LAMKTU 4 - Cho Bible Common Language 2016

Peter lah Johan Cu Kawngsi ah Gawk Ci Gawi

¹ Peter lah Johan naw chang gui am ng’thu ami m’thein gui yah ung taigü gui, pum im ngäng ciah ng’vai lah Sudducees gui cu gawk law ci gui.

² Ngah mi naw sih nak ung ka thawh ba nak ah mawng, m’dang ciah Bawipa Jesuh ah thawh ba ah mawng cu, m’thein gui ni khä tah ngah mi cu m’lung k’she ci gui.

³ Cun ah kiah seih ngah ni cu pha gawi u ne acun hnüüp kho mü khätah a ngawi ung, khaw ngawi güt thawng ung chum gawi ci gui.

⁴ Cun ung phi a ni ng’thu ng’yah tuk ciah chang ak da naw, Bawipa yum tuk ci gui. Zum ciah chang avan phia hma kip law lawk ci.

⁵ Angawi ung Judah ng’vai gui, agham gui lah ng’thu m’khän saya gui cu Jerusalem ah ng’bum ci gui.

⁶ Ngah mi cu taigütung Annas lah akyawng ung ka gui ah kyak ciah, Khaiaphar, Johan, Alexander lah ami paw gui awn ng’ge ci gui.

⁷ Ngah mi naw ang düihpüi hnih cu ami ma ah m’düih u ne tah, “Nang ni naw a i cha shin na ni bi ang? a i hlüng tai nak, a u ah ng’ming awn na ni bi ang?” cine ng’ng’shi gawi ci gui.

⁸ Cun ah kiah khä tah Peter naw, Mumcha Theing awn be ne tah, “Chang guiah ami ng’vai gui lah a gham gui aw,

⁹ a khaw shum ciah chang, ak ni ah a gai law ba ah mawng ung kei ni k’cet ne na mi na ng’shi gawi ci, shin ah chang cu,

¹⁰ nang mi naw kut lam tung ung tai ne ngawn uk ci seih Khanpughi naw a thawh ba sak ah Nazaret Bawipa Jesuh Khrit ah hlüng tai ciah ang ming awn theek ne gai ne, nami ma ah ang düih cu, nang mi lah Israel chang van naw nami hmat khai nei.

¹¹ Jesuh Khrit cu: “Lung im nami cawh ung nami nawng shüt ah lung cu, ak kui kyang pi bäih ah lung ak tung ah kiah lawk ci” ciah ca ng’cim ah pyein cu Bawipa Jesuh, ah kya ci.

¹² Ani bäng cun vah Hun Bawi ah kyak ci, khomdek ah khan ung ani ah kawn ah, mikmi na hun gui khai, Khanpughi ah ghü u kä om ci” ci neh m’hlan ba gui ci.

¹³ Peter la Johan cu hmuh hmat nak kä däm ciah chang ah kya lang ni neh ani ng’thu htaü hning cu kawngsi ng’vai gui naw hmuh u ne tah ang htei ah cäicat ci gui. Ngani cu Bawipa Jesuh ah ng’düihpüi gawi ah phi hmat gawi ci gui.

¹⁴ Cun ung phi gai ba nak gah ciah chang cu Peter lah Johan awn atäng ah ng’düi ci kiah khäh tah a i phi kä pyein hlawt ci gui.

¹⁵ Cun ah kiah seih ang düihpüi gui cu tüi ba gui u ne tah

¹⁶ “Shin ah chang gui a i ah ci gui vai ang? cäi aih gui vai ami m’dang cu Jerusalem ung om ciah chang avannaw hmuh hmat pyi ci, käk hleei nak gui hlawt vai kiah pyi ci.

¹⁷ Cun ung phi shin ah a mawng cu chang khli naw kä a hmat ten tu vai ah cän kawn ah shin ah chang gawi naw Jesuh ah ming awn a i kä a ni pyein nen ba vai ah khen neh mi ma nah gawi khai nei” ci neh ng’ge ci gui.

¹⁸ Cun kawn ah ang düihpüi gui cu khü ba gui u ne tah Jesuh ang ming awn a i phi kä ami pyein sak, m’thei thang ba gui vai ah khen neh m’cäi gui ci gui.

¹⁹ Cun ung phi Peter la Johan naw, “Nang mi ah ng’thu ngaih vai lah Khanpughi ah ng’thu ngaih vai cu, Khanpughi lam ah ngaih ung a i, ang düng pi ah na mi mät naw m’khoi chah vä;

²⁰ Kei mi läi kami hmuh lah kami ng’yak cu kä pyein ah kä ka mi om hlawt khai nei” ci neh kyak nah gui ci gui.

²¹ Kawngsi ng’vai gui naw, ngah ni cu khen neh k’taap ba goi ne tah tüi ba gawi ci gui. Acun ah a mawng gui hmuh tuk ciah chang gui naw Khanpughi m’hlüng m’tai yawp u khä tah ang düihpüi gui cu a i ah phi käm kat gui hlawt ci gui.

²² Shum te ci, cäicat vai ah gai ciah chang cu a khaw kum phli-kip ah däm ci.

Yum Ci Gui Naw Thamah Vai ah Ami Taigü Nak

²³ Peter lah Johan cu ami tüih ba goi kawn ah ani paw gui ah hteit ba ni ne tah taigü ng’vai gui lah agham gui ah pyein ah ng’thu cu m’thein tu ba gui ci gawi.

²⁴ Cun ah ng’thu cu ng’yah u ne tah yum ciah chang gui cu bum u neh, “Khankho lah khomdek, tuinu lah ak ghing om avan tüi pyang ne uk ciah Khanpughi,

²⁵ na chang shäm, kami pughi David am Mumcha Theing awn nang thu cu; “A i ah kiaseih chang pakhui hei gui ami tung tu ang; A i ah kiaseih chang gui naw ak she m’yih neh ami pawng püi ang?

²⁶ Khomdek khan ghangpughang gui naw, Khanpughi cu ng’tuk püi vai ah pawng püi pyi ci gui, Bawipa lah Messiah cu hnu ng’tuk püi vai ah ng’bum pyi ci gui” ciah kyak ci.

²⁷ A cun ah mäih ah Herod lah Pontius Pilate cu, chang pa hei gui lah Israel chang gui awn a täng ah Messiah ah nam düih, na chang shäm ah Bawipa Jesuh cu hnu ng’tuk püi vai ah ng’bum man ci gui nei.

²⁸ Cun ah ami bum cu na hlüng tai nak lah nang yak nak hlü awn nak bäi pyi gui a khüm be nak vai ah kyak ci nei.

²⁹ Aw Bawipa ngah mi ah pawng püi nak cu yuk chah pe gui ä. Na na chang shäm gui am, nang thu kami pyein nak hning vai tha gui na yuk pe gui ä.

³⁰ Gawi ci naw a gai nak vai, na kut yu k’phiat lawä; Na shäm ah Bawipa Jesuh ah ming theing awn cäi aih vai gui lah ngaih khit vai gui gui cu, yuk m’dang lawä” ci neh Khanpughi ah taigü ci gui.

³¹ Ami taigü yawp vai am cun ah ami taigu nak ah hmun cu ng’tum ne thüng ci. Ngah mi cu ami van Mumcha Theing awn be u ne tah, Khanpughi ah ng’thu cu thamah nak awn pyein sak ci gui.

Yum Ci Gui Naw Ami Khawh Cham Vun Vai Ci Gui

³² Yum ciah chang gui cu ami m’lung ngaih kawng ät u neh, a u naw phi amät ah khawh cham cu aka ah käm tung sei, ami khawh cham avan cu ami ka ghawm ah ngai ci gui.

³³ Ang düihpüi gui cu hlüng tai nak awn k’thamah ne, Bawipa Jesuh a thawh law ba ah mawng cu saksi ci gui, Khanpughi naw phi ngah mi ah khan ah ng’büh mang nak hrilham cu k’be gui ci.

³⁴ Im tak ci naw a im, lai tak ci naw a lai, yawi u ne tah ang düihpüi gui am ap lawk ci gui.

³⁵ Cun kawn ah ang düihpüi gui naw tumat ciah, ng’yak hlü ah ciah, tei pai gui ci gui. Cun ah kiah sei ngah mi ung i kä tak cicu kä om ci.

³⁶ Saipras khaw ah ka Levit ah ng’shon Josef, ang düihpüi gui naw barnabas (shawih khem tuk ciah ming ci) ah ami khü ah chang tumat cu om ci.

³⁷ Ani naw amät ah lai cu yawi ne tah ngui law püi neh ang düihpüi gui am ap gui ci.