KALATIAN 4 - Cho Bible Common Language 2016

¹ M’täi ne pyein ung Chang tumat ah hta cu apa khawh chaam avan ei mang khai ah a kyak ung phi, kä a ng’vai pha ung khlei htein ah mäih ah om ci.

² Ani cu apa ah k’bäi nak ah akhin kä a gawk pha ung, ani m’hteihtang ci gui la m’cum’cäi ci gui ah kaa ung om ci.

³ Acun ah mäih ah mikmi cun phi mümcha ung kämi khüighaat pha ung, khovang mümcha gui ah khlei htein ah mi kyak ci.

⁴ Cun ung phi ak hnu ah akhin küm law khätah, Khanpughi naw Ahtapa cu yuk m’kyum lawk ci. Ani cu hnicim chang nu nah ne ng’tüi law ne, Jew gui ah thukhän kaa ah om lawk ci;

⁵ Cun cu mikmi Khanpughi ah hta ah mi kyak vai ah, thukhän ah kaa ung kaa, ana k’phiawn gui ah kyak ci.

⁶ Nangmi cu a hta gui ah nami dang vai ah, Khanpughi naw, “Pa, Ka Pa,” cine ng’khü ciah A Htapa ah Mumcha cu mi m’lung kyong ah yuk m’kyum lawk ci.

⁷ Cun ah kyasei nangmi cu khlei htein ah kä kya ba ne, A hta ah nami kya pyi ci. A hta ah nami kya pyi ci kyisei, nangmi cu Khanpughi ah pakhui m’düng ciah A Htapa ah nami kyak ci.

Kalatia Khritha Gui ah Hmawk ah Paul ah Ng’Ä ng’Ai Nak

⁸ Nangmi cu Khanpughi kä nami hmat pha ung, Khanpughi ah ng’hlawk ci gui ah khlei htein ah nami kya man ci.

⁹ Tuhbäi ung nangmi naw Khanpughi nami hmat ci — Tuhbäi ung nangmi cu Khanpughi naw ning hmat gui ci — cine ka pyein khai. Cun ah kyasei nangmi naw ak tha kä om sei, m’gein vai ciah kho ng’yo cu, a i ah kyasei nami ng’hlah ba shi hlü ang? A i ah kyasei khoyo ah khlei htein ah nami kyak ba hlü ang?

¹⁰ Nangmi naw hnüüp, chaa, kum, akhin amshah gui cu, aküikyang ah nami m’hnüt ci.

¹¹ Nangmi ah hmawk ah ka ng’ä ci nei! Nangmi ah hmawk ah ka bi gui shi a kholä düt ah kä kyai lawk khai aw?

¹² Phäi nau gui aw, kei ah mäih ah nami kyak tu vai ah ka ning m’cäi gui ci nei. Kei cu nangmi ah mäih ka lawk ci nei. Nangmi naw kei ah khan ah nami katnak kä om hnga ci.

¹³ Ak htük bäih ah Thu Ni ka ning m’thein law gui cu kei ka gawpyam su ah kyak ci, cicu nami shüm ba khai.

¹⁴ Kei ka gawpyam nak naw nangmi a ning cüngvawn sak gui ung phi, nangmi naw kei cu kä nami na päipih ci, kä nami na hnu ng’tuk püi ci; Khankhochang ah mäih, Bawi Khrit Jesuh ah mäih ah nangmi naw kei cu nami na dou ci.

¹⁵ Cun yah ung ang htei ah nami yeikyai te ci, tuhbäi a i ah nami kia lawk ci ang? Cun yah ung nangmi cu nami m’khüt vai sü ung nami mik hngaw kawih ne nami na pek khai ah nami kyak cu ka pyein ba hlük ci.

¹⁶ Tuhbäi kei naw düng ci ka pyein ah hmawk ah, nami gaa ah ka kyai law bawk khai ang?

¹⁷ Chang a hei gui naw nangmi cu ang htei ah ning cungngai gui ci gui, cun cu akni su ah kä kyak ci. Ngami ah ng’yak hlü cu, nangmi kei awn nami ng’chaa vai ah kyak ci, cun ung vah nangmi naw ngami cu nami cungngai tu ba gui khai kyak ci.

¹⁸ Ak ni su lam ah ngaih peit tu cu nik ci, kei naw ka ning om püi gui yah bäng ah kä kyak ciah, ngami cu angtäi sei acun ah ngaih tüh ei u sä!

¹⁹ Kam hni ah ka hta nau gui aw! Bawi Khrit ah m’lung ngaih nangmi ung kä a om pha ah chuih, kei cu hta lawk khai ah nu ah mäih ah ka yaica ci nei.

²⁰ Kei naw nangmi cu a hei ah m’hleen ne ka ning m’cäi gui hlü ah phäh ah, tuhbäi ge nangmi awn a täng ah ka om hlük ci nei. Kei cu nangmi ah phäh ah ka ng’ä aih ci nei!

Hakar la Sarah awn M’tumtäng Nak

²¹ Thukhän ah kaa ah om hlük ciah chang gui, ka ning shi gui hlük ci; thukhän ah pyein cu nangmi naw kä nami ng’yak ci ma?

²² Cun ah thukhän naw, Abraham ung a htapa hnih om ci, tumat cu khlei htein hnumi ah hta ah kyak ci, tumat cu ng’päi om hnumi ah hta ah kyak ci.

²³ Khlei htein hnumi ah hta cu, hta man düt ah a hta nak ah kyak ci; ng’päi om hnumi ah a hta läi cu Khanpughi ah shaitaak awn ng’tüi lawk ciah kyak ci.

²⁴ Shin cu m’tumtäng nak ah kyak ci: hnumi hnih cu thukhän hnih ah kyak ci. Hnumi tumat cu Hakar ah kya ne, ani ah hta gui cu khlei htein ah kyak ci gui, ani naw Sinai Khomhtung ah Thukhän cu dang sak ci.

²⁵ Hakar cu Arabia kho ah, Sinai m’htung ah hnün ung ng’düi ci. Ani naw tuhbäi khlei htein ah kyak ciah Jerusalem la acun ung chang gui cu dang sak ci.

²⁶ Cun ung phi Khanmawpi ah Jerusalem cu, ng’päiye nak ah kya ne, mi nu ah kyak ci.

²⁷ A i ah kyasei ci ung, Cacim naw; “Kä hta ciah hnumi, kä na hta man ung phi yeikyai ä! Nau poi kä na m’neh man ung phi, viik ne m’lau ä! A cei naw a nawng ah hnumi cu, A cei om ciah hnumi ah mä, da pi sei, Hta nau khai nei!” ciah pyein ci.

²⁸ Phäi nau gui aw, nangmi cu Isaak ah mäih ah Khanpughi ah shaitaak awn nami ng’tüi ciah hta gui nami kyak ci.

²⁹ Cun yah ung ng’tüi law düt ciah hta naw, Khanpughi ah Mumcha awn ng’tüi lawk ciah hta cu k’dudeiu nak ci, tuhbäi phi acun ah kyak ci.

³⁰ Cun ung phi cacim naw a i ah pyein ci ang, ci ung, “Khlei htein la a hta cu k’täm goi vä; khlei htein hnumi ah hta cu ng’päi om hnumi ah hta awn a täng ah pakhui kä m’düng tuk khai nei,” ci ne pyein ci.

³¹ Cun ah kyasei phäi nau gui aw, mikmi cu, khlei htein hnumi ah hta gui ah kä mi kyak ci, ng’päi om hnumi ah hta gui ah mi kyak ci nei.