KHEI NAK 4 - Cho Bible Common Language 2016

Kohath Pahta Levit gui ah Bilawh vai

¹ Bawipa naw Moses am m’thein ci,

² Kohath pahta Levit gui cu pangpai la kyongkhui aläk ah khei ne a lak vai.

³ Pami avan a khokum thumkip la hmakip ah ng’lak ungka, Bawipa ah om nak ah Phung ung bilo hning khai phung cu, ang ming na guk vai.

⁴ Ngami ah bilawh nak naw atheing pikbäih gui cu m’dang ci.

⁵ Bawipa naw Moses am shin ah m’shümthein nak gui cu pek ci. Phung phyet nak vai ah a khin a gawk law ung, Aaron la a hta gui cu Phung ung lut u neta, Thukhän M’küm ah ma ungka yihdung cu la ne, acun awn M’küm cu ami uk vai.

⁶ Acun ah khan ah mehvun akni awn ami yuk uk ba vai. Ak khan bäih ah sui m’kim yuk phah ba neta, kawh nak vai ah htung ami m’ghuh vai.

⁷ Ngami naw sui m’kim cu la u ne tawnglang ah khan ah ami phah vai. Cun cu Bawipa am douthak vai ah m’htut la m’htut tha nak ah k’bei gui, tui ng’ui khawk gui, douthak nak ah khawk gui, sapyit tui douthak than nak ah um gui cu ami uk vai. Cun ah tawnglang ah khan ung angtäi sei m’htut tha vai.

⁸ Ngami naw cun ah khan avan cu sui asen awn ami yuk uk vai. Cun ah khan ah mehvun akni ami yuk tha ba vai. Cun kawn ah kawh nak vai ah htung gui ami m’ghuh vai.

⁹ Ngami naw sui m’kim la u neta, mei im tung, mei im, mei ceh, mei k’eh khawk la olive situ awn pyan gui avan cu ami uk vai.

¹⁰ Ngami naw cun cu htun u neta, mehvun ni awn uknak ah kyong ah om ciah khawh avan cu kawh nak vai ah khan ah tha ci gui.

¹¹ Cun kawn ah ngami naw sui m’kim cu phüi u neta, ghui sonkiang cu uk khai gui. Cun ah khan ah mehvun ni awn uk khai gui, cun kawn ah kawh nak vai ah htung cu m’ghuh khai gui.

¹² Ngami naw Atheingcim Hmun ung mang ah um am avan cu la u neta, sui m’kim awn htun ne mehvun ni awn ak khan ah uk u neta, kawh nak vai ah khan ah hmoh khai gui.

¹³ Ngami naw sonkiang khan ah ka m’vutsa cu heng neta cun ah khan ah sui ak ih yuk phah khai gui.

¹⁴ Ngami naw sonkiang bi bi nak ung mang gui phung avan cu cun ah khan ah tha khai gui. Cun gui cu mei khawk, kimkoi, m’sawng la tuikaw gui ah kyak ci. Ngami naw cun ah khan ah mehvun ni awn uk u neta, kawh nak vai cu m’ghuh khai gui.

¹⁵ Phung phyet vai a khin a gawk law ung Kohath ah a pahta, gui cu acun ah aktheing kawh vai ah lawk khai gui. Cun cu Aaron la a hta gui naw cun gui la cun ung khawhcham avan ami uknak ang pyi kawn ah kyak khai. Kohath pahta gui naw theing ci a i phi kä ami tawn vai. Ami tawn ung ngami cu sik khai gui. Shin cu Kohath pahta gui naw Phung a hawi ah ang nawn ung phi ami bi vai ah kyak ci.

¹⁶ Eleazar, taigü Aaron ah hta cu Phung avan ma na ne bik khai kyak ci. Mei im ah phäh ah situi, tui ng’ui, htang-douthak, phyutheh nak situi, la Phung kyong ah om ci phung cu Bawipa am ami pek ah kyak ci.

¹⁷ Bawipa naw Moses la Aaron cu pyen ah goi ci.

¹⁸ “Kohath pahta gui cu kä nami law sak gui vai.

¹⁹ Shin ah aktheing pikbäih gui ah pei ah ami law ah phäh ah kä nami ngawn en gui vai. Shin ah mawng ng’dawt ne bi nak vai cu, Aaron la a hta gui cu kyong ah lut u ne a chang sing am abi vai cu ami bi sak vai. Ami kawh vai cu ami m’thein gui vai.

²⁰ Cun ung phi Kohath chang gui cu Phung kyong ah lut law u ne, tagü gui naw ak theing gui k’plon vai ah ami pawng püi ami hmuh ah a kyak ung, ngami cu sik khai gui.

Kershon Pahta Levit gui ah Bilawh vai

²¹ Bawipa naw Moses cu pyen nak ci,

²² Kershon pahta Levit gui cu pangpai kyong aläk ah khei ne alak vai.

²³ A khokum thumkip la hmakip ah ng’lak pami avan, Bawipa ah om nak ah Phung ung bi bi hning khai phung ang ming alak vai.

²⁴ Ngami naw shin gui avan cu ma na ne kawt khai gui.

²⁵ Phung, akyong uknak, akyong uknak, ak khan bäih ah uknak ah mehvun ni, valuh nak ungka yihdung ni,

²⁶ Mangkiang ah phäh ah yihdung la suinu gui, cun gui cu Phung la sonkiang ah angveing ung om ci. Cun gui la cun gui pyan nak ung mang gui phung avan ah kyak ci. Shin gui ung hlü khai thäh gui avan cu ngami naw bik khai gui.

²⁷ Aaron la a hta gui naw ami bi sak gui, Kershon chang gui naw ami bilawh avan laami phuih kawh gui cu Moses la Aaron naw ami teng vai.

²⁸ Shin gui cu Kershon pahta naw Phung kyong ah ami bilawh vai gui ah kyak ci. Ngami naw shin gui cu taigü Aaron ah hta Ithamar ah uknak ah ka ung ami bi vai ah kyak ci.

Marari Pahta Levit gui ah Bilawh vai

²⁹ Bawipa naw Moses am, am thein cu Marari pahta Levit gui, pa ng’pai kyongkhui aläk ah khei sak gui ci,

³⁰ Cun kawn ah a khokum thumkip la hmakip ah ng’lak ungka pami avan Bawipa ah om nak ah Phung ung bii bi hning ci phung ami ning guk sak gui ci.

³¹ Ngami ah bi vai, kawhchan vai cu, Phung ung agupgong gui ah kya ciah lawngdang gui, tung gui la tung khaw gui ah kyak ci.

³² Phung ung om ciah mangkiang ung tung gui, tungkhaw gui, cep nak gui la guui gui la cun cawh nak ung mang gui avan ah kyak ci. A chang sing cu shin gui kawh nak vai ung bik khai gui ah, kyak ci.

³³ Shin gui cu Marari pahta naw Phung kyong ah bii ami bi ung ami bi vai ah kyak ci. Ngami naw shin gui cu taigü Aaron ah hta Ithamar ah uknak ah ka ung ami bi vai ah kyak ci.

Levit gui Khei nak

^34-48 Bawipa ah thukhän ah mäih ah Moses, Aaron la chang bum ng’vai gui naw Levit pahta thum ah kyak ciah Kohath, Kershon, la Marari gui cu khei gui ci gui. Ngami naw pa ng’pai la kyongkhui aläk ah bik ci gui. A khokum thumkip la hmakip ah ng’lak ungka pami avan, Bawipa ah om nak ah Phung ung bi bi hning ci phung aming guk ci gui. 22750 22630 Pahta Khei nak Kohat 2750 Kershon 2630 Marari 3200 Ang’dawn: 8580

Pahta Khei nak

⁴⁹ Bawipa naw Moses ang thumkhän ah mäih ah a chang sing cu ang ming guk pyi ah kyak ci. Bawipa naw Moses am a pek nak ah thumkhän ung a chang sing naw amät ah bi vai cu abi vai la a kawh chan vai cu pek ci.