JOSHUA 24 - Cho Bible Common Language 2016

Shekhem Chang gui am Joshua naw Thu Pyen ci

¹ Joshua naw Israel pakhui avan cu Shekhem ung k’bum gui ci. A ni naw Israel gui ah ami gham hta gi, angvai gui, suki gui la bawi gui cu khü gui sei, ngami cu Khanpughi ah om nak ung hteit ci gui.

² Joshua naw chang gui avan am, “Shin cu Bawipa, Israel Khanpughi naw a pyen ah kyak ci,” Cau pui nami pupa gui cu Euphratis tuionu ah van ga ung om u ne, a hei khanpughi gui khawihnah man ci gui. Nami pupa tumat cu Terah, Abraham la Nahor ah pa ah kyak ci.

³ Cun kawn ah kei naw nami pughi Abraham cu Euphratis kaan nak ah khaw ungka la ne, Kanaan khaw avan ung ka gawk sak ci. Kei naw ani am htangshon akda ka pek ci. Issak ka pek ci.

⁴ Isaak ungka naw Jakob la Esau ka pek ci. Kei naw Esau am a kaa nak vai ah Edom khawgui ka pek ci. Cun ung phi nangmi ah pupa Jakob la a hta nau gui cu Egypt khaw ah hteit ci gui.

⁵ Cun kawn ah Moses la Aaron ka tüi goi ci. Egypt gui ah khan ah kyihkyawk vai akdäm ka law püi ci. Cun ung phi nangmi cu akpung ah ka ning khah püi gui ci;

⁶ Kei naw nami pupa gui cu Egypt khaw unka k’plawk ne, ka hteh püi gui ci. Egypt chang gui naw yatha gui la ng’sela gui awn, gawt law gui ci gui. Cun ung phi nami pupa gui cu tuisen tuinu ung ami gawk law sangung,

⁷ ngami naw ka m’htei gui vai ah kyap ne ng’khü u sei, kei naw hmüpnak cu ngami la Egypt chang gui ah ng’lak ung ka tha ci. Kei naw tuinu cu Egypt chang gui ah khan ah long khai ah ci ngäsei, tui naw hteh gui ci. Kei naw Egypt ah khan ah a i ah ka bi cu nangmi naw nami hmat ci. “‘Nangmi bungpuk ah aksho nami om ci.

⁸ Cun kawn ah kei naw Amorit khaw ungka ka ning law püi gui ci, ngami cu Jordan ah a kiangtäng ung om ci gui. Ngami naw ning tu gui ci gui, Cun ung phi ngami ah khan ah näng nak ka ning pe gui ci. Nangmio naw ami khaw nami lak ci, kei naw ngami cu nami ma ung ka m’di gui ci.

⁹ Moab ghangpughang Zippora ah hta Balak naw tu ne ning hnungtuk püi gui ci. Ani naw Beor a hta Balaam am ng’thu m’shäk ne, nangmi a ning phyuntam gui vah k’thäh ci.

¹⁰ Cun ung phi kei naw Balaam ah ng’thu kä ka ngai ci, cun ah kyasei ani naw hriham ning pe gui ci, a cu cha ah kei naw Balak ah kut ung ka ning gung gui ci.

¹¹ Nangmi naw Jordan tuinu kat ne, Jerikho ung nami gawk ci. Jerikho chang gui naw ning tu gui ci gui, Amorit, Perizzit, Kanaanit, Hittit, Kirkashit, Hivit, la Jebusit gui naw phi ning tu gui ci gui. Cun ung phi cun gui ami van ah khan ah näng nak ka ning pe gui ci.

¹² Nami ma ge ung ngami cu püpiang sak gui ne, Amorit ghangpughang hnih cu kei naw ka k’täm ci. Nami khim la nami li naw cun ung a i kä bik ci.

¹³ Kei naw nangmi am kä nami chuk vook man ah khaw ka ning pe gui ci, kä nami cawh ah mang gaw gui ka ning pe gui ci, tuhbäi nangmi acu ah nami om ci, kä nami geit ah sapyit theih gui nami ei ci, Oliv phi kä nami geit ah ghing ungka nami gah ci.”

¹⁴ Tuhbäi cun kawn ah, Joshua naw k’täi ne, “Bawipa cu m’tamkhah ne kyäp nep nak la bekhüt nak awn abii nami bi vai. Egypt la Mesopotamia khaw ah nami pupa gui naw ami khawihnah man ah khanpughi gui cu nami phyawn nak gui vai, Bawipa bäng ah khut nami bi vai.

¹⁵ Ani ah bii bi vai cu kä nami ng’yak hlü ah a kyak ung, a u ah bii bi vai cu tuhngawi nami phukpit vai. Mesopotamia ah nami pupa gui ah khawihnah man ah khanpughi gui ang? Tuhbäi nangmi naw nami om nak ah khaw mah gui, Amorit gui ah khanpughi gui ang? Kei la ka kyongchang läi naw Bawipa ah bii kami bik khai nei.”

¹⁶ Chang gui naw m’shang ba u ne, “Keimi naw a hei Khanpughi ah bii bi vai ah Bawipa cu kä kami nawng khai nei!

¹⁷ Bawipa kami Khanpughi naw keimi la kami pa gui cu, Egypt khaw ah khleihtein ungka, na k’plawk ba gui ci nei, ani naw am dang ah cäi aih vai gui cu kami hmuk ci nei. Keimi naw kami kaan law ah chang pakhui gui avan ah ng’lung ah kami hteh nak päng ung ani naw k’pang ne na k’phyawn gui ci nei.

¹⁸ Kei shin ah khaw ung kami gawk law yah ung shin ung om ciah Amorit gui ami van cu Bawipa naw k’täm gui ci. Cun ah kyasei keimi phi Bawipa ah bii kami bik khai nei, ani cu kami Khanpughi nei” cik ci gui.

¹⁹ Joshua naw chang gui am, “Cun ung phi nangmi cu Bawipa ah bii bi vai ah kä nami khin khaa ci nei. Ani cu theingciim ciah Khanpughi ah kya ne, nangmi ah hmakat nak cu kä ning m’geinsei gui khai. Ani naw ng’kükneet püi ci a u phi kä m’gein ci,

²⁰ nangmi naw a khaw hei khanpughi gui khawihnah vai a, ani nami hteh tak ah a kyak ung, ani naw ng’hlat ne ning hnungtuk püi gui khai, ning m’kyuk gui khai. Ani cu yanä nangmi ung ani man pang ung phi, ani naw ning m’di gui khai.”

²¹ Chang gui naw Joshua am, “Ka nei. Keimi naw Bawipa ah bii kami bik khai nei” cik ci gui.

²² Joshua naw ngami am, “Akcang ah nangmi ung nami mät cu saksi ah kia u ne, nangmi naw Bawipa ah bii bi vai ah nami ghü ci nei” ci na gui ci. Ngami naw, “ä, keimi cu saksi gui nei” cik ci gui.

²³ “Cun ung nangmi ung om ciah a khaw hei khanpughi gui cu nami nawng vai nei” ci neta, ani naw k’thäh gui ne, Bawipa Israel Khanpughi ah ma ah nami bekhüt nak cu nami ng’kham vai nei” cik ci.

²⁴ Cun kawn ah chang gui naw Joshua am, “Keimi naw Bawipa kami Khanpughi ah bii cu kami bik khai nei. Ani ah thumkhän cu kami läk khai nei” cik ci gui.

²⁵ Acun ah hnüüp ung Joshua naw chang gui ah phäh ah thukhän bik ci. Acun ung Shekhem ung ami läk vai ah thukhän gui la m’hnütbäi nak gui cu pe gui ci.

²⁶ Joshua naw shin ah thumkhän gui cu Khanpughi ah thukhän ca uk ung guk ci. Cun kawn ah ani naw lung amkawm la neta, Bawipa ah theingcim ciah hmun Oak sing ghing ka ah ng’ling ci.

²⁷ Ani naw chang gui am, “shin ah lung cu mikmi ah saksi ah kyak ci, Ashin naw Bawipa naw ana ng’htau püi gui ah ng’thu avan cu ng’yak ci nei. Cun ah kia ne shin naw nangmi ning hnungtuk püi gui ne saksi ci nei, nami Khanpughi nami hnungtuk püi nak vai ungka ning k’pang gui ci nei” cik ci.

²⁸ Cun kawn ah Joshua naw chang gui cu tüi ba gui sei, chang päng cu ami khaw phäh phäh ah hteit ba ci gui.

Joshua la Eleazar Sik ci goi

²⁹ Cun kawn ah Nun ah hta Joshua, Bawipa ah changshäm cu a khokum phia la gha ung sik ci.

³⁰ Ani cu amät ah khaw ah kyak ciah Kaash m’htung ah asiip, Ephraim khawgui, Timnah Serah ung phuh ci gui.

³¹ Joshua a ghin yah a chuih ung Israel chang gui naw Khanpughi ah bii bik ci gui. Ani asih kawn ah phi ngami naw k’täi ne bik ci gui. Bawipa naw Israel gui ah khan ah a bi päng ami mät naw hmu tuk ciah ami ng’vai gui ami ghin ah chuih acun ah bik ci gui.

³² Joshua ah a pumsa, Israel chang gui naw Egypt ah ka ami law püi ba cu, Shekhem ung phuh ci gui. Cun cu Jakob naw Shekhem ah pa, Hamora ah hta gui ah a hleih ah khawbung ah vang ah kyak ci, ngui phia awn a hleih ah kyak ci. Cun ah khaw cu Joseph ah htangshon gui naw khui m’düng ci gui.

³³ Aaron ah hta Eleazar cu si sei Kibeah ung phuh ci gui. Cun ah gawnu cu Ephraim khawgui ung om ci, cun cu a hta Phinehas am a pek ah kyak ci.