LAMKTU 19 - Cho Bible Common Language 2016Ephesus ah Paul a Gawk ah Mawng 1 Apollos cu Korin ung a om yah ung Paul cu a htehthon nak ah kho ung kaa Ephesus ah gawk law ci. Cun ah gawnu ah ang khah püi am shah gui cu hmu gui netah, 2 “Nangmi cu yum ciah nami kyak awn ah Mumcha Theing cu nami gah pyi ne ang?” cine ng’shi gui ci. Ngami naw, “Mumcha Theing a om ah mawng phi kä kami ng’ya tu man ci nei” cik ci gui. 3 Paul naw, “Cun ah a kyak ung nang mi cu a i ah mäih ah tui hnim nak ang nami gah” cine ng’shi ba gui ci. Ngami naw, “Johan ah tui hnin nak kami gak ci nei” cik ci gui. 4 Paul naw, “Johan ah tuihnim cu katnak ungka ng’yu ba ci gui ah hmawk ah kya ci, Johan naw ka hnu ah lawk ciah Bawipa cu nami yum vai cine Judah chang gui am m’thei gui ci. Cun ah Bawi cu Bawipa Jesuh ah kya ci” cine m’thein gui ci. 5 Cun ah thu cu ngai ya u netah ngami cu Bawipa Jesuh ah ming ung tui hnim ci gui. 6 Paul naw ami lu khan ah a kut taih khäh tah Mumcha Theing cu ami khan ah gawk law sei kä hmat ah thu pyein u ne, Khanpughi ah thu phi pyein ci gui. 7 Cun gui ami van cu gha-lei-goi lawk ci gui. 8 Paul cu chaa thum ah kyong ung chagat ah hteit ne chang gui awn ng’cecäk u ne, Khanpughi ah uknak kho a mawng cu chang gui naw hmuhmat ne ami dou vai ah kä kyihkyawk ah m’theithang gui ci. 9 Cun ung phi chang amshah gui cu ami m’lung m’sing sei kä yum u ne, chang khli ah ng’lung ah Bawipa ah lam ah mawng cu pyein m’sheet ci gui. Cun ah kyasei paul naw yum ci gui cu khah püi gui ne, ngami gui cu hteh ta gui netah, Tirannus ah ng’thei im kyong ung ak hnüüp tä sei ng’thu ng’ge püi gui ci. 10 Cun ah kho kum goi ung lüng ne pyein sa ne bilo khä tah, Asia kho ung om ciah Judah chang la changpakhui hei chang avan naw, Khanpughi ah Thu Ni cu ngai ya yawp ci gui. Sheva ah Hta Gui 11 Khanpughi naw Paul awn ang htei ah küikyang ciah cäi aih gui vai cu m’dang ci. 12 Chang gui naw Paul ah bi ah yih la Tampu gui pang cu ak gaw gui la khoshe ah kai gui ah om nak ah, ami hteh püi ah a kyak ung, nat nak gui cu maih ne, chang kai ciah khoshe gui cu dawng ci gui. 13 Hteit shüi shüi ne khoshe k’täm ci gui ah Judah chang am shah gui cun naw phi, Bawipa Jesuh ah ang ming awn khoshe k’täm vai ah k’tha nak ci gui. Ngami naw “Paul ah pyein ah Jesuh ah ming awn nang cu ka ning k’täm ci nei” cine chang kai ciah khoshe cu kyak nak ci gui. 14 Cun ah bik ci gui ah chang gui cu, Judah Taigü tung Sheva ah hta gui chang sing chih ah kya ci. 15 Cun ung phi khoshe naw, “Jesuh cu ka hmat ci, Paul ah mawng phi ka hmat ci, cun ung phi, nang mi cu a u gui ang?” cine ng’shi gui ci. 16 Cun kawn ah ngami cu khoshe ah kai ah chang naw, ak tä ah ng’toh püi gui ne m’khüt gui sei, leimbai u ne, ami suisak phi ng’phyit sei, cun ah im ungka dawng yawp ci gui. 17 Cun ah a mawng cu Ephesus ung om ciah Judah chang gui la Krik chang gui naw ng’ya u netah, ang htei ah kyikyawk u ne, Bawipa Jesuh ah ming cu m’hlüngtai ci gui. 18 Bawipa Jesuh yum ciah chang akda gui cun phi law u ne, ng’you hleip ne ami bilawh kä ani nak cu ah mawng chang gui ah ma ah pyein ne ng’kiaa ci gui. 19 Ng’you hleip te ciah chang gui naw, ami hleip nak ah ca-uk gui cu m’cut ne law püi u netah, chang gui ah ng’lung ah mei awn m’khih ci gui. Cun ah ca-uk gui ah phu cu tän ne khei ung tangka tämkäp hma-kip phu lawk ci. 20 Cun ah kyasei Bawipa ah huham awn ang Thu cu ng’shui ne abi bi nak cu khüi ghaat law pi ci. Ephesus Gawnu ah Ami Thüngphyong Nak 21 Cun gui a kyak kawn ah Paul cu Macedonia la Achaia kho ung kaa naw Jerusalem ah hteit khai ah k’bäi ci. Ani naw, “Cu ah ka hteh kawn ah Rom ah phi ka hteit khai” cine pyein ci. 22 Ani naw ak chang goi, Timothi la Erastus cu Macedonia a ah tüi goi netah, amät cu Asia kho ung ak shou hta om ci. 23 Cun yah ung Ephesus ah Bawipa ah mawnglam ah hmawk ah thüngkyüng thüngphyong nak om ci. 24 Demetrius ming nak ciah nguisheh ciah chang naw Artemis kho ah hnumitha ah a gup cu sheh sei, ak chang gui naw khawh akda gah nak ci gui. 25 Ani naw acun ah ngui sheh ne bi bik ci gui la, acun ah mäih ah a hei bi bik ci gui cu m’cut gui netah, “Paw chang gui aw, shin ah bi mi bi nak awn khawh cham akda mi gah law cu nami hmat ci. 26 Tukbäi nami hmuhmat ah mäih ah Paul naw, chang ah pyan ah a gup gui cu Khanpughi ah kä kya ci nei, cine Ephesus bäng ung ah kä kya ciah Asia kho avan ung changgui m’hleeihlak ne lam hma sak gui ci nei. 27 Mikmi ah bi lawh cu ang ming she ne ng’ä vai ah kya lawk ci. Cun bäng ah kä kya ciah, Asia la khomdek khan van naw a yum ah kho hnumitha Artemis cun phi ng’ä nak vai kya law ne, a hlüngtai nak phi dimaih lawk khai nei” cine pyein ci. 28 Cun ah thu cu ng’ya u netah i baw sheh ciah chang gui cu m’lung k’she u ne, “Ephesus ah khohnumitna Artemis cu hlüngtai ci nei” cine m’lau ci gui. 29 Gawnu avan pülüük ne thüngkyüng u ne, chang gui naw Paul ah ng’gui püi goi, Macedonia ah kaa, Kaius la Aristakas cu pha goi u ne gaw ng’lung im nu ah hteh püi goi ci gui. 30 Paul naw cun ah chang gui cu amät naw hmu gui hlük ci, cun ung phi yum ciah ak chang gui naw maa nak ci gui. 31 Huham om ciah a teih püi chang gui cun naw phi, gaw ng’lung imnu kyong ah kä a hteh vai ah, Paul cu chang tüi ne m’cäi ci gui. 32 Cun yah ung chang khli cu ng’bum law u ne, amshah a hei, amshah a hnga ah m’lau ci gui, a i ah kyasei ci ung cun ah chang gui akda pi naw ami ng’bum law ah mawng cu kä hmat ci gui. 33 Judah chang gui naw Alexander cu k’hma ne hteh sak u khätah, shin ah a mawng cu ani ah awm ah chang amshah naw mgai ci gui. Alexander naw chang gui ak ding ah ami om vai ah a kut awn nüt gui ne, a mawng ama m’thein gui khai ah k’tha nak ci. 34 Cun ung phi ani cu Judah chang ah kya ciah hmat u netah, “Ephesus ah kho hnumitha Artemis cu hlüngtai ci nei” cine nayi hnih vai ung a täng ah m’lau ci gui. 35 Ak hnu ah gawnu ca k’gu naw chang gui cu ak ding ah om sak gui netah, “Ephesus chang gui aw, Ephesus gawnu cu hlüngtai ciah Artemis mang gaw, la khankaw ah kaa kya lawk ciah lung theing gup ah hmun ah kyak ci, ci cu, chang van naw hmat ci nei. 36 Cun cu u chang naw kä küi hlawt khai nei. Cun ah kyasei m’lung ah phu düüt ah i kä bi ne, ak ding gei ah om vä. 37 Nang mi naw shin goi cu pha ne nami law püi goi ci, cun ung phi ngahni cu mi pum im kyong ah lut ne kä m’gu m’gheim ci goi, mi kho hnumi phi sawngkhei ne kä ng’thu ci goi. 38 Cun ah kyasei Demetrius la a paw gui naw chang tumat cu yung ah ami chaak hlü ung, yung bawi gui la yung ami hmawn nak ah hnüüp gui om ci kyasei, chah hning ci gui nei. 39 Cun ung phi nangmi ung nami pyein vai ah a mawng a hei a om ah a kiak ung, tuungpa ci gui naw ng’ge nah ne m’hnüt k’bäi vai kyak khai nei. 40 Tuk ngawi thüngkyüng thüngphyong nak shi, mikmi am nam suh gui hning ci gui nei. Shin ah thüngkyüng nak vai ah a mawng i kä om ci, thüngkyüng nak ah mawng ami nam dang sak gui ung kä mi m’dang hlawt khai nei” cine pyein ci. 41 Cun ah thu pyein netah gawnu ca k’gu naw, chang gui cu tüi ba gui ci. |
Cho Bible Common Language © Bible Society of Myanmar, 2016.
Bible Society of Myanmar