KHEI NAK 3 - Cho Bible Common Language 2016

Aaron ah Htapa gui

¹ Shin cu Sinai M’htung khan ah Bawipa naw Moses ang thu püi yah ung Aaron la Moses ah kyong chang gui ah kyak ci.

² Aaron ah a hta gui phli lawk ci gui; angvaipi Nadab, Abihu, Eleazar, Ithamar.

³ Ngami cu taigü ah kyak khai gui ah phyisä ne phyutheh gui ah kyak ci,

⁴ Cun ung phi Nadab la Abihu cu Sinai Bung ah Bawipa am kä theingcim ciah mei ami douthak yah ung ami ngawn goi ah kyak ci. Ngani cu ani hta kä om ci. Cun ah kyasei Aaron a ghin yah ung Eleazar la Ithamar naw taigü ah kya ne bii bik ci goi.

Levit gui cu Taigü gui ah Bii Bik khai gui ah m’Düih Gui ci gui

⁵ Bawipa naw Moses cu pyen nak ci,

⁶ “Levit pakhui gui cu hmai lam ah law püi gui ne, taigü Aaron ah changshäm ah m’düih gui ä.

⁷ Ngami naw kei ah om nak ah Phung ung bilawh gui vai la Taigü gui ah phäh ah bilawh gui vai, chang bum van ah phäh ah bilawh gui vai cu bik khai gui.

⁸ Ngami naw Phung ung khawh cham avan m’htei khai gui, pawih ba ciah Israel chang gui ah phäh ah phi bik khai gui.

⁹ Levit gui naw aktung ah ami bi vai cu, Aaron la a hta gui ah bi ami bawm gui vai ah kyak ci.

¹⁰ Taigübawi ah bii kawt khai gui ah Aaron la a hta gui cu nang naw na m’düih gui vai. A hei chang naw shin ah bii abi tu phung ung ngawn vai.”

¹¹ Bawipa naw Moses cu pyen nak ci;

^12-13 Levit gui cu tuhbäi kei ah chang ah kyak ci gui. Kei naw Egypt chang gui ah hta htük gui avan ka ngawn yah ung, Israel gui ah kyongkhui ung ami htapa ng’vaipi la ami seime ah a hta htük gui cu, kei naw ka mät ah kaa ah ka law püi gui ci. Tuhbäi Israel gui ah hta htük gui cu, ka mät ah chang ah ka k’bäi nak vaisü ung, Levit gui cu ka kaa na gui ci. Ngami cu kei ah chang ah kyak ci gui, kei cu Bawipa nei.

Levit gui ah Ng’Khei nak

¹⁴ Sinai Bung ah Bawipa naw Moses am thumkhän ci.

¹⁵ Levit gui cu a pahta, akyong khui aläk ah a guk gui vai, cha ät la cha ät ah gham ba pi ciah pami gui a guk gui vai ah pyen sei,

¹⁶ Moses naw acun ah bik ci.

^17-20 Levi cu a hta thum om ci; Kershon, Kohath la Merari, ngami cu ami pahta ah ng’shon gui ah kyasei, cun ah ami ming ami sui gui ah kyak ci. Kershon ung a htapa hnih om ci: Libni la Shimei. Kohath ung a htapa phli om ci: Amram, Ishar, Hebron la Uzziel. Merari ung a htapa hnih om ci: Mahli la Mushi. Ngami cu ami kyongkhui ah ng’shon gui ah kyasei, cun ah ami ming ami sui gui ah kyak ci.

²¹ Kershon pahta cu Libni la Shimei ah kyong khui ungka ah kyak ci.

²² Cha ät la cha ät ah ng’vai ba ciah pamihta gui khei ne ami guk gui avan ah ng’dawn cu 7,500 ah kyak ci.

²³ Shin ah pahta naw Phung ah a hnu täng ang leng ung shaum pigaw co ci.

²⁴ Cun ah pahta ah ami bawi cu Lael ah hta Eliasaph ah kyak ci.

²⁵ Ngami cu Phung ung bi vai phung bik khai gui. Akyong uknak, akpung uknak, valuh nak ung yihdung,

²⁶ Mang kyang ung yihdung, cun cu Phung la sonkiang ah ng’veing ung om ci. Shin ah a mawng gui ung ng’shünpha ci gui avan cu ngami naw ami bi vai ah kyak ci.

²⁷ Kohath pahta cu, Amram, Izhar, Hebron la Uzziela kyong chang ungka gui ah kyak ci.

²⁸ Cha ät la cha ät ah ng’vai ba ciah pamihta gui khei ne ami guk avan ah ng’dawn cu 8,600 ah kyak ci.

²⁹ Shin ah pahta naw Phung ah a htum täng ah shaum pigaw a co vai.

³⁰ Pahta ah ami bawi cu Elizaphan, Uzziela ah a hta ah kyak ci.

³¹ Ngami ah bi cu Thukhän M’küm ami m’htei vai ah kyak ci. Cun ung tawnglang, mei im tung, sonkiang, taigü gui naw Atheingcim Hmun ung ami mang ah gukthen nak gui, la Atheing Pikbäih Hmun ung valuh nak ung yihdung gui ah kyak ci. Ngami naw shin ah a mawng gui awn ng’shünpha ci avan ami bi vai ah kyak ci.

³² Levit gui ah ami bawi cu taigü Aaron ah hta Eleazar ah kyak ci. Ani cu Atheingcim Hmun ung bilo ci gui uk gui ne tängpang ciah kyak ci.

³³ Marari pahta cu Mahli la Mushi kyong chang ungka ah kyak ci.

³⁴ Cha ät la cha ät ah ng’vai ba ci gui ami hta gui khei u ne, ami guk avan ah ng’dawn cu, 6,200 ah kyak ci.

³⁵ Shin ah pahta naw Phung ah a siiptäng ah shaum pigaw ci gui. Pahta ah ami bawi cu Zuriela, Abihail ah hta ah kyak ci.

³⁶ Ngami ah ami bilawh cu, Phung cawh nak ah lawngdang gui, tung gui, tungkhaw gui la cawh nak gui avan ah kyak ci. Ngami naw shin gui ah mawng avan ami bi vai ah kyak ci.

³⁷ Ngami naw ami m’htei vai cu akpung ah ng’vong gui, tungkhaw gui, ceh nak gui la gui gui ah kyak ci.

³⁸ Moses, Aaron la a hta gui cu Phung ah ma lam ak kiangtäng ung shaum pigaw tuk ci gui. Ngami ah ami bilawh cu Israel chang gui ah hmawk ah Atheingcim Hmun ung bi ah khut ah kyak ci. Chang a hei tumat mat shin ung bi tuk cicu ngawn ci gui.

³⁹ Cha ät la cha ät ah ng’vai ba ciah Levit pahta pamihta gui cu Bawipa ah thumkhän ah mäih ah Moses naw pahta ung aguk avan ah ng’dawn cu 22,000 ah kyak ci.

Levit gui naw Htahtük ah Kyak nak Lak ci gui

^40-41 Bawipa naw Moses cu pyen nak ci, “Israel gui ah ami hta htük gui avan cu kei naw ka khäm khai. Cun ah kyasei Israel gui ah hta htük pami hta gui cha ät la cha ät ah ng’vai ba ci gui cu ami ming nami guk gui vai. Cun ung phi ngami ah hnün ung kei naw Levit gui avan cu ka chang ah ka thäh gui khai. Kei Bawipa nei! Kei naw ami vuhchah gui ah hta htük gui avan ah hnün ung Levit gui ah vuhchah gui cu ka thäh gui ci.”

⁴² Moses naw a cun cu ngai neta, a hta htük gui pami avan,

⁴³ cha ät la cha ät ah ng’vai ba ci gui cu guk ci. Avan ah ng’dawn cu 22,273 ah kyak ci.

⁴⁴ Bawipa naw Moses am a pyen nak cu,

⁴⁵ “tuhbäi, Israel gui ah ami hta htük gui avan ah hnün ung Levit gui cu kei ah chang ah kyak khai gui ah ap vä. Israel gui ah vuhchah gui ah ami hta htük gui ah hnün ung Levit gui ah vuhchah gui cu ap ä.

⁴⁶ Israel gui ah hta htük gui ah tah, 273 da tuba ci gui ah kyasei, pawih lawk ciah hta gui cu nami hleih vai ah kyak ci.

⁴⁷ Tumat ah phäh ah ngui pit hma ci nami pek vai. Cun cu aküi ah m’hnütbäi ah kyak ci.

⁴⁸ Cun ah ngui cu Aaron la a hta gui am nami pek vai.

⁴⁹ Moses naw ang thu ngai neta,

⁵⁰ ngui k’cüm pit 1365 cu la ne,

⁵¹ Aaron la a hta gui am pe gui ci.