LAMKTU 20 - Cho Bible Common Language 2016

Macedonia la Achaia Kho ah Hteh Nak

¹ Thüngkyüng thüngphong nak ding law khä tah Paul cu yum ciah ak chang gui m’cäi gui ne k’tha gui pe gui netah Macedonia kho ah hteit ci.

² Ani cu cun ah kho ah yum ciah chang gui cu hteit shüi shüi ne thagui pe gui netah Achaia kho ah hteit ba ci.

³ Ani cu a cu ah chaa thum vai om ci. Cun kawn ah Siria kho ah hteit ba khai a pawng yah ung Judah chang gui naw ng’ge na ne hnim vai ah a mi pawngpüi cu hmat ci. Cun ah kyasei Macedonia kho lam ah ng’hlat ne hteit ba khai ah k’bäi ci.

⁴ Berea ah kaa Pirrhus ah hta Sopater, Thessalonia ah kaa Aristakas la Sekuntus, Derbe ah kaa Kaius, Asia kho ah kaa Tichikus la Trophimus, la Timothi gui cu ani awn ng’gui tuk ci gui.

⁵ Ngami cu ana hteit ma u netah Trosa pigaw ah na ging gui ci gui.

⁶ K’caw kä shum ah m’htut den nak ah pawi ng’pyi khä tah keimi cu Philippi ah kaa htinpaw awn law u ne, hnüüp hma lüng khä tah ngahmi ah om nak Troas ah ka mi gawk law ci. A cu ah hnüüp chih kami om tuk ci.

Troas ah Paul ak Hnu bäih ah A Hteh nak Ba

⁷ Hnüüp chih hnüüp ung keimi cu vunvai ne ei auk vai ah kami ng’bum ci. Paul cu a ngawi ung hteit law ba khai ah kya netah cu mü kho cawih ung khüt sei thu pyein ne m’thei thang gui ci.

⁸ Keimi ah ng’bum nak ah kyong khui ah mei im akda kami m’däi ci.

⁹ Eutikus ming nak ciah ak hmaw chang tumat cu, Paul naw thu a pyein ah ung m’kawt khan ah ngoh ne ngam ci. Ngam ne ip law netah im ah ang dün thum nak kaa kya lawk ci. Chang gui naw ami yu chan tu ba yah ung ani cu si pyi ciah kyak ci.

¹⁰ Cun ung phi Paul cu kyum law ne cun ah chang cu Kaup shi ne kyawp netah, “Kä ng’ä ai vä! ani ghing yah ci nei” cine pyein ci.

¹¹ Paul cu im khan ah hang kai ba netah ang khah püi gui awn a täng ah vunvai ne ei auk ci gui. Ami ei auk awn nah kho thai ghi ghi güt sei ak chang gui awn a täng ah ak shou ng’cecäk u netah cun ah pigaw ungka pawng ne hteit ci.

¹² Ang khah püi gui naw kya ne ghing ba ciah chang cu a im ah ami hteh püi ba kawn ah ami m’lung yu kya ba ci.

Troas ah kaa naw Miletus ah

¹³ Keimi cu ak yang ah ma ne htinpaw awn Assos ah kami na hteit ci Paul cu k’kawng Lam ah hteit netah a cu ah htinpaw ung kium tuk khai kyak ci.

¹⁴ Keimi cu Assos ah Paul awn ng’hmu u netah ani mah ah htinpaw awn Mitilene ah kami hteit ci.

¹⁵ A ngawi ung tui hei ga Chios ah hteit u ne, cun ah ngawi ung Samos tui koi ah kami gawk ci, cun ah ngawi ba ung mä Miletus pigaw ah kami gawk ci.

¹⁶ Paul cu Asia kho ah ak shou kä om hlü netah Ephesus sun pah ne htinpaw awn hteh vai ah k’bäi ci. Ani cu Jerusalem ah Pentekos hnüüp pha vai ah ak yang ah hteit ci.

Ephesus Khrithabum Agham Gui am Paul ah ng’cäi nak shüt Thu

¹⁷ Miletus ah kaa ge naw Paul naw, Ephesus ah Khrithabum a gham gui am, ami hmuh law vai ah ca gu ne pe gui ci.

¹⁸ Ngami gawk law u khätah Paul naw, “Kei cu Asia kho ah ka gawk law hnüüp ung tün ne a i hawkcha ah ka bi lawh cu nang mi naw nami hmat ci.

¹⁹ Kei cu Judah chang gui ah shedam nak awn yaica nak ka gawk yah ung ka ng’phli tui kya law sei phi kam lung neim sak ne, Khanpughi ah changshäm ah kya ne a bi cu kabik ci.

²⁰ Chang khli ah ng’lung ah phi bäi, nami im gui ah phi kyai, ka pyeinsak m’theithang ung, nangmi ah hmawk ah nik khai phung cu kä ka k’pawih na man ci.

²¹ Judah chang gui am phi bäi, changpakhui hei gui am phi bäi, Khanpughi ah ma ah ami katnak ng’yu ba u ne, Bawipa Jesuh cu ami yum vai ah kheing ne ka m’thein gui ci.

²² Tuk bäi Mumcha Theing ah lam shüm nak cu ngai ne Jerusalem ah ka hteit khai. Cä ah a i ah a kyak vai cu kä ka hmat ci.

²³ Kei naw ka hmat cu, a gawnu päng ung Mumcha Theing naw, “Thawng kium nak la yaica nak ung na gawk khai nei” a ci bäng ah kya ci.

²⁴ Kei cu ka hnun gui ah kä ka ng’vang ci, a nam hnüt peit ah bi la, Bawipa Jesuh ah na peit ah bi, pyi ne bi vai cu ak tung ah kia sei, Khanpughi ah m’gein nak mawng Thu Ni cu hteit shüi ne pyein vai bäng ah kya ci.

²⁵ Kei naw hteit shüi shüi ne nami ng’lung ah, Khanpughi ah uk nak kho ah mawng cu ka pyein pyi ci. Cun ung phi nangmi ungka a u phi kei na hmu law ba khai kä om ciah ka hmat ci.

²⁶ Cun ah kyasei nang mi ungka chang tumatmat cu, a di maih ah a kiak ung, kei ah awm ah kä kyak khai ci cu, ak dei dang ah ka ning m’thein gui ci.

²⁷ A i ah kyasei ci ung kei naw nangmi am Khanpughi ah ang yaak hlü cu ka ning m’thein gui pyi ah hmawk ah kya ci.

²⁸ Cun ah kyasei nami mät naw nami mät la, Mumcha Theing naw nami kut ung a ning ap gui ah Htome gui cu nami m’htei vai. Khanpughi ah khritha bum cu htoshäm ah mäih ah nami m’htei vai, Cun cu Athapa naw a ghinnak pe ne a sih nak awn Amät ah kaa ah k’bäi pyi ci.

²⁹ Kei ka hteh ba kawn ah k’hnei sou gui cu nami ng’lung ah law u ne m’ghä m’ce ne ning tuten gui khai gui cicu ka hmat pyi ci.

³⁰ Nami mät ungka chang amshah naw, yum ciah chang gui naw ami läk gui vai ah, hleeihlak ne ami k’tü phlawh nak ah khin gawk law khai nei.

³¹ Cun ah kyasei kei naw nang mi am kho kum thum pum ung amü ak hnüüp, ka ng’phli tui kya law sei, ka ning m’theithang gui cu nami shüm ba khenggeng vai nei.

³² “Tuk bäi kei naw nang mi cu Khanpughi ah kut ung la, am gein nak ah Thu Ni ung ka ning ap gui ci. Cun ah Thu Ni naw, Khanpughi naw ak chang gui ah hmawk ah am hnüt ah, hriham ning pe gui ne ning düih sak gui khai.

³³ Kei naw chang ah ghui, ngui, sui awi kä kam hni ci.

³⁴ Kei naw shin ah kut awn bi bi ne ka chang gui ah sui ei vai la ka mät ah ng’yaak hlü gui, ka küm be sak cu nami van naw nami hmat pyi ci.

³⁵ K’tha nah ne bi law netah ghawipyam ci m’gein tu nak vai ah a mawng avan cu ka ning m’dang gui pyi ci. Bawipa Jesuh naw, “Va dou nak katah hei peit nak cu, yei kiai nak da pi ci” a ci cu nami shüm ba vai nei.

³⁶ Paul cu thu pyein yawp netah ang khah püi gui awn a täng ah m’khuuk doong ne taigü ci gui.

³⁷ Ngami naw Paul cu, kyap ne kyawp ne, ng’uui hnam u ne, gidam ci gui.

³⁸ Paul naw, “Kei cu cän kawn ah kä nami na hmu ba khai” a ciah hmawk ah ang htei ah thüi sei yaica ci gui. Cun kawn ah ngami naw htinpaw ah khüt ne tha tuk ci gui.