KHEI NAK 5 - Cho Bible Common Language 2016

Kä Theingthap ciah Chang

¹ Bawipa naw Moses a pyen nak ci,

² “Israel chang gui thumkhän pe gui ä, kheilei ung gaw ci gui, pumsa am thak gui, aksi bi ne kä theingthap ci gui cu, shaum pigaw ungka naw k’täm gui vai nei.

³ Kä theingthap ciah shin ah mäih chang avan cu k’täm gui ä, cun ung kei naw ka chang gui ah ng’lung ah ka om nak ah shin ah shaum pigaw cu kä lelawi sak khai gui.”

⁴ Israel gui naw cun cu ngai u ne, cun ah mäih chang gui cu shaum pigaw ungka naw täm gui ci gui.

Cheishoh ah Phäh ah Ng’lawh nak

⁵ Bawipa naw Moses am,

⁶ Israel gui ah hmawk ah shin ah m’shüm thein nak cu pek ci. Chang tumat cu Bawipa ung kä bekhüt ne chang tumat mat hnungtuk püi ne a cheishoh ah a kyak ung,

⁷ Ani naw akat nak ang kiaa vai, akbe ah ang lawh vai. Ani naw a cheishoh nak ah khan ah k’bum hma ung bum ät awn m’khah ne, a katnak ah chang am a pek vai.

⁸ Dou khai ah chang cu si sei, ang een pi ng’lawh dou pek khai kä a om ah a kyak ung, cun ah ng’lawh cu taigü ah hmawk ah Bawipa am pek vai. Shin ah ng’lawh nak ung cheishoh ciah chang ah hmawk ah ng’gängsei bi nak ah htome cu mang vai.

⁹ Israel gui naw aktung ah pektak ah Bawipa am ami douthak phung cu, taigü ung ami pek ah kyasei, taigü ah kaa ah kyak ci.

¹⁰ Taigüpäng naw ani ung ami douthak gui cu a khäm vai.

Ami cei naw Kä A Ngaih Gep gui ah Chu gui ah Mawng

¹¹ Bawipa naw Moses am thumkhän ci.

^12-14 Cun cu Israel gui am a pek gui vai ah shin ah m’shüm thein nak gui ah kyak ci. Chang tumat naw ak chu cu kä bekhüt ciah ang ngaih vai ah a kyak law ung, pami a hei awn ng’yawpawm ni ne amät a chei ah a kyak ung, a chu naw am yih ah kya ne acei naw hteicha sei kä hmat ci, hmuk ci kä om ci, ang yaw tu yah ung a u naw a pha ah kä kyak ci. Kä cun ung cun ah a kyak nak hning cu, ani cu kä bekhüt ciah kä kya pang sei phi, acei naw ak chu cu kä a ngaih gep ah a kyak ung,

¹⁵ A i ah mawngma ah a kyak ung phi, pami naw ak chu cu taigü ah a hteh püi vai. Ani naw k’thäh nak ah douthak vai ah htang den pye goi a law püi vai. Cun ung phi oliv situi kä a luh vai. Tui ng’ui awn kä a tha shi vai. A i ah kyasei ci ung cun cu acei naw kä a ngaih gep nak ah mawng ung douthak ah kyak ci. Düng nak cu akdei ung law püi ne bi ah kyak ci.

¹⁶ Taigü naw hnumi cu ma lam ah hteh püi ne, sonkiang ah ma ah ang düih sak vai.

¹⁷ Ani naw theingciim ciah tui cu m’dek am ung a yuk kei vai. Cun kawn ah Bawipa ah om nak ah Phung kyong ah cihpah ungka m’dek cu la ne tui ung a shum vai. Cun cu tui a kha vai ah bi ah kyak ci.

¹⁸ Ani naw hnumi ah lusam cu maih sak neta, douthak vai ah m’htut den cu, hnumi ah kut ung a tha vai. Plah tam nak ah tui kha awn be ciah k’am cu taigü naw a kut ung a kawh vai.

¹⁹ Taigü naw a pyen ah thukhän thulung gui cu hnumi naw ayum vai ah abi vai. “Nang cu pawmyau nak kä na bik ciah a kyak ung, shin ah ng’gun tui naw kä ning m’kyuk khai.

²⁰ Cun ung phi nang cu pawmyau nak na bik ciah a kyak ung

²¹ Bawipa naw na chang gui ah ng’lung ah na ming cu plah tam sä.

²² Shin ah tui cu nak chi ung yu lut ne, nak chi cu ng’phliin sak sä, na le täng na pumsa cu pim sä.” Hnumi naw am shan vai, “Ka yum ci nei, Bawipa naw a cun ah bi sä.”

²³ Taigü naw cun ah plah tam nak cu ca awn gu neta, cun ah ca guk cu k’am ah kyong ah tui kha awn a yuk m’si vai.

²⁴ Ani naw hnumi am, ani kha ne nat sak khai ah tui cu kä a awk sak pha ung,

²⁵ Taigü naw hnumi ah kut ungka m’htut den cu a lak vai. Cun kawn ah k’shäng ne Bawipa am a ap vai. Sonkiang khan ah a tha vai.

²⁶ Cun kawn ah ani naw m’hnüt nak douthak nak ah cun cu shum ät a lak vai. Sonkiang ung am khih vai. Ak hnu ah hnumi am cun ah tui cu a awk sak vai.

²⁷ Ani naw pawmyau nak bik ciah a kyak ung cun ah tui naw ak kha ah nat sak khai. Ani ah chihta cu ng’phling ne, ale täng pumsa cu pim khai. Ani ah ming cu a chang gui ah ng’lung ah plah tam ah kyak khai.

²⁸ Cun ung phi ani cu cang ciah a kyak ung ani cu kä kyuk khai hta nau khai.

^29-30 Shin cu chang tumat naw akchu pawmyau ciah ngai ne a thüi law ung, kä ah ngaih gep law ung bi vai ah thukhän ah kyak ci. Hnumi cu sonkiang ah ma ah ng’düih sak neta, taigü naw shikcha ah abi vai ah kyak ci.

³¹ Acei cu kat phyawn nak khai. Hnumi cu a kat ah a kyak ung acun ah mawngma avan ma nak khai.