JOSHUA 8 - Cho Bible Common Language 2016

Ai Tu ne ami M’di ah Mawng

¹ Bawipa naw Joshua a pyen nak cu, “Gakap gui avan hteh püi gui ne A i ah nami hang kai vai, kä nami kyih vai, nami tha kä a ken vai. A i ghangpughang ah khan ah näng nak kei naw ka ning pe gui khai. Ani ah a chang, a mang gaw la a khaw cu nangmi ah kaa ah kyak khai.

² Nangmi naw Jerikho la a ghangpughang ah khan ah nami bi ah mäih ah Ai la a ghangpughang ah khan ah nami bi vai. Cun ung phi tuhbäi ungläi ami khawh gui la ami vuhchah gui cu nami kaa vai ah nami lak vai. Mang gaw cu a hnu täng ung ma ne ang ghit ah nami tuk vai ah nami pawng vai, ciah kyak ci.

³ Cun ah kyasei Joshua naw a gakap gui avan pawng püi ne, Ai ah hteh vai ah pawng ci. Ani naw a gakap akbäpi phya thumkip ghü neta, mü ung tüi gui ne,

⁴ shin ah m’cäi gui ci; “Mang gaw ah vangtäng ah nami ng’thuh vai, cun ung phi kä nami shawng aih vai, ng’tuk ge vah ah nami pawng vai.

⁵ Kei la ka chang gui naw mang gaw kami hei et vük khai, Ai ung chang gui lut law ne ami na tuk law gui ung, ahtük ungka ah mäih ah keimi ng’hlat ne kami dawng khai.

⁶ Mang gaw phlän ne kä kami hteh pha ah chuih ngami naw na gawt gui khai gui. Ahtük ungka ah mäih ah keimi kami dawng ciah ngami naw ngai khai gui.

⁷ Cun kawn ah nanmi naw nami ng’thuh nak ungka ng’phäi law ne mang gaw cu nami khäm vai. Bawipa nami Khanpughi naw cun ah gaw cu ning pe gui khai.

⁸ Mang gaw nami khäm kawn ah Bawipa ah thumkhän ah mäih ah mei awn nami m’khih vai. Shin gui cu nang ah thukbäi ah kyak ci.

⁹ Cun ah kiasei Joshua naw tüi gui sei, ngami cu ami ng’thuh nak vai ah hteit ne a cu ah ngäng ci gui. Cun cu Ai ah akhei täng, Ai la Bethela ah ang lak ung ah kyak ci. Joshua cu cun ah mü phung ung om ci.

¹⁰ Khaw ngawi hta ung Joshua cu tho law ne, gakap gui a täng ah khü gui ci. Ani la Israel ng’vai gui naw Ai ah hteh püi gui ci gui.

¹¹ Gakap gui cu ani awn a täng ah mang gaw m’kawt aktung täng ah hteit u ne, asiip lam Ai awn ami ng’lak khaw nawi ung phung tu ne om ci gui.

¹² Ani naw gakap phia hmakip la gui neta, mang gaw ah akhei täng Ai la Bethela ah ng’lak, ng’thuh nak ung tha gui ci.

¹³ Gakap gui cu mang gaw ah a siiptäng phung aktung ung om ne ng’tuk vai ah pawng ci gui. Cun kawn ungka gui cu akhei täng ah hteit ci gui. Joshua cu acu mü khaw nawi ung om ci.

¹⁴ Ai ghangpughang naw Joshua ah chang gui cu hmu gui neta, ang ghit ah hnüntho lawk ci. Ani la a chang gui ami van cu Jordan khaw nawi ayan ami ng’tuk nak ah hmun ung, Israel gui tuk gui vai ah hteit ci gui. Ani naw hnu täng ah ka naw ami tuk law vai cu kä hmat ci.

¹⁵ Joshua la a chang gui cu shung ci gui ah ng’khawh u ne, khaw kiang täng ah dawng ci gui.

¹⁶ Mang gaw ung om ciah chang avan naw a täng ah ami gawt tu gui vai ah ng’khü ci gui. Ngami cu Joshua gawt u ne mang gaw awn ng’shawng lawk ci gui.

¹⁷ Ai ung om ciah chang avan naw Israel gui cu gawt ci gui. Mang gaw cu ak auh ah ami nawng shüt, ghung khai a u kä om ci.

¹⁸ Cun kawn ah Bawipa naw Joshua am, “Ai mang gaw ah khan ah na htei pawng shäng ä, shin cu nang am ka ning pek ci nei” ci sei, Joshua naw a pyen ah mäih ah bik ci.

¹⁹ Ani naw a kut a shäng vai am, ng’thup ciah chang gui cu ang ghit ah tho law u ne, mang gaw kyong ah lut ne khäm ci gui. Ngami naw mang gaw cu ang ghit ah mei awn m’khih ci gui.

²⁰ Ai ung chang gui naw va mang ba u neta, khawmik ah khüt ne mei khu sei hmuk ci gui. Ngami ami phyawn nak vai lam kä om ci, a i ah kyasei ci ung ami ma ung ng’kyangtai täng ah dawng ciah Israel gui naw ng’hlat law ba ne khaai ne tu law ba gui ci gui.

²¹ Joshua la a chang gui naw vangtäng ah ami akhäm vü la mei ah uih cu hmu u neta, ng’hlat law ba ne khaai gui u ne, Ai chang gui cu ngawn gui ci gui.

²² Mang gaw kyong ah om ciah Israel gui cu dawng law ne ng’tu law tuk ci gui. Cun ah kyasei Ai ung chang gui naw, Israel gui naw khaai ne ami koi gui cu hmuk ci gui. Cun kawn ah ngami naw ami van ngawn gui ci gui. A u kä phyawng ci, a u kä ghing ci.

²³ Ai ghangpughang bäng ghing ci, ani cu pha u ne Joshua ah law püi ci gui.

²⁴ Israel gui naw ga gui cu kyang täng ung gawt tuba gui u ne, ami van ngawn gui ci gui. Cun kawn ah Ai ah hteit ba ui ne, acu ah phi ami van ngawn gui ci gui.

^25-26 Joshua naw a hteipawng cu Ai mang gaw tawk ne shäng ci. Acun ung chang gui kä ami ngawn gui pha ah chuih kä yuk chah ba ci. A cu hnüüp Ai ung chang avan ngawn ci gui, hnumi pami avan phia gha lei goi lawk ci.

²⁷ Bawipa naw Joshua am, am thein ah mäih ah Israel gui naw mang gaw kyong ungka ami khäm ah vuhchah gui la khawh gui cu ami mät ah kaa vai ah lak ci gui.

²⁸ Joshua naw Ai cu mei awn m’khih ne, di sei nawng shüt ci. Cun cu tuhngawi güt acun ah mäih ah kyak ci.

²⁹ Ani naw Ai ghangpughang cu sing ung tai neta, apumsa cu mühun güt ung nawng ci. Khohni a hang kyak yah ung Joshua naw thukbäi ne, cun ah pumsa cu k’plon sak gui ci. Cun cu mang gaw m’kawt luh nak pei ung yuk ghawt ci gui. Ngami naw cun cu lung am kawm nu gui awn pum shi ci gui, cun cu tuhngawi güt om ci.

Ebala M’htung Khan ah Thukhän Phat

³⁰ Cun kawn ah Joshua naw Ebala m’htung khan ah Israel Khanpughi, Bawipa ah hmawk ah sonkyang co ci.

³¹ Bawipa ah changshäm Moses naw Israel chang gui am, m’shümthein nak a pek gui ah mäih ah ani naw bik ci. Moses ah thukhän ung a pyen cu, “M “sii shep naw kä a ah en ah pyan ah lung sonkyang ah kyak ci. Acun ah khan ung gami naw m’khih ne khawihnah nak cu Bawipa am douthak ci gui. Ngami naw khawtsheng-douthak nak phi thak ci gui.

³² Acun ung Israel gui aw ami teng ge ah Moses ah guk ah thukhän cu, Joshua naw acun ah lung ah khan ung guk ci.

³³ Israel gui la ami ng’vai gui, bawi ui, suki gui la ami ng’lung ah om tuk ciah khuihei chang gui cu, Bawipa ah Thukhän M’küm ah vang goi vei ung, acun kawt ciah Levit taigü gui täng ah mang ne düi ci gui. Ateih naw Keriyim m’htung hnu na ne ng’düi ci gui, ateih naw Ebala m’htung hnu na ne ng’düi ci gui. Bawipa ah changshäm Moses naw shin ah abi vai ah a thumkhän gui ah mäih ah, ngami ah hmawk ah hriham ami dou nak vai ah akhin cu gawk lawk ci.

³⁴ Joshua naw thukhän avan cu akdäm ah phat ci, Thukhän ca uk ung ami guk ah mäih ah, acun ah kyong ung hriham la plah tam gui om ci.

³⁵ Moses ah thumkhän gui nü cu Joshua naw chang bum van ah ma ah phat ci. Acun ung hnumi gui la a hmaw gui ni, ami ng’lung ah om tuk ciah khuihei chang gui mah ah om ci gui.