LAMKTU 28 - Cho Bible Common Language 2016

Malta Kho Kaung ah Ami Gawk ah Mawng

¹ Keimi cu cun ah phyawng ne kaung ah kami gawk awn ah cun ah kho kaung cu Malta ming nak ciah kami hmat lawk ci.

² Acun ung om ciah chang gui naw keimi cu ang htei ah nam gein gui ci gui. Kho aa ne kho m’yu law khä tah, mei cik ne nam awm gui u ne, na khin nah gui ci gui.

³ Paul naw sing pawk ät cu la ne mei ung m’sui ci, Sing cu ui law khätah, sing pawk kyong ah kaa phyuu tumat lut law ne, Paul ah kut ung htui ne ng’bah nak ci.

⁴ Cun ah htui ne ang bah nak cu, cun ung om ciah chang gui naw hmu u netah, “Shin ah chang cu chang ngawn ciah kyak khai, tuinu ung kä si ne a phiawn ung phi, ng’düng nak naw ani kä ghin sak ci” cine ami mät ng’htau ci gui.

⁵ Cun ung phi Paul naw phyuu cu k’thüng ne mei ung k’htawp ne, a i phi kä m’neh ne om ci.

⁶ Ngami naw Paul cu apumsa ng’phling law sei, kyu ne si lawk khai ah ngai ne teng ci gui. Acun ah ak shou ngäng ne teng u sei phi, Paul cu a i ah phi kä kya law khätah, ngami cu ami m’lung thawng sei, “Shin ah chang cu ng’you nu kya ci nei” ci ne kyak ci gui.

⁷ A cun na pei et ah ami ng’vaipi Publius ah akaa, lai gui om ci. Ani naw keimi gui cu na dou gui ne, hnüüp thum ung na khin nah gui ci.

⁸ Publius ah a pa cu a pawi na sei gaw ne ng’yän ci. Paul cu ani ah im kyong ah lut ne taigü ci. Cun kawn ah ani ah khan ah a kut taih ne gai ba sak ci.

⁹ Cun kawn ah cun ah tui koi kawng ungka gawpai ciah chang gui cu Paul ah lawk ci gui. Paul naw ngami cu gai sak gui ci.

¹⁰ Ngami naw keimi am khawh akda na m’cüm’hnah gui ci gui. Keimi kami hteh law ba vai ung phi kami sho ei vai cu htinpaw khan ah na thak law gui ne nam sho gui ci gui.

Malta ah Kaa naw Rom

¹¹ Chaa thum lüng khätah keimi cu, cun ah tuikoi ung düm te ciah htinpaw awn kami hteit law ba ci. Cun cu Alexandria ah kaa lawk ciah, “Hnamnu ng’phi” ming nak ciah htinpaw ah kya ci.

¹² Keimi cu Sirakua gawnu ah ng’düm u neh hnüüp thum kami om pah ci.

¹³ Cun ungka naw hteit ba u ne, Rhekium gawnu ah kami gawk ci. Cun ung kaa naw khokhi ni sei hteit ba u ne, hnüüp goi lüng khätah Puteoli pigaw ah kami gawk ci.

¹⁴ Cun ah pigaw ah yum ciah chang gui awn ng’hmuh u ne, kho hnüüp chih kami om vai pyein ne na chou gui u sei, om tu u netah, Romah ah k’täih ne kami hteit ci.

¹⁵ Rom ah om ciah yum ciah chang gui naw kami gawk cu ng’ya u netah, Appius Market ah phi bäi, kami kai nak im tung thum ah khüt law ne phi bäi, na dou law gui ci gui. Ngami cu Paul naw hmu gui netah, Khanpughi m’hlüng m’tai ne k’tha mah law ba ci.

Rom gawnu ung Bi Abi Nak

¹⁶ Romah kami gawk awn ah Paul cu, amät bäng, gaakap tumat naw angäng tu hnga vai ah a khin gah ci.

¹⁷ Hnüüp thum lüng khä tah Paul naw cun ah gawnu ung om ciah Judah chang ng’vai gui khü gui ci. Ngami cu law ne ng’cut law u khätah, Paul naw, “Israel chang phäi nau gui aw, kei naw mi mät ah pakhui ah khan ah phi bäi, mi pupa gui ah thung man gui ah khan ah phi bäi, m’shetkat ne a i phi ka bi lawh kä om lang sei, kei cu Jerusalem ah Jew chang gui naw na pha u netah, Rom chang gui ah kut ung na ap ci gui nei.

¹⁸ Ngami naw kei cu na cet u ne, kei ah bi nak ung sih nak khin vai ah mawng a i kä hmu u netah na phiawn hlük ci gui.

¹⁹ Cun ung phi Judah chang gui naw ke khenggeng u sei, kä ng’näng law netah ghangpughang ah ka ng’paa ah kyak ci. Cun cu mi mät pakhui chang gui ka hnu ng’tuk püi hlü su ah kä kyak ci.

²⁰ Cun ah kyasei nangmi awn ng’hmuh vai ah ka k’tha nak ah kya ci. Kei shin ah m’si gui, gui awn ami na khih cu, Israel chang gui naw, mi ngäng ah Bawipa ah hmawk ah kyak ci” cine pyein ci.

²¹ Ngami naw, “Keimi naw nang ah mawng, ca tumat phi Judea kho ah kaa kä ka mi gah man ci. Mikmi Judah chang, tumat naw phi law ne, nang ah mawng kä ak ni ah kä pyein man ci.

²² Cun ung phi chang akda naw, a hawi hawi baw, nang ah pati ah mawng cu hnu ng’tuk püi ne ng’thu ci gui nei. Cun ah kya sei nang ah pati ah mawng cu keimi naw phi kami ng’ya tu hlük ci nei” cik ci gui.

²³ Cun ah kyasei ngami cu Paul awn hnüüp ng’nüt u netah, ami ng’nüt nak ah hnüüp ung chang akda Paul ah om nak ah gawk law ci gui. Paul naw kho ngawi ah tün ne, mühun nah khüt khai ah khanpughi ah uknak ah mawng Thu Ni cu m’thein gui ci. Bawipa Jesuh ah a mawng cun phi, Moses ah thukhän la prophet gui ah cacim gui awn küm khai ah, ngami naw ami yum tu vai ah k’tha nah ne m’thein tu gui ci.

²⁴ Chang amshah gui naw Paul ah thu pyein cu bä ci cine yum tu u sei phi, amshah gui naw kä yum tuk ci gui.

²⁵ Paul naw shin ah a mawng tumat cu pyein khä tah, ami mät gui ng’cuh ng’can u ne, ng’düi law ne hteit ba ci gui. Paul naw, “Mumcha Theing naw, prophet Isaiah ung, nami pupa gui am, am dang cu ni bä bä ci nei!

²⁶ Cun ah am dang cu; “Nang cu Judah chang gui ah ma ah hteit netah, ‘Nangmi naw ngai ne, ngai ne, phi kä nami hmat khai; Teng ne, teng ne phi kä nami hmuk khai” cine kyak nak gui vai.

²⁷ A i ah kyasei ci ung, shin ah chang gui ah m’lung cu aang ci, ami k’hnga cu pang ci, ami mik cu m’shing ci. Cun ah kä kya ne, akcang ah; ami mik cu m’dei ne, ami hnga cu ng’lang ne, ami m’lung cun naw hmuhmat ne, a kyak vai sü ung, kei ah ng’hlat law yawp u sei, Kei naw phi ngami cu ka gai sak gui khai,’ ci ne khanpughi naw pyein ci” ci ne m’thein gui ci.

²⁸ Paul naw a khüüp nak ah, “Cun ah kyasei hun phiawn nak ah mawng Khanpughi ah Thu Ni, changpakhui hei gui ah ma ah pyein khai ah chang cu tüih pyi ah kyasei, ngami naw ngai yak khai gui’ cicu nami hmat vai nei” cine m’thein gui ci.

²⁹ (Cun ah Paul naw ng’thu a pyein kawn ah Judah chang gui cu ami mät naw ng’cuh ng’can u ne hteit ba ci gui.)

³⁰ Paul cu cun ah gawnu ah ang vah ah im ung khokum goi ung om ci, ani ah om law tuk ciah chang gui cu ana dou gui ne, ak ni ah khin chah na gui ci.

³¹ Ani naw Khanpughi ah uknak kho a mawng thu phi pyein ne, Bawipa Jesuh Khrit ah mawng phi abü ang ngaih ah thamah nak awn m’theithang gui ci.