JOSHUA 7 - Cho Bible Common Language 2016

Achan ah katnak

¹ Bawipa naw Israel ang thumkhän ah, Jerikho ungka api phi a i phi kä lak vai, m’di m’shum yawp vai, cicu kä läk ci om ci. Achan ming nak ciah chang naw cun ah thukbäi cu kä läk ci. Cun ah kyasei Bawipa cu Israel gui ah khan ah m’lungshe ci. (Achan cu Karmi ah hta, Zabdi ah tu, Zerah pahta, Judah pakhui ah kyak ci.)

² Joshua naw chang amshah cu Jerikho ungka naw A i ah tüi gui ci. Cun cu Bethela ah akyang täng, Bethaven ah pei ah mang gaw ah kyak ci, hteit ne cun ah khaw ami däät vai ah thukbäi ne a tüih gui ah kyak ci. Acun ah hteit ne ami bi kawn ah,

³ Joshua am m’thein law ba ci gui, “A i tuk vai ah chang päng a hteh vai kä hlü ci. Chang phya m’ku baw, phya thumkip baw tüih ung bä khai. Acu ah ng’tuk khai gui ah gakap avan kä na tüih vai, cun cu däm nu ciah mang gaw ah kä kyak ci” cik ci gui.

⁴ Cun ah kyasei Israel chang phya thumkip bäng ng’tuk khai gui ah hteit ci gui. Cun ung phi ngami cu ng’güt ne ana tu tuba gui u sei ng’hlat ba ci gui.

⁵ Ai chang gui naw gawt law gui u ne, mang gaw m’kawt ungka naw lung ami cawh nak ung khüt law u ne, khawgui yu kyum nak ung thumkip lei chuk ngawn gui ci gui. Israel chang gui cu ami tha maih sei kyikyawk ci gui.

⁶ Joshua la Israel ng’vai gui cu ami sui k’teek ne thüi u ne, Bawipa ah Thukhän M’küm ah ma ah kawp u ne, ami thüi ami m’dang nak ah m’vut awn ami lu bu u ne, mühun güt acun ung ng’yän ci gui.

⁷ Cun kawn ah Joshua naw, Uktu Bawipa a i ah kiasei Jordan tuinu kami kah vai ah na na law püi gui ang? Amorit gui ah kut ung na ap gui ä! Na m’di gui ä! Ai ah kiasei keimi Jordan tuinu ah vang ga ah kä kami om ang?

⁸ A i ka pyen ba hning khai aw? O Bawipa, tuhbäi Israel gui cu, ga tuk nak ung ng’hlat law pyi ci gui nei.

⁹ Kanaanit gui la shin ah khaw ung chang nü naw, cun ah mawng cu ng’yak ci gui nei. Ngami naw na khaai gui u ne, kami van na ngawn gui khai gui nei. Na ming küi m’küih nak vai ah a i na bik khai aw?”

¹⁰ Bawipa naw Joshua a pyen nak cu, “Tho law ä, a i ah kyasei m’dek ung shikcha ah na ng’yän ang?

¹¹ Israel gui hmakak ci gui nei! Kei awn ami yum ghawm ah, ami k’pan vai ah kei ah thukbäi cu plawh pyi ci gui nei. M “dimshum vai ah phyuntam ah khawh amshah cu lak ci gui nei. Ngami cu m’gu u ne, acun ah mawng ung hleei u neta ami mät ah khawh ah tha ci gui nei.

¹² Acun cu Israel gui naw ga näng ne kä ami düih nak hlawt ah kyak ci. Ngami naw ga ng’hlah tak ci gui, a i ah kyasei ci ung ami mät cu dishum nak ah phyumtam nak gah pyi ci gui nei. Kä nami lak vai cine thukbäi ung phi nami lak gui cu kä nami m’di pha ah chuih, nangmi awn a täng ah kei cu kä ka om ba khai nei!

¹³ Tho lawä! Chang gui theingthap sak gui ä! Ka ma ah ami law vai ah pawng sak gui ge ä! Ngawi ung ami pawng ge vai ah na m’thein gui vai, a i ah kyasei ci ung Kei, Bawipa Israel Khanpughi naw shin ah ka pyen ci; ‘Israel gui, kei naw m’di vai ah ka thukbäi ah khawh amshah nangmi ung om ci! Acun ah khawh ungka kä nami phyawn pha ah chuih nami ga näng ne kä nami ng’düi hlawt khai!’

¹⁴ Cun ah kyasei na m’thein gui vai, ngawi ung khaw ngawi pakhui tumat täi ah na law püi gui vai, kei naw ka tawk ah pakhui cu pahta tumat täi ah ma lam ah ami law vai. Kei naw ka tawk ah pahta cu kyong khui tumat täi ah ma lam ah ami law vai. Kei naw ka tawk ah kyong khui cu chang tumat täi ah ma lam ah ami law vai.

¹⁵ Kei naw ka tawk ah chang tumat cu phyuntam ah khaw awn a täng ah hmuh ah a kyak ung, ani cu a kyong chang gui la a khawh avan awn a täng ah mei awn m’khih vai. Cun cu anu naw Israel gui ah khan ah kyih vai ah lüng’a nak a law püi ah phäh la kei ah thukhän am shet ah phäh ah kyak ci.

¹⁶ A ngawi ung khaw ngawi hta Joshua naw, Israel gui cu pakhui ät täi ah law püi gui ci, cun ung Judah pakhui cu tawk lawk ci.

¹⁷ Ani naw Judah pakhui cu pahta ät täi ah law püi ci, Zerah pahta cu tawk lawk ci. Ani naw Zerah pahta cu kyong ät täi ah law püi ci, Zabdi kyong cu tawk lawk ci.

¹⁸ Ani naw Zabdi kyong cu chang tumat täi ah law püi ci, Karmi ah hta, Zabdi ah tu cu tawk lawk ci.

¹⁹ Joshua naw ani am, “Ka hta aw, Israel gui ah Khanpughi Bawipa ah ma ah akcang na pyen vai, na ng’yu ba vai. A i na bi cu tuhbäi na na m’thein vai. Kei ah ma ah na m’yih vai ah kä na tha nak en vai” cik ci.

²⁰ Achan naw, “Cun cu hman ci nei, kei naw Israel Khanpughi hnungtuk püi ne katnak ka bik ci nei, shin cu kei naw ka bi nei.

²¹ Mi pha ah khawh gui ungka, Babilonian suinu akiom ng’yung ät, ngui pit goi, ghui tawn apit ah vang cu ka hmuk ci. Kei naw cun gui cu ng’ya hlü aih neta ka lak ci nei. Ka phung ah akyong täng ah ka phuh cu nami hmuk khai nei, ngui cu ak um ung om khai nei.”

²² Cun ah kyasei Joshua naw chang gui tüi gui sei, ngami naw dawng ne teng u ne, phung ah ka ah phuh ah phyun khawh gui la ak um ung ngui cu hmuk ci gui.

²³ Ngami naw cun gui cu phung ah pung ah law pü u ne, Joshua la Israel gui ah ma ah law püi ne, Bawipa ah ma ah m’shän ci gui.

²⁴ Joshua la Israel chang gui am van naw, Achan ni, ngui ni, ghui ni, suinu ni cu la u neta, Achan ah a hta pami, a hta hnumi gui, a sei gui, a me gui, ang sela gui la a phung im mah ah ani ah khawh phung avan la u ne, khüikha khaw nawi ah hteh püi ci gui.

²⁵ Cun kawn ah Joshua naw, “A i ah kyasei shin ah khükha nak keimi ah khan ah na law püi ang? Tuhbäi Bawipa naw na khan ah khüikha nak law püi ci nei” cik ci. Chang avan naw Achan cu sik khai ah lung awn vawi ci gui. Akyong chang gui la a khawh gui cun phi lung awn vawi ne mei awn m’khih ci gui.

²⁶ Ngami naw ani ah khan ah lung akdäm ah pum ci gui, cun cu tuih güt acun ung om ci. Cun ah klia sei cun ah hmun cu tu ä khükha khaw nawi ah sui ci gui. Cun kawn ah Bawipa cu kä m’lungshe ba ci.