JOSHUA 5 - Cho Bible Common Language 2016

¹ Jordan ah akhei täng ungka Amorit ghangpughang gui ami van, Mediterranean tuinu yung ah om ciah Kanaanit ghangpughang gui am van naw, Israel chang gui naw kä ami kah yawp pha ah chuih, Bawipa naw Jordan tuinu a hu sak cu ng’yak ci gui. Ngami cu kyikyawk u ne, Israel gui ah phäh ah ami tha maih yawp ci.

Kilkal ung Vun-ah nak

² Cun kawn ah Bawipa naw Joshua a pyen nak cu, “Lung m’ghai khim pyang ne Israel gui cu vun-ah nak na pek gui vai.

³ Joshua naw Bawipa ah thumkhän ah mäih ah bik ci. Ani naw Israel gui cu vun-ah nak pe gui ci, cun ah hmun cu vun-ah m’htung ah pyen ci gui.

^4-6 Israel gui naw Egypt ami hteh tak yah ung, pami gui ami van vun ami ah gui pyi ah kyak ci. Cun ung phi ngami naw bungpuk ami kan yah ung, kum phlikip ah kyong ung, a u a hmaw pami phi vun-ah nak kä pe ba ci gui. Egypt khaw ami hteh tah yah ung ng’tuk bi hning khai ah chang gui phung cu acun ah khin ung si yawp ci gui, a i ah kyasei ci ung ngami cu Bawipa kä ami ngaih ah phäh ah kyak ci. Ani ah thutaam ah mäih ah ani naw ami pupa gui am shai atak ah bühmang ne ang’lei nik ciah khaw cu ngami am kä hmuh tu sak gui ci.

⁷ Cun ah chang gui ah ami hta gui cu vun-ah nak kä pek gui pha ah kyasei, shin ah ng’shon thai gui am Joshua naw vun-ah nak pe gui ci.

⁸ Vun-ah nak ami bi kawn ah pakhui ami van cu vun ami ah a khan güt phung ung om ci gui.

⁹ Bawipa naw Joshua a pyen nak cu, “Egypt ah changshäm ah kya ne nami thüi nak ungka, tuhngawi kei naw ka ning ng’nawn sak gui ci.” Cun ah kyasei cun ah hmun cu Kilkal ah ami sui ah kyak ci, cun cu tuh güt om ci.

¹⁰ Israel gui cu Jerikho ah pei Kilkal khawdou ung ami om yah ung, cun ah cha a hnüüp gha lei phli hnüüp phyawn nak pawi bik ci gui.

¹¹ A ngawi yung cu Kanaan khaw ungka geit ami ei nak htük ah kyak ci. Cun cu htang hlaw la k’caw kä shum ah m’htut ah kyak ci.

¹² Manna m’htut kä kya law ba ci, cun kawn ah Israel gui naw kä gah ba ci gui. Cun ah khin ung tün ne Kanaan khaw ah geit ei ci gui.

Joshua la Khimsem Kawt ciah Chang

¹³ Joshua cu Jerikho pei ah a om yah ung Khimsem kawt ne amät täng ah ng’düi ciah chang cu ang ghit ah hmuk ci. Joshua naw ama ah hteit neta ang shi cu, “Nang cu kei ah gakap ang, keimi ah ga ang?”

¹⁴ Cun ah chang naw, “Ka nei, Kei cu shin ung Bawipa ah gakap bawi ah ka kyak ci nei” cik ci. Joshua naw m’dek ung bawp ne khawihnah neta, “Bawi aw, kei cu na na changshäm nei, a i ka bi vai ang na ng’yak hlü?” cine ng’shik ci.

¹⁵ Bawipa ah gakap bawi naw pyen nak ci, “Na phahnak suut ä, nang cu atheingcim hmun ung na ng’düi ci nei.” Ani naw a pyen ah mäih ah Joshua naw bik ci.