JOSHUA 3 - Cho Bible Common Language 2016

Israel Chang gui naw Jordan Tuinu Kat ci gui

¹ A ngawi ung khaw ngawi hta Joshua la Israel chang ami van cu tho law ngawi ci gui. Akaciah ung ami phung cu hteh ta u ne, Jordan tuinu ah hteit ci gui, Cun cu tui kah vai ah ami ngäng yah ung ami om nak ah phung ah kyak ci.

² Hnüüp thum a lüng kawn ah ami ng’vai gui naw phung cu plän ne hteit u neta,

³ Chang gui cu pyen nak ci gui, “Taigü gui naw, Bawipa nami Khanpughi ah Thukhän M’küm ami kawh nami hmuh ah a kyak ung phung gäi neta nami läk gui vai.

⁴ Cun kawn ah shin ung kä nami om ba vai, ngami naw hteh nak vai lam ning m’shüm gui khai gui. Cung phi thukhän küm kä nami et vai, mäng m’cawt shawng ne nami om vai.”

⁵ Joshua naw chang gui am, “Nami theingthap vai nei, a i ah kyasei ci ung ngawi ung Bawipa naw nami ng’lung ah cäi aih vai cu bi lawk khai nei.”

⁶ Cun kawn ah ani naw taigü gui cu Thukhän M’küm kawt ne chang gui ah ma ung ami hteh vai ah pyen na gui sei, a pyen ah mäih ah bik ci gui.

⁷ Bawipa naw Joshua am, “Tuhngawi kei ah bilawh naw Israel chang avan cu, nang chang m’gäi ah ami ning m’tam vai ah kyak sak gui khai. Cun awn ah kei naw Moses ka om püi ah mäih ah ka ning om püi cu na hmat lawk khai nei.

⁸ Thukhän M’küm kawt ciah taigü gui cu na pyen nak gui vai, tui ung mi gawk ah a kyak ung, tui ung va ng’leh neta tui kam ung ami ng’düih vai.”

⁹ Cun kawn ah Joshua naw chang gui am, “Shin ung law vä, Bawipa nami Khanpughi ah pyen cu ngai law vä.

¹⁰ Nangmi nami gawk law ah a kyak ung ani naw, Kanaanit gui, Hittit gui, Hivit gui, Perizzit gui, Kirkashit gui, Amorit gui la Jebisit gui cu k’täm gui khai. Ghing ciah Khanpughi nami ng’lung ah om ci, cicu nami hmat klawk khai.

¹¹ Khomdek avan ah Bawipa ah Thukhän M’küm naw Jordan tui cu nami ma ung a hei kah ah a kyak ung,

¹² tuhbäi Israel chan gha lei goi nami ghü vai, pakhui tumat ungka tumat ciah kyak khai.

¹³ Khomdek avan ah Bawipa ah Thukhän M’küm kawt ciah taigü gui naw ami khaw awn tui ung ami ng’leh ah a kyak ung, Jordan tui a lon cu düm khai, long ciuah tui cu vangtäng ah ng’bum yawp khai.”

^14-15 Cun cu geit khäm khin ah kia ne tui phi däm ci. Chang gui naw Jordan tui kah vai ah phung ami hteh tak yah ung taigü gui cu Thukhän M’küm kawt ne ma ne hteit ci gui. Taigü gui tui ung ami ng’leh vai am,

¹⁶ tuinu cu kä long ba ne ng’düm ne hang bäm ci, Zarethan ah pei, Adam mang gaw güt ah hang li ci. Tuisen tuinu ung yu kyum ciah tuinu cu pit ne sün sei, chang gui cu Jerikho pei ah va kai ci gui.

¹⁷ Chang gui ng’lei ak hu ung ami hteh yah ung, Bawipa ah Thukhän M’küm kawt ciah taigü gui cu, Jordan tuinu ah ang lung ng’lei hu ung changh avan naw ami hei kah güt ung ng’düi ci gui.