LAMKTU 21 - Cho Bible Common Language 2016

Jerusalem ah Paul a Hteh ah Mawng

¹ Keimi cu ngami awn kami ng’pai kawn ah Kos tuikoi ah kami gawk ci. A ngawi ung Rhodes päng ah gawk u ne, cun ungka naw Patara pigaw ah kami hteit ci.

² Cun ungka naw Phoenicia ah hteit khai ah htinpaw tumat bui u ne, acung kai tu ne k’täi ne kami hteit ci.

³ Saiprus päng hmuh nak vai ung gawk law u netah, htumtäng Siria kho lam ah ka mi hteit ci. Tire gawnu ung ami khawh gui chah shüt khai kyasei kami ng’düm pah ci.

⁴ A cu ah yum ciah chang gui awn ng’hmu u ne, hnüüp chih kami om tuk ci. Ngami naw Mumcha Theing ah lam shüm nak awn Paul cu Jerusalem ah kä ah hteh vai ah maa nak ci gui.

⁵ Cun ah ngah mi awn kho hnüüp chih kami om tu kawn ah k’täi ne kami hteit ba ci. Zum ciah chang gui cu ami k’chu, ami hta gui ni, ami van naw pigaw k’pung tui kam pei ah khüt ne na tha tu ba gui u sei, tui kam ah kami van m’khuuk doong ne kami taigü ci.

⁶ Cun kawn ah ng’gidam tu u netah, keimi cu htinpaw khan ah kai u ngäh sei ngami cu ami im ah hteit ba ci gui.

⁷ Keimi cu Tire ungka naw Ptolemais pigaw ah gawk u ngäh sei, yum ciah chang gui naw na dou law gui u sei, a cu ah hnüüp ät kami om tuk ci.

⁸ A ngawi ung düi law ne hteit ba u ne, Sisaria ah kami gawk ci. A cu ah Thu Ni pyein ciah Philip ah kami kai ci. Ani cu ang düih püi gui bi bi püi gui khai ah Jerusalem khritahbum naw chang sing chih ami ghü nak ungka tumat ah kya ci.

⁹ Ani ung kä ceimah phak ciah a hta hnumi phli om ci. Ngami cu Khanpughi ah Thu Ni ng’shäu ne pyein ci gui ah kya ci.

¹⁰ Keimi cun ung kami om nak tu a pi pi shou law khäh tah, Akabus ming nak ciah Prophet tumat cu Judea kho ah kaa gawk lawk ci.

¹¹ Ani cu keimi ah om nak ah law ne, Paul ah khei khih nak la ne, akut a khaw cu pin netah, “Shin ah kheikhih nak ka nak ciah chang cu, Jerusalem ah Judah chang gui naw, a shin ah mäih ah khit ne pin u netah, changpakhui hei gui am ap khai gui nei, ci ne Mumcha Theing naw pyein ci nei” cine pyein ci.

¹² Cun cu ng’ya u netah, keimi la ana om ciah chang gui naw Paul cu Jerusalem ah kä ah hteh vai ah kami maa nak ci.

¹³ Cun ung phi Paul naw, “A i ah kyasei nang mi kyap lau u ne, kam lung nami na thüi sei sak ang? Kei cu Bawipa Jesuh ah hmawk ah, Jerusalem ung pha ne khih nak bäng ah kä kaak ciah, sih nak vai ah phi ka ng’düi ge ci nei” cine pyen na gui ci.

¹⁴ Paul cu m’cäi ne kä gah u netah kei mi naw, “Khanpughi ah ang yaak hlü ah kya sä” cine kami om düüt ci.

¹⁵ Kami om tu shäng kawn ah kei mi cu pawng ba u ne, Jerusalem ah kami hteit ba ci.

¹⁶ Sisaria ah kaa yum ciah chang amshah gui cu keimi awn a täng ah law tu u ne, Saiprus ah kaa, yum ciah chang Mnason ah im ah kai vai ah na hteh püi gui ci gui.

Paul Naw James cu Hteit ne Hmuk ci

¹⁷ Keimi cu Jerusalem ah kami gawk law yah ung yum ciah chang gui naw ak ni ah na dou gui ci gui.

¹⁸ A ngawi ung Paul cu keimi awn a täng ah James hmuk khai ah hteit ci, cun yah ung a gham gui cu ana ng’bum ci gui.

¹⁹ Paul naw ngami cu yei ne dou gui netah changpakhui hei gui ah ma ah ani awn Khanpughi naw a bi law ah a mawng gui cu m’thein tu gui ci.

²⁰ Ngami naw Paul ah m’thein tu gui cu ng’ya u netah Khanpughi cu m’hlüngtai ci gui. Cun kawn ah Paul am, “Kami nau Paul aw, Judah chang gui ung kaa, tämkäk phia khak naw Bawipa Jesuh cu yum law u ne, ngami naw thu khän läk vai ah a i hlawk ah ami ng’yaak hlü cu na hmat pyi ah kya ci nei.

²¹ Nang naw changpakhui hei gui ah ng’lung ah om tuk ciah Judah chang gui am, “Nami hta gui vun aat nak kä nami bi peit gui vai, Judah thung kä nami läk vai” cine, Moses ah thukhän ami nawng vai ah nam theithang gui cu ngami naw ng’yak ci gui nei.

²² Tuk bäi nang na law cu k’hläp ah hmat khai gui, a i hawkcha mi bik khai ang?

²³ Cun ah kyasei keimi ah pyein ah bi na bi ung nik khai. Keimi ung thukhän shaitaak bi ciah chang phli om ci.

²⁴ Ngami awn a täng ah hteit u netah a täng ah theingcim nak cu nami bi vai, nami lu nami k’teiu nak ah ang khah cu nang naw na peit vai. Cun ah na bi ung nang ah mawng chang gui ah pyein cu kä hman ciah hmu u ne, na mät naw ma ne, Moses ah thukhän cu na läk ciah chang a van naw hmat khai gui.

²⁵ Bawi Jesuh yum law tuk ciah changpakhui hei ah hmawk läi ah, a gup am ami tu m’bei ah ei auk, si la a gawn ung kheik ne ngawn gui phung kä a mi ei auk vai la ng’yopawm dütdüt gui cu ami hlawi vai ah m’hnüt ne k’bäi u ne, ca guh ne kami pe gui ci nei” cine pyein ci gui.

²⁶ Cun ah kyasei Paul naw a ngawi ung cun ah chang phli cu khü gui netah theingcim nak cu bi püi gui ci. Cun kawn ah ani cu pum im ah hteit ne, theingcim nak a mi bi ang pyi nak vai ah a khin la ami mät phäh phäh naw ap ne ami peit nak vai ah a khin cu ng’daut ne m’thein gui ci.

Pum im ah Paul Ami Pha ah Mawng

²⁷ Ak hnüüp chih nak cu ng’pyi law ghep ghep khä tah Asia kho ah kaa Judah chang amshah gui naw, pum im ah Paul cu hmu u netah, chang gui cu took gui ne, Paul cu ng’lung nah ne phak ci gui.

²⁸ Cun ah pha u netah, “Israel chang gui aw, na bi law püi gui vä, shin ah chang cu kho ng’nü ah hteit ne Israel chang gui ni, Moses ah thukhän pum im ah mawng gui ni cu päipih täitawk ne chang gui am m’theithang gui ci nei. Cun bäng ah kä kya ciah shin ah chang naw changpakhui hei gui cu pum im kyong ah law püi gui ne, ak theingcim nak pi cu shetkat sak ci nei” ci ne m’lau ci gui.

²⁹ (A i ah kya sei cun ah ami pyein ci ung ngami naw Paul cu, Ephesus ah kaa Trophimus awn a täng ah gaw ng’lung ah hmu te u netah, Paul naw pum im kyong ah law püi ciah ngai ne ami pyein ah kya ci.)

³⁰ Pigaw avan thüngkyüng u ne, chang gui avan dawng law u ne Paul cu pha ne pum im ah k’pung ah saw law ba u netah, pum im m’kawt cu ang ghit ah hei khai ci gui.

³¹ Chang gui naw Paul cu ngawn vai ah ami tha nak yah ung, Roman gaakap bawi naw, Jerusalem gawnu avan ung thüngkyüng thüngphyong ci, cicu ng’ya netah,

³² acun vai am gaakap bawi gui la gaakap gui cu khü gui ne, chang gui ah ng’bum nak ah dawng lawk ci gui. Chang gui naw gaakap bawi la gaakap gui cu hmu gui netah Paul cu kä tukhtah ah om ci gui.

³³ Cun yah ung gaakap bawi gawk law ne Paul cu pha sak gui ne, m’si gui k’hnih awn pha ne khih sak gui ci. Cun kawn ah Paul cu a u chang ah a kyak la a i katnak a bi ah ng’shi k’ca gui ci.

³⁴ Cun ah chang gui naw a hei hei ah m’lau ne pyein ci gui. Cun ah m’lau ne k’pamcai u sei, gaakap bawi naw a mawng akcang cu kä hmat hlawt netah, Paul cu a yung ah ami hteh püi vai ah pyein ci.

³⁵ Gaakap bawi ah yung khlaak pei ah ami gawk law yah ung, chang gui naw k’bui law aih u khä tah, gaakap gui naw Paul cu chang ne hteh püi ci gui.

³⁶ Chang khli gui naw a hnu ah läk law u netah, “Shin ah chang cu ngawn vä” cine m’lau ci gui.

Paul naw Amät küi kyan Ne Thu Pyein Ci

³⁷ Gaakap gui naw Paul cu im kyong ah luh law püi vai u khätah, Paul naw gaakap bawi am, “Nang a pi ah ka ning thu püi hlük ci” cine pyein ci. Gaakap bawi naw, “Nang Krik thu ah na ng’thu thei ne ang?

³⁸ Zanhta shäng ung ng’küükneet ne ng’tuk bi khai ah, chang phia phli-kip khah püi ne, bunghmu ah dawng ciah, Egypt chang cu nang ah kä kya ne ang?” cine ng’shik ci.

³⁹ Paul naw, “Kei cu Judah chang ah ka kyak ci, Cilicia kho, Tarsus mang gaw ung ng’tüi ciah gaw ng’liing mang chang ah ka kiak ci. Na bä ni, chang gui ah ma ah ng’thu ka pyein vai ah nam gein nä” cine pyein ci.

⁴⁰ Gaakap bawi naw yum sei, Paul cu khlaak ung ng’düi netah, chang gui ami dingkyiip vai ah a kut awn nüt ci. Chang gui dingkyiip yawp u khätah Paul naw Hebru ng’thu awn: shicha pyein ci.