KALATIAN 1 - Cho Bible Common Language 2016

¹ Chang ungka lawk ci la chang ah m’düih ah kä kyak ciah, Jeyuh Khrit la ani sih nak ungka thawh ba sak ciah Apa Khanpughi ah m’düih, ang düihpüi kei Paul La;

² shi ah kei awn kami om ghawm ciah phäi nau gui naw, Kalatia kho ah khrithabum gui-am ca kami pe lawk ci nei:

³ Mi Pa Khanpughi la Bawipa Jeyuh Khrit ah m’gein nak la dim deeih nak cu na mi khan ah om sä.

⁴ Mi Pa Khanpughi ah ang yak hlü ah Bawi Khrit cu shin ah shetkat nak ah khin ung na k’phiawn gui khai ah, mi katnak ah hmawk ah ng’ap pyi ci nei.

⁵ Khanpughi ah bämang nak cu angtäi sei deikhang sä! Amen.

Tumat Bäng ah Ng’thu Ni

⁶ Bawi Khrit ah m’gein nak awn nang mi ning khü gui ciah Khanpughi cu, ang ghit ah nawng u ne, ng’Thu Ni a hei nami dou ah hmawk ah ka ning cäi nah gui ci nei.

⁷ Akcang ah pyein ung Bawi Khrit ah mawng “Thu Ni ahei,” kä om ci, cun ung phi chang amshah gui naw, Bawi Khrit ah ng’Thu Ni cu m’hlat shüi shüi u ne, ning awng-aa sak gui ci gui.

⁸ Cun ung phi kei naw ka pyein ah ng’Thu Ni awn kä täng ciah ng’thu pyein ci cu, keimi phi bäi, khanchang phi bäi, m’hteikhaw ah hteh nak güt ah m’kat nak cu gah khai nei.

⁹ Keimi naw leng ba ne kami pyein ba mä cu; nangmi naw nami dou ah ng’Thu Ni awn kä täng ciah, ng’Thu Ni pyein ciah chang cu, m’hteikho ah hteh nak güt ah m’kat nak gah sä!

¹⁰ Cun ah ka pyein cu chang naw a na k’bääi vai ah ka pyein ah kya ne ang? Cun ah kä kyak ci, Kei ah ng’yak hlü cu Khanpughi ah nak bääi vai bäng ah kyak ci. Kei cu chang ah na chang m’sui vai ah ka k’tha nak ciah kya ne ang? Cun ah ka k’tha nak ciah a kyak ung kei cu Bawi Khrit ah changshäm ah kä ka kyak khai.

Paul cu Ang Düihpüi ah a Kyak Law ah Mawng

¹¹ Ka ning m’thein gui khai phäi nau gui aw, kei ka pyein ah ng’Thu Ni cu chang ungka lawk ciah kä kyak ci.

¹² Kei naw chang tumatmat ungka ka gah ah kä kyak ci, chang tumatmat naw a nam theingthang ah phi kä kyak ci. Bawipa Jesuh Khrit amät naw khän ne a nam dang ah kyak ci.

¹³ Kei naw Jew gui ah yum nak ung ka om yah ung a i ah ka bilawh man cu ka ning m’thein gui pyi ah kyak ci. Kei naw Khanpughi yum ci gui cu ak she ah k’dudeiu na gui ne, khrithabum cu m’di vai ah ka k’tha na pi k’bäih ci.

¹⁴ Kei cu Jew gui ah yum nak akcang ah bi nak ung, kami thawn lawk ciah Jew chang gui ung, pupa gui ah thung law yoman cu k’tha na pi k’bäih ne ka läk ciah kyak ci.

¹⁵ Cun ung phi kei kä ka ng’tüi pha ge ung Khanpughi naw am gein nak awn na ghü ne, a khuut bi vai ah ana khü ah kyak ci.

¹⁶ Cun kawn ah changpakhui hei gui-am A Htapa ah mawng Thu Ni cu kam thein gui khai, kei-am A Htapa cu ana hmu sak ah kyak ci. Cun ah kyasei nam shüm thein tuk khai ah a u phi kä ka ng’shi man ci:

¹⁷ Ang düihpüi ah kya law ma ci gui, ka ng’shi gui khai ah Jerusalem ah phi kä ka hteit man ci. Ak htük bäih ah Arabia kho ah hteit netah Damaskas ah ka law ba ci.

¹⁸ Khokum thum a lüng kawn ah kei cu Peter ka hmuk khai ah Jerusalem ah hteit ne, ani awn a täng ah hnüüp gha lei-hma ka om tuk ci.

¹⁹ Cun ung phi kei naw Bawipa ah nau James ah kawn ah ang düihpüi a hei a u phi kä ka hmuk ci.

²⁰ Shin ah ka guk cu ng’düng ci, kä ka hleei ciah a kyak ah mawng cu Khanpughi naw hmat ci!

²¹ Cun kawn ah kei cu Siria la Cilicia kho ah ka hteit ci.

²² Cun yah ung Judea kho ah khrithabum gui naw kei cu kä na hmat phak ci gui.

²³ Ngami naw chang hei gui ah pyein ami ng’yak cu, “Mikmi na k’dudeiu na gui man ciah chang naw, yan ä am di vai ah ak tha nak man ah yum nak ah mawng cu, ng’shäu ne pyein ci nei,” ciah kyak ci.

²⁴ Cun ah kyasei ngami naw kei ah mawng ung Khanpughi cu m’hlüngtai ci gui.