KHEI NAK 12 - Cho Bible Common Language 2016

Miriam Ami M’kyuk nak

¹ Moses naw Kushit hnumi chu na sei, Miriam la Aaron naw pyen m’shet ci goi.

² Ngani naw, “Bawipa naw Moses bäng ungma ng’thu a pyen? Keimi ungmä ng’thu kä pyen ne maa? cik ci goi. Bawipa naw cun ani pyen cu ng’ya neta,

³ (Moses cu m’lung neim ciah chang, khomdek khan chang avan ung m’lung neim pi ci) cik ci.

⁴ Ang ghit ah Bawipa naw Moses, Aaron la Meriam am, “Nangmi thum ka om nak ah Phung ung nami law vai ah ka ng’ya hlük ci nei” cik ci. Ngami hteit ci gui.

⁵ Bawipa cu khongmei von ung kyum law ne Phung valuh nak ung düi neta khü goi ci, “Aaron! Meriam!” Ngani cu va m’khan ci goi.

⁶ Cun kawn ah Bawipa naw pyen ci, “Ka pyen cu ng’ya ni ä, Nami ng’lung ah prophet gui a om yah ung ami muimang ung kei naw ka mät cu ng’dang sak ne, ami mang ung ka ng’thu püi gui ci.

⁷ Cun ung phi ka changshäm Moses ka ng’thu püi cu ak küi ah kyak ci. Israel chang avan ung tängpang khai ah kei naw ani cu ka tha ah kyak ci.

⁸ Cun ah kyasei ani cu hmai chum ne ka ng’thu püi ci, ng’htei khai ah kä yivon ne, ani naw ka müi phi na hmuk ci. Ka changshäm Moses cu a i ah nami m’thüikham nak ci ang?

⁹ Bawipa naw ngami cu m’lungshe na goi ci. Cun ah kyasei ani cu hteit ba ci.

¹⁰ Cun kawn ah khongmei naw Phung cu ng’liim tak ci, Meriam ah vun cu ang ghit ah nat nak naw ui sei, a bawk ah ng’khe ne khüi ah mäih ah kyak ci. Aaron naw ani cu teng neta natnak naw a uk cu hmu neta,

¹¹ ani naw Moses am, “Na bä ni bawi aw, shekak ciah kani hma nak ah phä ah shin ah m’kyuk nak ung kani yaica khai ah kä na bi en goi ä.

¹² A sa avang ei yawp sei aksi ah ng’tüi ciah mäih ah ani cu kä kyak en sak ä” cik ci.

¹³ Cun ah kyasei Moses naw Bawipa ah m’lau ne “O Khanpughi ani gai sak ä” cik ci.

¹⁴ Bawipa naw, “Ani cu apa naw a hmai ung am thui ah a kyak ung ani cu hnüüp chih ung a thüisei nak om khai. Cun ah kyasei ani cu hnüüp chih ung Shaum pigaw ah akpung ah nami om sak vai, cun kawn ah akyong ah nami law püi ba vai.

¹⁵ Meriam cu Phung ah akpung ah hnüüp chih ung tha ci gui. Ani akyong ah kä ami law püi ba pha ah chuih chang gui cu kä ng’plon ci gui.

¹⁶ Cun kawn ah ngami cu Hazeroth ungka hteit u ne, Paran bung ah shaum pigaw co ba ci gui.