JOSHUA 9 - Cho Bible Common Language 2016

Kibeonit gui naw Joshua M’hleei ci gui

¹ Israel gui ah näng nak cu Jordan tuinu akhei täng ghanpughang gui ami van naw hmat ci gui, khawgui gui, m’htung nawi gui la Mediteranean tuinu kem khaw avan ung a siiptäng Lebanon ung khüt ci; cun gui cu Hittit, Amorit, Kanaanit, Perizzit, Hivit la Jebusit gui ah ghangpughang gui ah kyak ci.

² Ngami ami van law ne ng’cut ne ng’bum u neta, Joshua al Israel gui cu tuk gui vai ah pawng ci gui.

³ Cun ung phi Kibeon chang gui Hivit gui naw, Jerikho la Ai ah khan ah Joshua ah bi cu ng’ya u neta,

⁴ ani cu m’hleei vai ah k’bäi ci gui. Ngami naw hteit ne, ei vai la ne, ng’ip kheei ung m’khäp ne, sapyit tui mehvun um kheei ung than neta, ami ng’sela ung taih ci gui.

⁵ Ngami cu sui kheei sui u ne, k’dawm ah phahnak cuum ci gui. Ami hteh püi ah m’htut cu chawng ne paam ci.

⁶ Ngami naw Kikal phung ung hteit u neta, Joshua la Israel gui ami pyen nak gui cu, “Keimi cu a khaw shou ah kaa kami lawk ci, keimi awn hmuhchum nak nami bi vai ah kami ng’ya hlük ci nei” cik ci gui.

⁷ Cun ung phi Israel chang gui naw, “A i ah kyasei nangmi awn hmuhchum nak kami bi vai ang? Nangmi ang et nak ung nami om ciah kyak khai nei” cik ci gui.

⁸ Ngami naw Joshua am, “Keimi cu na khuut ung kami om ci nei” cik ci gui.

⁹ Ngami naw shin ah m’thein ci gui, “Bawi aw, keimi cu khaw shou nak ah kaa kami lawk ci nei, a i ah kyasei ci ung keimi naw Bawipa nami Khanpughi ah mawng cu kami ng’yak ci. Ani naw Egypt khaw ung abi gui ah mawng nünü kami ng’yak ci.

¹⁰ Jordan ah a kyangtäng ung ghangpughang hnih goi ah a khan ung abi phi kami ng’yak ci. Heshbon ghangpughang Sihon la Bashan ghangpughang Ok, Ashtaroth ungka gui ah kyak ci.

¹¹ Kami ng’vai gui la kami khaw ung om ciah chang avan naw, lam ah sho-ei vai m’hnüt ge neta, law ne kami ning hmuh law gui vai ah pyen ci gui. Keimi naw nang ah khuut ung kami bi tu vai la keimi awn hmuhchum nak nami bi vai ah kami ning thäh gui vai na m’cäi gui ci gui.

¹² Kami m’htut cu teng vä. Nangmi ning hmuh law gui vai ah im ung kami pawng law yah ung, shin cu oh te ci, cun ung phi teng vä, tuhbäi ket na paam ci.

¹³ Sapyit tui kami kei yah ung mehvun cu thai te ci, cun ung phi teng vä, kheei pyi ci nei. Kami sui gui la kami phahnak gui cu lam shou ung kami lawk ci kya ne kheei ci gui nei” cik ci gui.

¹⁴ Israel gui naw ami ei amshah cu dou ci gui, cun ung phi Bawipa cu kä ng’shi thäh ci gui.

¹⁵ Joshua naw Kibeon chang gui awn hmuhchum nak bi neta, om tu sak gui ci. Israel chang bum ah ami ng’vai gui naw hmuhchum nak bi vai ah khäng ciah shaitak pe gui ci gui.

¹⁶ Humhchum nak ami bi nak hnüüp thum lüng khäta, shin ah chang gui ang et ung om ci gui ci cu Israel gui naw hmat lawk ci gui.

¹⁷ Cun ah kyasei Israel chang gui naw tün ne hteit u ne, a hnüüp thum ung shin ah chang gui ah om nak ah mang gaw gui ah gawk ci gui. Cun gui cu Kibeon, Chephirah, Beeroth, la Kiriah Jearim ah kyak ci.

¹⁸ Cun ung phi Israel gui naw kä ngawn gui hlawt ci gui. A i ah kyasei ci ung ngami ah ami ng’vai gui naw ngami ah khan ah Israel Khanpughi Bawipa ah aming ung khäng ciah shaitak ami bi pyi ah kyak ci. Chang gui ami van cu shin ah a mawng ung ami ng’vai gui ah ma ah ng’thu m’da lawk ci gui.

¹⁹ Cun ung phi ngami naw, “Keimi naw ngami awn khäng ciah shaitak cu Israel Khanpughi Bawipa aming ung kami bi pyi ci. Cun ah kyasei kä kami ci gui khai.

²⁰ Mi shaitak om ci kyasei ngami cu mi ghin sak gui khai. Cun ah kä mi bi ung Khanpughi naw na m’kyuk gui khai.

²¹ Mi ghin sak gui khai, cun ung phi ngami naw mikmi ah phäh ah sing lak khai gui, tui than khai gui.” Cun cu ang vai gui ah m’shüm thein nak ah kyak ci.

²² Joshua naw Kibeon chang gui cu a om nak ah ami law püi gui vai ah thkbäi gui ci. Cun kawn ah ani naw ng’shi gui ci, “A i ah kyasei nami na m’hleei gui ang? A shou nak ah nami om ciah pyen u ne, shin ung nangmi nami om ciah kyak ci maw?

²³ Shin ah nami bi ah phäh ah Khanpughi naw ning m’kyuk gui ci. Nami chang gui cu angtäi sei khleihtein ah kyak khai gui. Ka Khanpughi ah theingcim hmun ah phäh ah angtäi sei sing lak khai gui, tui than khai gui.

²⁴ Ngami naw, “Kami bik khai nei, bawi aw, a i ah kyasei ci ung Bawipa nami Khanpughi naw a changshäm Moses am ang thumkhän ung, khaw avan ning pe gui ci, nami ma ung, acun ung om ciah chang avan ngami ngawn vai ah kyak ci. Shin ah kami bi cu kami ning kyih aih gui ah phäh la kami hnun gui ah kami ng’ä aih ah phäh ah kyak ci.

²⁵ Tuhbäi nami huham kyong ung kami om ci, hman ciah nami ngaih phung cu keimi awn nami bi vai nei” cik ci gui.

²⁶ Cun ah kyasei Joshua naw shikcha ah bik ci, ani naw shungshet gui ci, Israel gui naw kä ami ngawn gui vai ah pyen ci.

²⁷ Acun ung ani naw khleihtein ah phi tha gui ci, ngami naw Israel chang gui ah phäh la Bawipa ah sonkyang ah phäh ah sing shui ci gui, tui than ci gui. Tuhngawi ung phi Bawipa naw khawihnah nak vai ah a ghü nak ah hmun ung ngami naw a shin ah bi cu ci lä ci gui.