KOLOSE 2 - Cho Bible Common Language 2016

¹ Nangmi ah hmawk, Laodica chang gui ah hmawk la kei ka changsing kä na hmat ciah chang gui ah hmawk ah, kei naw a i hlawk ah k’tha na ne kabi cu ka ning m’thein gui ci nei.

² Kei naw shin ka bi cu, ngami ami k’tha abe nak vai la m’hni nak ung ami m’lung ngaih a ät nak vai ah kyak ci. Cun ah kyasei ngami cu akcang ah lunglang nak law püi ciah bümbe ciah ngaih gep nak cu gah ci gui. Ashin ah lam awn ngami naw Khanpughi naw am yih ah Bawi Khrit amät cu hmat ci gui.

³ Ani cu thup ne m’küm ah Khanpughi ah cüivai nak la lunglang nak avan k’hmawn nak ah kyak ci.

⁴ Kei naw ka ning m’thein gui cu hleei pyein ne a u naw a i kä ning ng’cuh-en püi gui sä. Ngami naw a i hlawk ah nik ciah ami pyein ung phi kä nik khai nei.

⁵ Ka pumsa awn a täng ah kä mi om pang ung phi, ka Mumcha awn atäng ah ka ning om püi gui ci nei. Bawi Khrit ung nami yum nak awn ng’düi ghawm u ne, khäng ne nami htek cu ning hmu gui ne ka yei ci nei.

Bawi Khrit ung Kümbe Ciah Ghin nak

⁶ Khrit Jesuh cu Bawipa nei, cine nami dou ah a kyak ung ani awn kawng ät ne nami ghin vai.

⁷ Ani ung ak thuuk ah nami ng’yung vai. Ani ung nami ghin nak nami m’shün vai. Ning m’theithang gui ah mäih ah nami yum nak cu a khüighaat law pi vai. Cun kawn ah m’hlüngtai nak awn nami be vai.

⁸ Geing na vä, Bawi Khrit ungka ah kä kyak ci, khophlüt sei uk ciah Mumcha gui la, chang naw dou ne am theithang nak ung lawk ciah chang läma, gui ah cüivai nak awn, a u chang naw phi kä ning khlei-htein-en nah gui sä.

⁹ Khanpughi ah ang yung a mawng akümbe nak cu, Bawi Khrit ung om ne dang ci nei.

¹⁰ Mumcha uknak la huhamah nak avan cu uk ciah acun ah Bawi ung nami om nak awn nangmi cu kümbe nak nami gah ci.

¹¹ Bawi Khrit ung nami kawng ät nak awn nangmi cu kyoon hnah pyi ah nami kyak ci, cun cu chang ah kyoon ah kä kyak ci. Bawi Khrit ah kyoon ah kyak ci. Cun cu cheishoh nak ah, hlüngtai nak ung kaa phiawn nak ah phi kya tuk ci.

¹² Tui nami ng’hniim cu Bawi Khrit awn nami ng’ciim nak ah kyak ci. Tui nami ng’hniim nak ung Bawi Khrit awn nami tho ba ciah kiak ci. Cun cu ani sih nak ungka thawh ba sak ciah Khanpughi ah tholet ciah hlüngtai nak nami yum nak awn ah kyak ci.

¹³ Nangmi cu ayan, thukhän kä om ciah chang khui hei la cheishoh ciah chang ah nami kyak nak awn nami mümcha cu si te ci. Cun ung phi tuhbäi Khanpughi naw nangmi cu Bawi Khrit awn nami ghing khai ah ning khü ba gui ci nei. Khanpughi naw mi kat nak gui avan cu, nam gein gui pyi ci nei.

¹⁴ Ani naw, thüilü nak vai ah ng’taang ciah mi puu gui cu, am küm nak ah kutlamtung ung asih nak awn thung pyi ci.

¹⁵ Acun ah kutlamtung khan ah Bawi Khrit naw amät cu, Mumcha uknak ah hlüngtai nak la huham nak gui ungka phiawn sak ci.

¹⁶ Cun ah kyasei, ei awk nak ah mawng, hnüüp theing ah mawng, chaa lum la kyin nak ah mawng gui pyein ne, a u am phi thukhän kä bi-en sak vä.

¹⁷ Cun gui avan cu ngawi ah kaa vai ah apüpüüi gui düt ah kyak ci. Cun ung phi akcang cu Bawi Khrit ah kyak ci.

¹⁸ Khankho chang khawihnah u ne, chang k’ni ah ng’hlawk u ne, ami mik hmuh ah phäh ah aktung ah hlüngtai ciah ng’shei ci gui ah, m’kat nak cu kä nami yuun en vai nei. Amawng hei kä om ci, chang tumat cu khomdek chang ah mawng lam ang ngaih-tüh nak awn, am lung kyong cu mei ah khu yawp ci.

¹⁹ Pumsa ah lukhu ah kyak ciah Bawi Khrit akpan cu, chah ne ng’hlah tak ciah kyak ci. Bawi Khrit ah kut shum nak ah kyong ung pumsa cu ng’ghotai ne, thagui khingthang awn ng’khihkaih kawng ät yawp ci: Cun cu Khanpughi naw adäm ng’gho vai ang yak hlü ah mäih ah däm ng’gho lawk ci.

Bawi Khrit awn Sihnak La Ghin nak

²⁰ Nangmi cu Bawi Khrit ung nami sih nak awn kho ak kaa ah om ciah mumcha ah uknak ungka nami phyawng pyi ci nei. A i ah kya sei khomdek khan cu khäm ne nami om ba hlü ang? A i ah kyasei,

²¹ “Shin kä pan vai, cän kä nüm vai, shin kä tawn vai” ciah thukhän gui cu nami läk ba hlü ang?

²² Ayan nami mang man te gui cu tuhbäi mang ba vai ah kä kya ba ci nei. Cun gui cu chang ah pyan ah thukhän la m’theithang nak gui ah kyak ci.

²³ Akcang ah pyein ung cun gui cu, khankho chang düt nami khawihnah nak ah cüivai nak ung ng’yung ne dang lawk ciah kyak ci. Chang ah ng’yak hlü ah thuvi nak, pumsa ah m’hni kümbe sak nak, gui ah kyak ci. Cun ung phi cun gui naw, pumsa mawngma ami kut shum nak ung akcang ah aphuma kä dang ci.