KHEI NAK 6 - Cho Bible Common Language 2016

Nazirit gui ah Phäh ah Thum

¹ Bawipa naw Moses am thumkhän ci,

² Cun cu Israel chang gui am a pek gui vai ah m’shüm then nak gui ah kyak ci. Pami phi, hnumi phi, Nazirit ah a kyak law vai ah aktung ah shaitak nak bik ci la amät naw amät Bawipa am ap ci naw,

³ sapyit tui la yu cu a hlawi vai. Ani naw suing thein awn pyan ah awk man phung cu kä a awk vai, sapyit theih ak ket ak ching a i phi kä a ei vai.

⁴ Ani cu nazirit ah a kyak ah chuih sapyit tui ungka pyang phung ci kä ei awk vai, sapyit ah a ui, a phaw phi kä a ei vai.

⁵ Ani cu nazirit shaitak ah ka ung a om ah chuih alu kä a ah vai. Kä ak teiu vai. Ani cu a khin akbe ah Bawipa ung ang ap nak ah shaitak naw k’pawng ci. Ani naw a lusam am sei vai, am khamu am sei vai.

^6-7 Ani ah lusam cu Khanpughi ah ang ap nak m’hnüt nak ah kyak ci. Cun ah kyasei ani naw gook ah pei ah a hteh nak awn amät naw amät kä a lelawi sak vai. Apa ah a kyak ung phi, ani ah a kyak ung phi, a phäi apai ah a kyak ung phi, kä ak et vai.

⁸ Ani cu Nazirit ah a kyak ah chuih Bawipa ung ang ap vai.

⁹ Ani Nazirit ah kya ne ang ap yah ung a pei ah chang ang ghit ah asih ah a kyak ung ani ah ang ap nak ah lusam cu lelawi ci. Cun ah kyasei ani naw hnüüp chih ung ngäng neta a lusam la am khamu cu ak teiu vai. Cun ung ani cu theingthap ciah kya ba khai.

¹⁰ A hnüüp cheit hnüüp ani naw müm bawk hnih la mümkha hnih cu Bawipa ah om nak ah Phung ung luh nak ung taigü ah om nak ah a law püi vai.

¹¹ Taigü naw tumat cu katphyawn douthak nak, tumat cu m’khih ne douthak nak ah a dou thak vai. Cun cu, a cun ah chang gook ah pei ah a om ah phäh ah theingthap nak bi ah kyak ci. A cu hnüüp ani naw a lusam cu theing ba sak ci.

¹² Amät ah khin cu Nazirit ah Bawipa ung ang ap ba vai. Ng’pyi pyi ciah a khin cu kä khei tu vai. A i ah kyasei ci ung ani ah ang ap nak ah lusam cu lelawi ci. Thung-ba-douthak nak ah ani naw kum ät lüng ciah htome hta cu a law püi vai.

¹³ Nazirit ah kyak ci naw shaitak a khüm law ah akiak ung ani naw thungyo cu abi vai. Ani cu Phung valuh nak ung a hteh vai.

¹⁴ Kä kheihlik ciah seime thum cu Bawipa am a pek vai. M’khih ne douthak vai ah kum ät lüng ciah htome amca tumat, kat phyawn douthak vai ah kum ät lüng ciah htome amla tumat, la hmuhchum douthak nak vai ah me amca hta tumat ah kyak ci.

¹⁵ Ani naw k’caw kä shum ne pyan ah m’htut dawn ät phi a douthak vai. Cun gui cu oliv situi awn k’caw pyan ah m’htut shah, oliv si-tui awn hläuh ah m’htut ang pam, la hlü ba ci gui ah douthak vai ah htang la sapyit tui gui ah kyak ci.

¹⁶ Taigü naw cun gui avan cu Bawipa am pe neta, katphyawn douthak la m’khih ne douthak cu a douthak vai.

¹⁷ Ani naw hmuhchum douthak nak ah me amca awn, Bawipa cu a khawihnah vai. Cun cu m’htut dawn ät awn a täng ah a douthak vai. Ani naw douthak nak ah htang la sapyit tui phi a pek vai.

¹⁸ Phung ung valuh nak ung Nazirit naw alu teiu neta hmuhchum douthak m’khih nak ah mei ung a yuk shum vai.

¹⁹ Cun kawn ah taigü naw me m’ca ah ak phleing shon cu la neta, m’htut shah tumat la dawn ungka m’htut ng’pam tumat awn a täng ah Nazirit ah kut ung a tha vai.

²⁰ Cun tawi ne taigü naw cun gui cu aktung ah m’cümhnah ah Bawipa am a peik vai. Cun gui cu taigü ah hmawk ah theingthap ciah douthak ah kyak ci. Cun kawn ah hlü ba ciah meh ah ang kyang la a khaw gui cun phi thukhän thung ah taigü ah khäm ah kyak ci. Cun kawn ah Nazirit naw sapyit tui cu aw hning ci.

²¹ Shin gui cu nazirit gui ah phäh ah thungyo gui ah kyak ci. Cun ung phi Nazirit naw a shaitak ah hnu ah douthak vai ah a shaitak am om ung a peik vai ah kyak ci. Ani naw abi ah shaitak cu akcang ah a khüm be sak vai kyak ci.

Taigü ah Hriham Peik

²² Bawipa naw Moses cu thumkhän ci,

²³ Cun cu Aaron la a hta gui am, am thein gui vai, nangmi naw Israel chang gui hriham nami peik ung ami mang vai ah thulung gui ah kyak ci:

²⁴ Bawipa naw hrilham ning pe gui sä, ning m’hteihtang gui sä.

²⁵ Bawipa naw ning k’dük gui ne ning m’gein gui sä.

²⁶ Bawipa naw hmai kyang ne ning teng gui ne, dimdeeih nak ning pe gui sä.

²⁷ Bawipa naw, “Israel chang gui ah khan ah kei ah ming cu, hriham ah kyak ciah ngami naw ami ng’shäu ah a kyak ung, kei naw hriham ka pe gui khai.”