LAMKTU 25 - Cho Bible Common Language 2016

Ghangpughang ah Paul ah Ng’coipaa Nak

¹ Festus cu cun ah kho ah a gawk law nak hnüüp thum lüng khätah, Sisaria ah kaa Jerusalem ah hteit ci.

² Taigü khem gui la Judah chang ang’vaih gui cu, katnak a hlü hlü Paul naw a bi ah pyein neh. Festus ah ma ah chak ci gui.

³ Ngahmi cu Paul ami law püi ung lam ah mah ne ngawn vai ah pawng pyi ci gui ah kya ne, Ngami am hlün nak gui ah Paul cu Jerusalem ah a hteh püi ba sak gui vai ah k’thäh ci gui.

⁴ Festus naw, “Paul cu Sisaria ah thawng ung chum ne ngäng ci gui. Kei ka mät kä shou pha sei a cu ah ka hteit lawk khai.

⁵ Nami ng’vaihta gui cu kei awn a täng ah hteit tu u ne, Paul ung a kat nak a om ah a kyak ung tän ne pyein ne kei ah chah u sä” ci ne pyen na gui ci.

⁶ Festus cu Jerusalem ah hnüüp cheit, kaw, ghaa om ba netah Sisaria ah hteit ci. A ngawi ung thu m’cha nak mang kyang ung ngoh netah Paul cu khü sak gui ci.

⁷ Paul gawk law khä tah Jerusalem ah kaa lawk ciah Judah chang gui naw, ani cu k’bui u netah, thuuk ne shah ciah katnak gui k’bün ne k’sung ci gui, cun ung phi acun ah mawng saksi käm dang hlawt ci gui.

⁸ Paul naw, “Kei naw, Judah chang gui ah thukhän ah khan ah phi bäi, Pum im ah khan ah phi bäi, ghangpughang ah khan ah phi bäi, ka shetkat nak tumat hta phi kä om ci,” cine m’hlan tu ba gui ci.

⁹ Festus cu Judah chang gui ah chang m’sui nak ng’ya hlü netah, “Nang cu Jerusalem ah ning hteh püi netah kei naw ka ning ng’shi vai na yum khai ang?” cine Paul cu ng’shik ci.

¹⁰ Paul naw, “Kei cu m’khoichaa vai ah ghangpughang ah mang kiang ung ka ng’düi pyi ci. Nang naw na hmat pyi ah mäih ah Judah chang gui ah khan ah kei naw ka katnak i kä om ci.

¹¹ Ak cangah thukhän khep ne, sih nak vai khin ciah katnak ka bi ah a kyak ung, nami nam gein vai ah kä ka ng’yoi khai nei. Cun ung phi ngami ah nak sung nak cu kä akcang ah a kyak läi ung a u naw phi kei cu ngah mi ah kut ung kä na ap hlawt khai nei. Kei cu ghangpughang ah ka ng’coipaa ci nei” cine pyein ci.

¹² Festus cu ak chang vai gui awn ng’ge ba u netah, “Nang cu ghangpughang ah na ng’paa ci kyasei, ghangpughang ah na hteit khai” cine pyen nak ci.

Festus naw Akrippa Ghangpughang ah Ma ah Paul ah Mawng Am Thein Tu

¹³ Cun kawn ah shou hta khä tah Akrippa ghangpughang la ak chu Bernice cu gawmang Festus hmuh ne dou khai goi ah Sisaria ah gawk lawk ci goi.

¹⁴ Ngami ak shou ani om tu kawn ah Festus naw, Ghangpughang am Paul ah mawng cu m’thein tuk ci. Festus naw, “Shin ung Felix naw thawng ung a chum shüt ah chang tumat om ci.

¹⁵ Kei Jerusalem ah ka hteh yah ung, taigü khem gui la Judah chang vai gui naw, shin ah chang cu shetkat nak k’sung u ne, kei naw kam kat vai ah k’thäh ci gui.

¹⁶ Kei naw, ami chak ah chang tumat cu, chak ci gui ah chang gui awn mik hmai ng’chum sei kä ng’hmu sak ah, ngami ah chak nak ah mawng cu am hlan nak tu ba gui vai ah, a khin kä peit ah, k’sung ne m’kat cu, Roman thung ah kä kyak ci, cine kam thein gui ci.

¹⁷ Cun ung phi ngah mi cu a shi ah gawk law u sei, kei naw ak yä ah a ngawi ung ge, yung ah ngoh ne, cun ah chang cu ka khü sak gui ci.

¹⁸ Chak ci gui naw, ng’düi law ne, ani cu m’kat ne ami k’sung ung phi kei ah ngaih ah katnak awn ah kä kyak ci.

¹⁹ Ngahmi ah ng’cuh nak cu, ami mät ah yum nak ah mawng la Jesuh ming nak ciah chang ah mawng bäng ah kyak ci. Cun ah Jesuh cu si pyi te ci, cung phi Paul naw ghing ne om ci nei cik ci.

²⁰ Kei naw cun ah mawng gui cu kä pyein m’khüt netah Paul am, “Nang cu Jerusalem ah hteit ne, shin ah ami ning k’sung ah mawng cu, ning shi vai ah na yum ci ang?” cine ng’shi ngä sei;

²¹ Cun ung phi Paul naw nang ghangpughang ah m’khoichaa bäbä ng’ya hlük ciah pyein ci. Ani na thawng ung om lä netah ghangpughang ah thu m’chaa bä ng’ya hlük ciah pyein sei, ani cu nang ghangpughang ah ap law nak ah a khin ung khüt khai ah ami chum vai ah ka pyein nei” cine m’thein tuk ci.

²² Akrippa Ghangpughang naw, “Cun ah chang ah ng’thu cu ka mät naw ka ng’ya tu hlük ci nei” ci khä tah, Festus naw, “Acun ah chang ah thu cu ngawi ung na ngai ng’yak khai nei” cine pyein ci.

Akrippa la Bernice ah Ma ah Paul a Gawk ah Mawng

²³ A ngawi ung Ghangpughang Akrippa la ak chu Bernice cu, ang htei ah ng’hning kyau khai ah ng’pyang tham ne, gaakap bawi gui la gawnu ung ang vaihta gui awn a täng ah, gawnu im ng’ki kyong ah lut law ci. Cun yah ung Festus ah pyein ah Paul cu luh püi ci gui.

²⁴ Cun kawn ah Festus naw, “Akrippa ghangpughang la shin ung gawk lawk ciah chang ng’vai gui aw, Jerusalem la shin ah gawnu ung om ciah Judah chang gui van naw, ‘Shin ah chang cu kä m’ghin vai nei’ ci neh kei ah k’thäh lawk ci gui. Cun ah ami chaak cu shin ah chang nei.

²⁵ Ani naw sih nak khin vai ah katnak a bi tumat phi kei naw kä ka hmuk ci nei. Cun ung phi a mät naw ghangpughang ah ka ng’coi ng’paa khai ci sei, nang ghangpughang ah law püi vai ah ka k’bäi ah kyak ci nei.

²⁶ Nang ghangpughang ah ma ah ani ah mawng cu, kei naw a khenggeng ah ka pyein vai i kä om ci nei. Cun ah kyasei ani cu nami ma ah ka law püi ah kyak ci nei. Nang ghangpughang ah ma ah ak tung ah ka ning ap lawk ci nei. Shin ah ka law püi cu, nang ghangpughang naw ng’shi ci tah kei naw ca ka guk vai mawng ang dang vai ah hmawk ah kyak ci nei.

²⁷ A mawng ama a i kä m’dang ah thawng kyum tumat chah ba vai cu, lam kä ng’shung khai ah ka ngai ci nei” cine pyein ci.