JOSHUA 4 - Cho Bible Common Language 2016

Shüm nak ah Lungtung gui Ng’ling ci gui

¹ Pakhui avan naw Jordan tuinu ami kah awn ah Bawipa naw Joshua a pyen nak cu,

² “Pakhui ät ungka tumat ciah chang gha lei goi na ghü vai,

³ Na thumkhän gui vai, Jordan tuinu anglung, taigü gui ah düih nak ungka lung gha lei goi ami lak vai, cun ah lung gui cu kawt u ne, tuhmü phung ami tuk nak vai ung ami tha vai ah na pyen nak gui vai.”

⁴ Joshua naw a ghü ah chang gha lei goi cu khü gui neta,

⁵ a pyen nak gui cu, “Bawipa nami Khanpughi ah Thukhän M’küm ah ma ah va ma ne Jordan tui ah hteit vä. A chang sing naw lung tumat ci la ne nami phleing ung nami kawh vai. Tumat cu Israel pakhui tumat ciah phä ah kyak khai.

⁶ Bawipa naw a i a bi cu shin ah lung gui naw chang gui am m’shüm thein khai gui. Ngawi ah nami hta gui naw shin ah lung gui cu a i nami citu tukhan ang cine ami ng’shi ah a kyak ung,

⁷ Bawipa ah Thukhän M’küm naw tuinu a kan yah ung, Jordan tuinu cu alon nak ung ng’düm ci, cine nami m’thein gui vai. Shin ung a i ah kya te ci, cicu shin ah lung gui naw Israel chang gui am angtäi sei m’shüm thein khai gui.”

⁸ Joshua ah thukbäi cu chang gui naw läk ci gui. Bawipa naw Joshua ang thumkhän ah mäih ah ngami naw Jordan tuinu anglung ungka lung tumat ci lak ci gui. Israel pakhui tumat ah phäh ah tumat ciah kyak ci, ami phung tuk nak ah hteh püi u neta a cu ah tha ci gui.

⁹ Joshua naw phi lung gha lei goi cu Jordan ah tuinu ah anglung ung ng’ling ci. Cun cu Thukhän M’küm kawt neta taigü gui naw ami düih nak ah hmun ah kyak ci. (Cun ah lung gui cu atuhgüt acun ung om ci.)

¹⁰ Chang gui naw ami bi vai am thein gui vai ah Bawipa naw Joshua am ang thukbäi a päng kä ang pyi pha ah chuih, taigü gui cu Jordan tuinu ah anglung ung düi ci gui. Cun cu Moses naw ang thumkhän ah kyak ci. Chang gui naw ang ghit ah tuinu cu kat ci gui.

¹¹ Ngami ami van vang gaa ah ami va kai kawn ah Bawipa ah Thukhän M’küm kawt ciah taigü gui cu chang gui ah ma ung hteit ba ci gui.

¹² Reuben, Kad pakhui gui la Manasseh pakhui ungka amshah gui cu ng’tuk ge vai ah pawng u ne, Moses naw ami bi vai ah am thein gui ah mäih ah pawih ba ciah chang gui cu mata gui ne hteit ci gui.

¹³ Bawipa ah ma ah chan phya phlikip cu ng’tuk vai ah ng’düi ge u ne, Jerikho pei ah khawdou cu phlän ne hteit ci gui.

¹⁴ Cun ah hnüüp ung Bawipa naw abi gui naw, Joshua cu chang m’gäi ah kyak ciah Israel chang gui naw ami k’bäi vai ah kyak sak ci. Ngami naw Moses ami m’tamkhah man ah mäih ah ani cu a ghin yah ah pum tamkhah ci gui.

¹⁵ Cun kawn ah Bawipa naw Joshua a pyen nak cu,

¹⁶ Thukhän M’küm kawt ciah taigü gui Jordan ungka ami kai law vai ah, thumkhän a pek gui vai ah kyak ci.

¹⁷ Joshua naw acun ah bik ci,

¹⁸ taigü gui tuikam ah ami gawk law kawn ah tuinu cu long ba ne tuikam avan plüm ba ci.

¹⁹ A cha ät nak ah a hnüüp gha hnüüp ung chang gui naw Jordan tuinu cu hei kat u neta, Kilkal ung phung tuk ci gui, cun cu Jerikho a kyangtäng ah kyak ci.

²⁰ Jordan tuinu ungka ami law püi ah lung gha lei goi cu Joshua naw acun ung ling ci.

²¹ Ani naw Israel chang gui a pyen nak gui cu, “Ngawi ah shin ah lung gui cu a i ni mä cine nami hta gui naw ami ning shi gui ah a kyak ung,

²² Israel gui naw khonglei hu ung Jordan tuinu ami kah ah mawng nami m’thein gui vai nei.

²³ Nang mi naw kä nami kah yawp pha ah chuih, Bawipa nami Khanpughi naw, nami hmawk ah Jordan tui a hu sak ah mawng, cu nami m’thein gui vai nei, cun cu mikmi ah hmawk ah tuisen tuinu a hu sak ah mäih ah kyak ci nei.

²⁴ A shin ah phäh ah m’dek khan ung om ciah chang päng naw, Bawipa ah a huham a i hlawk ah däm ci, cicu hmat khai nei, nangmi naw Bawipa nami Khanpughi cu khonglän ung nami m’tamkhah vai nei.”