KHEI NAK 1 - Cho Bible Common Language 2016

Ak Htükbäih ah Israel gui ah Ng’khei nak

¹ Israel chang gui naw Egypt khaw ami hteh tak nak akum goi nak ah akcha goi nak, ak hnüüp ät hnüüp ung Sinai Bung ah Bawipa ah a om nak ah Phung ung Bawipa naw Moses cu ng’thu püi ci. Ani naw,

² “Nang la Aaron naw Israel chang gui pahta la kyongkhui a läk ah khei nak nani bi vai nei. Pami avan

³ a khokum kumku la kumku ah däm ci, ga tu hning khai phung angming nani guk vai.

⁴ Ning bawm goi khai ah pakhui ät ungka, pahta ung angvaipi tumat ci nani k’thäh vai.”

^5-16 Shin ah pami gui cu ami pakhui ung ami ng’vai gui, shin ah bi ah phäh ah ami chang bum ungka ami ghü gui ah kyak ci. Pakhui Pahta ng’vaipi Reuben Elizur, Shedeura ah hta Simeon Shelumiela, Zurishadai ah hta Judah Nashon, Amminadab ah hta Issakha Nehtanela, Zuara ah hta Zebulun Eliab, Helon ah hta Ephraim Elishama, Ammihud ah hta Manasseh Kamaliela, Pedahzura ah hta Benjamin Abidan, Gideoni ah hta Dan Ahiezer, Ammishaddai ah hta Ashera Pagiela, Ochran ah hta Kad Eliasapha, Deulela ah hta Naphtali Ahira, Enan ah hta.

Pakhui Pahta ng’vaipi

¹⁷ Shin ah chang gha lei goi ah bawm nak awn Moses la Aaron naw,

¹⁸ a cha goi nak ah a hnüüp ät hnüüp ung chang bum avan cu khü ci goi. Ami van a khokum kumku la kumku ah däm ci gui cu ami ming gu ne khei ci gui.

¹⁹ Bawipa ah thumkhän ah mäih ah bik ci gui. Sinai Bung ah Moses naw chang gui ah ming cu guk ci.

^20-46 Pami gui kumku la kumku ah däm ci gui, ga tu hning khai phung cu, pahta kyongkhui aläk ah ami ming guk ci gui. Reuben pakhui, Jakob ah hta ng’vaipi ung tün ci gui. Avan ah ng’dawn ci shin ah kyak ci: Pakhui Khei nak Reuben 46, 500 Simeon 59, 300 Kad 45, 650 Judah 74, 600 Issakha 54, 400 Zebulun 57, 400 Ephraim 40, 500 Manasseh 32, 200 Benjamin 35, 400 Dan 62, 700 Ashera 41, 500 Naphtali 53, 400 Ang dawn: 603, 550

Pakhui Khei nak

⁴⁷ Levit gui cu a hei pakhui gui awn m’dawn ne kä ami guk tu gui ah kyak ci.

⁴⁸ A i ah kyasei ci ung Bawipa naw Moses am,

⁴⁹ “Nang naw ga tuk khai ah bä ciah pami gui la ne na khei law ung, Levit pakhui cu kä na m’dawn tu vai.

⁵⁰ Cun nak vaisü ung kei ah om nak ah Phung la acun ung khawhchaam avan cu Levit gui am k’bäi ne angvaipi ah tha gui ne na ngäng sak gui vai. Ngami naw cun gui la cun ung khawh gui cu m’kawn u ne, m’htei khai gui. A cun veing ne ami shaum pigaw co khai gui.

⁵¹ Nangmi naw nami shaum pigaw nami m’kawn päng ung Levit gui naw Phung cu la u neta, shaum pigaw thi ami cawh banak hmun ung, m’düih ba khai gui. A u chang phi Phung ah pei ah lawk cicu ngawn vai.

⁵² Pawih ba ciah Israel gui naw shaum pigaw ami co vai. Angbum angbum ah a chang sing cu amät ah ang bäm ung amät ah a lan ka ah a om vai.

⁵³ Cun ung phi Levit gui naw cun ah Phung koi ne, shaum pigaw co ne ngäng khai gui. Cun ah kyasei acun ah pei ah a u kä ng’et lawk khai. Israel changbum ah khan ah kei ah m’lungshe nak cu, a u naw kä khan khai.”

⁵⁴ Cun ah kyasei Bawipa naw Moses am, thumkhän a pek päng cu, Israel chang gui naw bik ci gui.