KOLOSE 3 - Cho Bible Common Language 2016

¹ Nangmi cu Bawi Khrit awn nami ghing khai ah nami tho pyi ci, Cun ah kyasei, nami m’lung cu khankho ding ung nami ng’lin vai. Cun ah kho cu Bawi Khrit naw a ghui mangkiang ung a ngoh nak ah Khanpughi ah k’patlam ah kyak ci.

² Khankho ding ung nami m’lung cu nami ng’müi sak vai, khomdek ng’lei ung kä nami ng’müi sak vai.

³ Nangmi nami sih ung nami hnun gui cu Bawi Khrit awn Khanpughi ung ng’thup ciah kyak ci.

⁴ Akcang ah nami ghin nak cu Bawi Khrit ah kyak ci nei, ani ang dang law ba ung ani awn a täng ah nami dang tu ba khai, abäkhäk nak phi nami gah tuk khai.

Ghin nak K’phyim La Ghin Nak Thai

⁵ Nangmi naw sihnak ung nami ap vai cu, nami m’lung kyong ung bi bik ciah khomdek khan ng’yak hlü nak gui ah kyak ciah, ng’yawng’pawm nak, om shet nak, htukhtik nak, cheishoh nak, humhlam nak (Humhlam nak cu a gup khawihnah nak ah kyak ci.)

⁶ A shin ah a mawng gui awn Khanpughi ah m’lung she nak cu, thukhän ng’yak ciah chang gui ah khan ah gawk lawk khai.

⁷ Ayan nangmi cu ashin ah ng’yak hlü gui awn nami ghing om man ci. Cun yah ung nami ghin nak cu acun gui naw ning shum gui ci.

⁸ Tuhbäi nangmi naw m’lungshe nak, beishet nak la thüigen nak ah amawng gui cu avan nami phiawn nak vai. Ashekha la amsheshai cu nami m’gawng m’lei ung kä lut-en law sä.

⁹ Tumat naw tumat kä am hleeihlak-en vai, nami ghin nak k’phyim cu sut ne nawng shüt ne,

¹⁰ ghin nak akthai awn nami ng’thoon vai. Cun cu akthai ah ghin nak la, tüisho ciah Khanpughi naw, kümbe ciah amät ah lunglang nak ning m’shum phyuk gui ne a mät ah müi bä bä ah a ning pyan ba thai gui ah kyak ci.

¹¹ Ak hnu ah chang khui hei la Jew chang, kyon la kä kyon, ngetngawng ci la m’ghämce ci, changshäm la ng’päiye chang ciah khoikhei nak la ng’lakmah nak kä om ba ci, Bawi Khrit cu avan ah kia ne Bawi Khrit cu avan ung om ci.

¹² Nangmi cu Khanpughi ah chang ah nami kyak ci, Khanpughi naw ning m’hni gui ne amät ah chang ah ning ghü gui ci. Cun ah kya sei nami ng’thon nak vai cu m’hteihtang nak, chimgein nak, mät hnga ngaih nak, hniphnoi nak la hniimgei nak ah kyak ci.

¹³ Tumat mat awn nami ng’cuh vai a om law ah a kyak ung phi tumat la tumat nami ng’cang nak tu vai, tumat la tumat nami ng’gein tu vai, Bawipa naw a ning m’gein gui ah mäih ah tumat la tumat nami ng’gein tu vai.

¹⁴ Shin ah ang baan gui avan cu m’hni nak ung phung ci, cun ah m’hni nak naw avan shum ne kümbe kawng ät sak ci.

¹⁵ Bawi Khrit ah ning peit gui ah ding gei nak cu, nami ng’ki ng’phian nak ung a ning m’shumhlawi nak gui ah kyak ci. Cun ah ding gei nak cu kawng ät ne pumsa tumat ah nami kyak vai ah Khanpughi naw a ning khü nak gui ah kyak ci. Cun ah kyasei nami m’hlüngtai lä vai nei.

¹⁶ Apäng ah bämang pi k’bäih ciah Bawi Khrit ah ng’thu cu nami m’lung kyong ung khäng ne om sä. Cüivai lunglang nak avan nawn tumat naw tumat cu m’theithang m’cäi ä sei om vä. Nik ciah ng’äi gui, hlim ciah ng’äi gui, theing ciah ng’äi gui m’cu ne, nami m’lung kyong kui ne, Khanpughi cu m’hlüngtai vä.

¹⁷ Nami bi nüng nami ng’thu nüng cu Bawipa Jesuh ah ming awn nami bi vai, Cun cu ani ah ming awn Pa Khanpughi nami m’hlüngtai ah kia ci.

Khritha Kyongkhui Ghin nak Thai

¹⁸ Hnumi gui aw, nami cei ah ng’thu nami ngaih vai nei, cun cu khritha ah nami kyak nak awn nami bi vai ah kyak ci,

¹⁹ Pami guiaw, nami chu nami m’hni vai, kä nami shedam nak vai,

²⁰ Hta hmaw gui aw, nami nupa ah ng’thu nami ngaih vai, cun cu khritha ah nami kyak nak awn nami bi vai ah kyak ci. Cun cu Khanpughi naw a yei nak ah kyak ci.

²¹ Nupa gui nami hta gui cu, ami m’lung thüi ne, ami k’tha maih khai ah kä nami om püi-en gui vai.

²² Changshäm gui aw, hnicim chang nami bawi cu, a päng avan ung nami ngaih vai nei, a ning täk gui la a ning m’cäi gui ah nami kyak bäng ah kä kyasei, Bawipa nami kyih aa nak awn m’lung theing awn nami hnünthawh peit vai.

²³ Nami bi phung phung cu chang ah bi bi ah mäih ah kä kyak ciah Bawipa ah bi bi ah mäih ah nami m’lung kyong avan awn nami bi vai.

²⁴ Nami shüm vai cu Bawipa naw akchang gui-am a gim peit gui ah m’cümhnah nak cu nangmi am ning pe gui khai nei, ciah kyak ci. Akhuut nami bi peit ah Bawipa akcang cu Bawi Khrit ah kyak ci nei.

²⁵ Shetkat nak bik ciah chang phung naw, amät ah bi cu k’chaw nak khai nei. A i ah kyasei ci ung Khanpughi naw akchang sing cu amät ah bi phäh phäh awn m’khoichak ci nei.