KHEI NAK 9 - Cho Bible Common Language 2016

Ak Hnih Vei nak Phyawn nak Pawi

¹ Israel chang gui naw Egypt khaw ami hteh tak nak ah a kum goi nak, a cha ät nak ung Sinai Bung ah Bawipa naw Moses cu pyen nak ci. Ani naw,

^2-3 “A shin ah cha a hnüüp gha lei phli hnüüp Hni avang kyak ung tün ne, Israel chang gui naw phyawn nak pawi cu amät ah thung man la thungyo awn ng’müi khai ah ami bäi nak vai ah kyak ci.”

⁴ Cun ah kyasei Moses naw chang gui cu phyawn nak pawi ami bi nak cu m’thein gui ci.

⁵ A cha ät nak ah a hnüüp gha lei phli hnüüp mühun täng ah, Sinai Bung ung ngami naw a cun ah bik ci gui. Bawipa naw Moses ang thumkhän ah mäih ah chang gui naw bik ci gui.

⁶ Cun ung phi gook tawn u ne kä theingthap ciah chang amshah om ci gui. Ngami cu cun ah hnüüp ung phyawn nak pawi bi tu vai ah kä khin ci gui. Ngami naw Moses la Aaron ah hteit u neta,

⁷ ami pyen cu, “Keimi cu gook kami tawn ci kya ne, kä kami theingthap ci, cun ung phi, a i ah kyasei keimi cu k’pawih ba ciah Israel gui awn a täng ah Bawipa am douthak nak ungka, nami na nawng gui vai ang?”

⁸ Moses naw, “Bawipa ah m’shüm then nak kä ka gah pha ah chuih na ngai cang vä” cik ci.

⁹ Bawipa naw Moses am

¹⁰ Israel chang gui a pyen nak gui vai a pyen nak cu, “Nangmi ungka, käcung nami htangshon naw gook a tawn ah a kyak ung, kä cung lam k’hla ah a hteh ah a kyak ung, ani cu phyawn nak pawi bi hlü täng khai,

¹¹ Cun cu cha ät a lüng kawn ah nami bi ba hning ci, ciah ning m’thein gui nei. Cun cu a cha goi nak a hnüüp gha lei phli hnüüp mühun täng ah nami bi vai. K’caw kä shum ah m’htut la an ak kha awn nami bi vai.

¹² A ngawi ung khaw ngawi güt ei a pi phi kä nami pawih nak vai. Seime ah guh a pi phi kä nami hnet sak vai. Phyawn nak pawi cu thungyo avan awn müi khai ah nami bi vai.

¹³ Cun ung phi a u chang phi theingthap ne, lam ak shou kä theit ne om lang ne, phyawn nak pawi kä bi tuk ciah chang cu, kei ah ka chang ah kä kya tuba khai. A i ah kyasei ci ung ani naw k’äi nak ah a khin ung douthak nak kä na pek law ah hmawk ah kyak ci. Ani naw a katnak ah mawngma phung cu avan ma nak khai.

¹⁴ “Nami ng’lung ah om tuk ciah a khaw hei chang naw phyawn nak pawi abi tu hlü ah a kyak ung, thungman la thungyo gui avan awn ng’müi khai ah abi tu vai. Acun ah thukhän bä naw khawmah chang phi, khaw hei chang phi, chang päng cu k’pang khai.”

Mei ah Mäih Ng’mei

^15-16 Bawipa ah om nak ah Phung ami m’düih ah hnüüp ung khaw ng’mei gawk law ne küm lawk ci. Khawmü ah khaw ng’mei cu mei ah mäih ah kyak ci.

¹⁷ Khaw ng’mei ang liim ba ah a kyak ung Israel chang gui naw ami shaum pigaw phye u ne, khaw ng’mei ah hteh nak ah hmun ung ami shaum pigaw cu co ba ci gui.

¹⁸ Chang gui naw Bawipa ah thumkhän ah mäih ah shaum pigaw cu phye u ne, Bawipa ah thumkhän ah mäih ah shaum pigaw cu co ci gui. Phung ah khan ah khawng mei a om ah chuih ngami cu cun ah shaum pigaw ung om ci gui.

¹⁹ Phung ah khan ah khaw ng’mei akshou a om ah a kyak ung, ngami cu Bawipa ng’ngai ci gui. Kä ng’nawn heng ci gui.

²⁰ A hnü ät Phung ah khan ah khaw ng’mei khaw hnüüp api hta ung a om ah a kyak ung, Bawipa ah thumkhän ngai u ne, shaum pigaw ung om ci gui, kä cun ung hteit ci gui.

²¹ A hnü ät ung khaw ng’mei cu mühun ung tün ne a ngawi ung khaw ngawi güt bäng om ci. Ngami cu khaw ng’mei ang liim nak ah hteit tuk ci gui. A hawi ah phi khawng mei ang liim nak päng ah ngami cu hteit tuk ci gui.

²² Hnüüp goi, cha ät, kum ät, cun ah shou pi khai ah a shou ung phi Phung ah khan ah khaw ng’mei a om ah chuih kä ng’nawn ci gui. Cun ung phi khaw ng’mei ang liim ung ngami cu hteit ci gui.

²³ Bawipa naw Moses am thumkhän a pek cu ngai u neta shaum pigaw cu co u ne, shaum pigaw cu phye u ne kyak ci gui.