JOSHUA 6 - Cho Bible Common Language 2016

Jerikho Angkyak ah Mawng

¹ Israel gui kä ami luh hlawt vai ah Jerikho m’kawt cu ak htek ah khai ne ngäng ci gui. Mang gaw ung a u kä luh lang ci.

² Bawipa naw Joshua pyen nak ci, “Kei naw na kut ung Jerikho cu ka ning m’shum ci, Acun ung ghangpughang la nget ciah gakap gui avan mah mah ah kyak ci.

³ Nang la na gakap gui naw hnüüp ät ung hnü ät ci, hnüüp chuk ung cun ah mang gaw cu masa ne nami vein vai.

⁴ Taigüpa chih cu phyungheng kawt bäng bäng u ne, Thukhän M’küm ah ma ung ami hteh vai. A hnüüp chih hnüüp ung nang la na gakap gui naw mang gaw cu chih vei nami vein vai. Cun yah ung taigüpa gui naw phyungheng tum khai gui.

⁵ Cun kawn ah ngami naw ak aw ng’ng’shäi ah hnü ät tum khai gui. Cun nami ng’yak vai am, chang avan ng’pang tu ne nami m’lau vai. Cun ung mang gaw paang cu piawn yawp khai. Cun kawn ah gakap avan ng’phäi ne mang gaw kyong ah nami luh vai.”

⁶ Joshua naw taigü gui khü gui neta, “Thukhän m’küm nami lak vai, nangmi sing chih cu acun ah ma ung phyungheng gui kawt ne nami hteh vai” cine m’cäi gui ci.

⁷ Cun kawn ah ani naw a chang gui cu, mang gaw ami vein ge vai ah k’bäi gui ci, ma ciah gakap gui cu Bawipa ah Thukhän M’küm kawt ci gui ah ma ung ami hteh vai.

^8-9 Cun ah Joshua naw thu akbäi vai am, ma ciah gakap gui cu phyungheng tum ciah taigü gui ah ma ung hteit ci gui. Ngami ah hnu ah Thukhän M’küm kawt ciah taigü gui lawk ci gui, hnu ciah gakap gui naw läk lawk ci gui. Acun yah ah pum ung phyungheng cu tum ci gui.

¹⁰ Cun ung phi Joshua naw a chang gui kä ami m’lau vai ah k’bäi gui ci. Ng’thukbäi nak kä a peit pha gui ah chuih m’kha ät ah phi kä ami chiu vai ah pyen ci.

¹¹ Cun ah kyasei shin ah chang bum gui am, Bawipa ah Thukhän M’küm la ne mang gaw hnü ät ami vein vai ah m’thein gui ci. Cun kawn ah ngami cu phung ah law ba ne, acun ung acu mü ip ci gui.

^12-13 A ngawi ung khaw ngawi Joshua cu tho law ngawi ci, taigü gui la gakap gui cu, ayanta thukbäi ah mäih ah thukbäi awn ak hnih vei nak ah mang gaw cu veing ba ci gui; akhtükbäih ah gakap gui ma ci gui, phyungheng chih tum ciah taigü chih naw tawi ci gui, cun kawn ah Bawipa ah Thukhän M’küm kawt ci gui hteit u sei, ak hnu ah hnukhüm gakap gui hteit ci gui. Acun yah ah pum phyungheng cu tum ci gui.

¹⁴ A hnüüp goi nak ung phi ngami cu mang gaw hnü ät veing ba u neta, ami phung ah hteit ba ci gui. Ngami naw ashin ah mäih ah hnüüp chuk ung bik ci gui.

¹⁵ A hnüüp chih hnüüp kä thai pha sei tho law u ne, mang gaw cu chih vei veing ci gui, cun ah ngami naw chih vei ami vein cu shin ah hnüüp ät bäng ah kyak ci.

¹⁶ A chih vei nak ami vein law ung taigü gui naw phyungheng tum u sei, Joshua naw a chang gui ami m’lau vai ah thukbäi ne a pyen cu, “Bawipa naw mang gaw ning pe gui ci nei!

¹⁷ Mang gaw la mang gaw kyong ah om ci nü m’di yawp vai nei. Cun cu Bawipa am douthak ah kyak ci nei. Chang plet Rahab ah kyong khui chang phung k’phyawn vai nei, a i ah kyasei ci ung ani naw mi ng’däät sak ah chang gui cu k’phyawn gui ci nei.

¹⁸ Cun ung phi m’di vai phung cu api phi kä nami lak vai, nami lak ah a kyak ung khüikha nak la dishum nak cu Israel chang phung ung nami law püi ciah kyak khai.

¹⁹ Ngui, ghui, kyei la m’sii awn pyan phung cu Bawipa ah phäh ah nami tha vai. Cun cu Bawipa ah m’küm ung gim vai kyak ci.

²⁰ Cun ah kyasei taigü gui naw phungheng tum ci gui. Chang gui naw cun ami ng’yak vai am, ang shan ah m’lau ci gui, cun ung mang gaw paang cu pyawn ne kya lawk ci. Gakap gui avan naw khogui ung khüt sei, mang gaw ung lut ne khäm ci gui.

²¹ Mang gaw ung om ciah pami, hnumi, a hmaw ang vai, chang nünü ngawn yawp ci gui. Sei ni, me ni, ng’se la gui phi ngawn yawp ci gui.

²² Cun kawn ah Joshua naw ng’däät ciah chang goi cu m’thein goi ne, “Plet ciah hnumi ah im ah lut ni neta, nani shaitak te ah mäih ah ani la akyong chang gui cu na ni law püi vai” cik ci.

²³ Cun ah kyasei ngani hteit ni ne, Rahab law püi ni ne, anu la apa ni, a phäi nau gui la a kyong chang gui avan law püi ci goi. Ngami naw ami kyong chang la ami changshäm gui ami van law püi u ne, Israel gui ah phung pei ah phyawng khai gui ah tha gui ci gui.

²⁴ Cun kawn ah ngami mang gaw avan m’dek ah gawk khai ah mei awn m’khih u ne, akyong ah om ci nü phi m’khih ci gui. Ngui ni, ghui ni, kyei ni, m’sii ni awn ami pyan gui bäng pawih na u ne Bawipa ah m’küm ung tha ci gui.

²⁵ Cun ung phi Joshua naw chang plet Rahab la a mätyah gui avan k’phyawn gui ci, a i ah kyasei ci ung ani naw ng’däät ciah chang hnih Jerikho ah a tüih goi yah ung a thuh goi ah phäh ah kyak ci. (Ani ah a hta ng’shon gui cu tuhngawi Israel khaw ung om ci gui.)

²⁶ Cun yah ung Joshua naw kükyang ciah m’thein nak pe gui ci.” Tuhchü Jerikho mang gaw cawh ba vai ah tha nak ci phung cu Bawipa ah plahtaam nak ah aka ung om khai nei. Angneei co ciah chang phung cu, a hta ng’vaipi chük khai nei; Am kawt co ciah chang phung cu, a hta hmawpi chük khai nei.”

²⁷ Cun ah kya ne Bawipa naw Joshua cu om püi sei, ani ah ming cu khawpäng avan ung thang ci.