KOLOSE 4 - Cho Bible Common Language 2016

¹ Bawi gui aw, nami changshäm gui cu nami täkphan nak ung hmai kiang nak la düng nak om sä. Nami mät phi khankho ah nami Bawi a om cu nami shüm ba vai nei.

M’cümhnah Nak

² Taigü nak ung kä nami m’lung-k’si en vai. Lunglang nak awn taigü ne Khanpughi cu nami m’hlüngtai vai.

³ Keimi ah hmawk ah phi nami taigü vai. Cun ung Khanpughi naw keimi-am a khin k’ni cu na pe gui sei, keimi naw ng’yih ciah Bawi Khrit ah mawng, ng’Thu Ni cu kami shui khai. Acun ah hmawk ah kei cu tuhbäi chü thawng ung ka kium ci nei.

⁴ Na k’taigü pe vä, cun ung ka pyein vai ah ng’thu phung cu ang hteiing ah ka pyein hning khai nei.

⁵ Kä yum ci gui ah chang gui ah ng’lung ah nami hnünthawh ung nami cüivai lunglang vai nei. Akhin nami gah phung cu aknipi ah nami mang thei vai nei.

⁶ Nami ng’thu pyein phung cu yeikyai nak vai la ngaih hlü vai ah kia sä. Chang nüng ah ng’thu a i chaa ah ng’düng khai ah m’hlan ba thei vai cicu nami hmat kheng geng vai nei.

Akhnu ah Yavaih nak

⁷ Mi nau Tichikus, bekhüt ciah khuut bi, khüghaat ciah Bawipa ah changshäm naw, kei ah mawng avan cu ning m’thein gui khai nei.

⁸ Ani nang mi ah om nak ah ka tüih law cu, keimi a i hawkcha ah kami om ih ah mawng ning m’thein gui ne, a ning thawhlet sak gui vai ah hmawk ah kyak ci nei.

⁹ Ani awn a täng ah bä ne bekhüt ciah mi nau nami chang Onesimus phi law tuk ci nei. Ngami naw, shi ah a i i ah a kyak ah mawng gui cu ning m’thein gui khai gui nei.

¹⁰ Kei awn a täng ah thawng kani kium ciah Aristakas la Barnabas ah ang nam nau Makuh ni naw phi ning yavaih na gui ci gui nei. (Makuh cu nangmi ah a law ung nami na dou vai ah ning m’cäi gui pyi ah kyak ci nei.)

¹¹ Justus ami ciah Joshua naw phi ning yavaih na gui ci nei. Acun ah ng’thu gui cu yum ciah Jew chang gui ah kya u ne, Khanpughi ah uknak kho ah hmawk ah kei awn a täng ah bi bi u ne, kei cu aktung ah nam hteihtang ci gui nei.

¹² Bawi Khrit Jesuh ah akchang shäm, nami chang ah kyak ciah Epaphras naw phi ning yavaih na gui ci nei. Khäng sei nami ng’düih vai, kä nami püngheiu vai, be ciah khritha ah nami kiak vai, Khanpughi ah ng’yak hlü küm khai ah ang thu nami ngaih vai ah, ani naw akni ah ning taigü pe gui ci nei.

¹³ Nangmi ah hmawk la Laodicae la Hierapolis ah chang gui ah hmawk ah k’thana ne abi ah mawng cu ng’kheing sei ka ning m’thein gui hning ci nei.

¹⁴ Luka, mi seibawi la Demas naw phi ning yavaih na gui ci nei.

¹⁵ Laodicea kho ah phäi nau gui la Nimpha la ani ah im ah pum ci gui ah khrithabum gui-am yeikyai nak thu ka ning m’khäh gui ci nei.

¹⁶ Shin ah ca nami phat yawp kawn ah Laodicea khithabum gui-am phi nami phat tu sak gui vai nei. Cun bäng ah kä kyak ciah Laodicea kho ah phäi nau gui naw, ami ning guk law gui ah ca phi nami phat vai om khai nei.

¹⁷ Cun kawn ah “Bawipa ah khuut nami bi cu pyi hlah ne nami bi vai nei” cine Archippus-am nami m’thein vai nei.

¹⁸ “Paul ah yavaih nak” ciah shin ah ca cu ka mät ah kut kheng awn ka guk nei. M’si gui awn ami na khih nak cu kä nami m’hnih-en vai nei. Khanpughi ah m’gein nak cu nami khan ah om sä, Amen.