäi na ni pyein gui cu kei ah khan ah kä a gawk law vai ah Khanpughi ah nak taigü pe nä” cine ng’yawi ci.

²⁵ Peter lah Johan cu Bawipa Jesuh ah mawng ani hmuh ng’yak gui m’dang neh Khanpughi ah ng’thu cu pyein ni netah Jerusalem ah hteit ba ci gawi. Ani hteh nak ba lam ah Samaria pigaw akda ung Bawipa Jesuh ah mawng ng’Thu Ni cu pyein ci gawi.

Philip Lah Etheopia Bawi

²⁶ Khanpughi ah khankho chang naw Philip am, “Ng’düi law neh Jerusalem ung ka naw Kaza ah hteh nak lam, htum lam ah hteit ä” cine pyen nak ci. (Cun ah lam ung tuhbäi a u kä hteit ba ci.)

^27-28 Cun vai am philip cu ng’düi law neh hteit ci. Cun yah ung Etheopia ghangpughang nu ah khawh m’htei pek ciah akci ami k’phyet ah Etheopian bawi tumat om ci. Ani cu a law nak ba ah lam pumung prophet Isaiah ah guk ah cang cim cu phat ci.

²⁹ Mumcha Theing naw Philip am, “Ani ah om nak ah hteit neh a täng ah ng’gui püi ä” cine pyen nak ci.

³⁰ Cun ah kyasei Philip cu dawng ne a pei ah hteit neh, Isaiah ah guk ah cangcim aphat cu ng’yah netah, “Na phat ah cang cim ah mawng cu na hmat ciang?” cine ng’shik ci.

³¹ Cun ah chang naw, “A u naw kä a nak phlan tu ung kä ka hmat hlawt khai” ci netah, Philip cu yatha kiaangung a täng ah a ngawh tu vai ah khü ci. Ani ah phat ah cangcim cu:

³² “Ngawn vai ami hteh püi ah Htome hta ah mäih ah ani cu hteh püi ci gui. Amu ami k’teiü peit ung ak’aw käm hluh law neh om ciah Htome hta ah mäih ah, ani cu ak’aw käm hluh law ah om ci.

³³ Ani cu ng’yo m’shaw nak gah ci, ani ah hmawk ah tutäng khai ah bi nak kä om ci. Khomdek khan ah ani ah ghin nak cu ng’pyi pyi ci kiah sei, Ani ah hta nau gui am m’thein m’kan gui khai tumat phi kä om ci” ciah kyak ci.

³⁴ Cun ah bawi naw, Philip am, “Prophet naw a u ah mawng a pyein ang? amät ah mawng ang? Chang hei ah mawng ang? nam thein tuä” ci ne ng’shik ci.

³⁵ Philip naw acun ah cangcim awn tün neh, Bawipa Jesuh ah mawng Thu k’Ni cu m’thein tuk ci.

³⁶ Ngah ni cu hteit gäk gäk ni netah tui ah om nak ah gawk lawk ci gawi. Cun kawn ah cun nah bawi naw, “Shin yah ung tui om ci, tui kä kang hnim cang vai ah na shung shet ciah mawng a i om ne ang?” ci neh ng’shik ci.

³⁷ (Philip naw, “Nang cu nam lung kyawng avan awn Bawipa Jesuh na yum ah a kyak ung tui nang hnim vai” ci neh pyen nak ci. Cun ah bawi naw, “Bawipa Jesuh Khrit cu Khanpughi ah Htapa ah kyak ciah, kei naw ka yum ci nei” cik ci.)

³⁸ Cun kawn ah ng’se cu ng’düm sak netah, ngah ni cu tui ung yu kyum law ni neh Philip naw cun ah bawi cu tui ng’hnim sak ci.

³⁹ Ngah ni cu tui ung ka, ani kai law ba vai am, Khanpughi ah Mumcha Theing naw Philip cu, a khaw hei ah hteh püi sei cunah Bawi naw Philip cu kä hmuh ba ci. Cun ung phi ani cu yeikyai neh lam hteit ba ci.

⁴⁰ A kawn ah Philip cu Ayotus gawnu ah gawk ciah hmat lawk ci. Cun kawn ah Sisaria ah hteit ba neh, a hteh nak ba ah lam apigaw päng ung Bawipa Jesuh ah mawng ng’Thu k’Ni cu hei pyein vük ci.