KHEI NAK 8 - Cho Bible Common Language 2016

Mei Im Chih

¹ Bawipa naw Moses a pyen nak cu,

² “Aaron am na m’thein vai, ani naw mei im chih cu mei im k’tung ung am hmoh law ung, a tha thei vai nei. Cun ung mei cu hmai lam ah khang khai.”

³ Aaron naw cun ah thu ngai ne, mei im tung ah hmai lam ah mei im gui cu hmoh ci.

⁴ Bawipa naw Moses am, am hnuh ah mäih ah mei im tung cu a pam ah ka naw ang lung ung khüt khai ah ghui akni awn pyan ah kyak ci.

Levit gui ah Ng’gängsei nak la Ami Ng’ap nak

⁵ Bawipa naw Moses am pyen nak ci,

⁶ “Israel chang gui ungka Levit gui cu na khei gui vai, na gäsei gui vai.

⁷ Ak ka ungka ah mäih ah gäsei nak ah nak peh gui vai. Ami pumsa avan ung amu ami teiu vai, ami suisak ami m’su vai ah namthein gui vai. Cun kawn ah ngami cu theingthap khai gui.

⁸ Cun kawn ah ngami naw sei hta tumat la hlü ciah htang douthak vai ah oliv situi awn k’caw ah m’htut den cu ami hteh püi vai. Cun kawn ah katphyawn douthak nak vai ah sei hta nami hteh püi vai.

⁹ Cun kawn ah Israel chang khli avan cu ng’bum sak gui neta, kei ah omnak ah Phung ah ma ah Levit gui cu nami düih sak gui vai.

¹⁰ Levit gui ah ami lu khan ah Israel gui naw ami kut ami taih vai.

¹¹ Cun kawn ah Aaron naw Levit gui cu, Israel chang gui ungka la gui ne, aktung ah m’cümhnah nak ah kei ung ana ap vai. Cun ah kyasei ngami naw kei ah bii bik khai gui.

¹² Levit gui naw sei hta gui ah lu khan ah ami kut ami taih vai, Tumat cu kat phyawn douthaknak ah a hei tumat cu m’khih ne douthak nak ah douthak vai. Cun cu Levit gui ah hmawk ah ng’gängsei nak bi ah kyak ci.

¹³ “Levit gui cu aktung ah m’cümhnah nak ah kei ung nami ng’ap vai. Aaron la a hta gui cu tängpang khai gui.

¹⁴ Acun ah Levit gui cu Israel gui ungka nami m’tai gui vai. Cun ah kyasei ngami cu kei ah chang ah kyak khai gui.

¹⁵ Nang naw Levit gui cu ng’gängsei sak gui ne na ap gui kawn ah ngami cu Phung ung bii bi hning khai gui ah kyak ci.

¹⁶ Kei naw ngami ami van cu Israel chang gui ka hta htük gui ah ka k’bäi gui ci. Ngami cu kei bäng naw ka khäm gui ci,

¹⁷ Kei naw Egypt khaw ah ami hta htük gui avan ka ngawn yah ung, Israel kyong päng ung ami hta ng’vaipi gui la ami seime gui ah hta htük gui cu kei naw ka kaa ah ka khäm ci.

¹⁸ Kei naw tuhbäi Israel gui ah ami hta htük gui avan ah hnün ung Levit gui cu ka la gui ci.

¹⁹ Kei naw Levit gui cu Aaron la a hta gui awn ka ap gui ci. Cun cu Israel gui ungka m’cümhnah nak ah kyak ci. Ngami naw Phung ung Israel gui ah hmawk ah bii bik khai gui. Cun kawn ah Israel gui Atheingcim Hmun ung ami ng’et law aih ung nat sak gui khai ah leigai ung phi shungvong gui khai.

²⁰ Cun ah kyasei Bawipa naw Moses am ang thumkhän ah mäih ah Moses ni, Aaron ni Israel chang avan naw Levit gui cu ap gui ci gui.

²¹ Levit gui cu ami mät naw ami mät ng’gängsei ci gui, ami sui m’su ci gui, cun kawn ah aktung ah m’cümhnah nak ah Aaron nawBawipa am ap gui ci. Ani naw ami ng’gängsei nak vai phi bi pe gui ci.

²² Levit gui ah mawng Bawipa naw Moses am ang thumkhän phung cu chang gui naw bik ci gui. Cun ah kyasei Levit gui cu Phung kyong ah Aaron ah hta gui ah aka ung bii bik khai gui ah kya lawk ci.

²³ Bawipa naw Moses am a pyen nak cu,

²⁴ “A khokum m’ku lei hma lawk ciah Levit phung naw kei ah om nak ah Phung ung abi vai cu bik khai.

²⁵ A khokum hmakip lawk ci phung cu ng’düm khai.

²⁶ Cun kawn ah ani naw a Levit paw gui cu Phung kyong ah bii ami bi nak ung bi püi gui khai. Cun ung amät naw a i phi kä bik khai. Shin cu Levit gui ah ami lawh vai ah mawng thungyo nami pyan thei nak vai ah kyak ci.”