KHEI NAK 7 - Cho Bible Common Language 2016

Ang Vaihta gui ah Douthak nak

¹ Moses naw Bawipa ah om nak ah Phung co ne, a pyi hnüüp ung Phung la acun ung khawhcham avan, sonkiang la acun ung khawhcham avan cu ani naw phyuhtheh ne ap ci.

² Cun kawn ah pahta bawi gui, Israel pakhui ung ami ng’vaihta gui, acun gui ng’khei nak ung tängpang ci gui naw,

³ ami douthak gui cu Bawipa ah law püi ci gui, yatha chuk la vantang gha lei goi, ang vaihta hnih naw yatha tumat la ang vaihta tumat naw vantang tumat ci. Ngami naw cun gui ami peik awn ah,

⁴ Bawipa naw Moses cu pyen nak ci,

⁵ “Shin ah Phung ung bilawh pyi phleh nak vai ah shin ah m’cümhnah gui cu dou ä. Ngami naw ami bi vai ah bilawh ah ang läk ah Levit gui am pe gui ä.”

⁶ Cun ah kyasei Moses naw yatha gui la vantang gui cu Levit gui am pe gui ci.

⁷ Ani naw yatha hnih la vantang phli cu Kershonit gui am,

⁸ Yatha phli la vantang cheit cu Merarit gui am, pe gui ci. Ami bi gui avan cu Aaron ah hta Ithamar ah khawngmang nak ah ka ung ami bi vai.

⁹ Cun ung phi Moses naw Kohathit gui am yatha la vantang cu kä pe gui ci. A i ah kyasei ci ung ngami naw ami m’htei ah theingcim ci gui cu, ngami naw ami phleing ung kawt ci gui ah kyak ci.

¹⁰ Sonkiang ap nak ung pawi bi nak vai ah douthak nak gui cu ang vaihta gui naw law püi ci gui. Ngami naw ami m’cümhnah nak gui pek ge vai ah sonkiang kung ung om u khäta,

¹¹ Bawipa naw Moses am a pyen nak cu, “Nam thein gui vai nei, a hnüüp tä sei a khin päng ung hnü ät ci, hnüüp gha lei goi ung, angvai hta tumat naw hnü ät ci, am cümhnah nak cu sonkiang ap nak ah a peik vai.”

^12-83 Ngami naw ami douthak nak cu ak ka ung guk ah mäih ah guk ci gui: Hnüüp Pakhui Angvai hta Hnüüp ät Judah Nashon, Amminadab ah hta Hnüüp goi Issakha Nethanela, Zuar ah hta Hnüüp thum Zebulun Eliab, Helon ah hta Hnüüp phli Reuben Elizur, Shedeur ah hta Hnüüp hma Simeon Shelumiela, Zurishaddai ah hta Hnüüp chuk Kad Elisaph, Deuela ah hta Hnüüp chih Ephraim Elishama, Ammihud ah hta Hnüüp cheit Manasseh Kamaliela, Pedazur ah hta Hnüüp kaw Benjamin Abidan, Kideoni ah hta Hnüüp gha Dan Ahiezer, Ammishaddai ah hta Hnüüp gha lei ät Asher Pakiela, Ochran ah hta Hnüüp gha lei goi Naphtali Ahira, Enan ah hta Tumat ci naw ami law püi ah douthak nak gui cu tängtäng ci gui. Aktung ah m’hnüt bäi nak ung khawk hmakip yuk ciah ngui am tumat, khawk thumkip yuk ciah ngui khawk tumat, ani nik hnih cu htang douthak nak vai ah si tui awn k’caw ah m’htut den awn be khai. Tui ng’ui awn be ciah khawk ak phli ah yu nak ah ghui eibei tumat, seihta tumat, htome tumat la kum ät lüng ciah htome hta tumat, hmuhchum douthak nak vai ah sei hta hnih, htome hma, me hma la kum ät lüng ciah htome hta hma.

Hnüüp Pakhui Angvai hta

^84-88 Ang vai hta gha lei goi naw sonkiang ung ap ne douthak vai ah ami law püi avan ah ng’dawn cu; — ngui k’am gha lei goi, ngui khap gha lei goi cu ang dawn ah khap chuk kip lawk ci. — ghui eibei gha lei goi cu ang dawn ah khawk chukkip lawk ci. — sei hta gha lei goi, htome gha lei goi, kum ät ci lüng ciah htome gha lei goi, cun gui cu m’khih ne douthak vai ah kyak ci. Htang douthak nak awn a täng ah douthak gui vai. — me gha lei goi, katphyawn douthak nak vai. — Hmuhchum douthak nak vai ah sei hta m’ku lei phli, htome chuk kip, me chuk kip, kum ät lüng ciah htome hta chuk kip.

⁸⁹ Moses cu Bawipa ng’thu püi khai ah Phung ah kyong a hlut neta, thumkhän m’küm ah a khüm ah khan, Cherubim hnih goi ah ng’lak ung, om neta, Bawipa naw ng’thu a pyen cu cun ng’yak ci.