JOSHUA 23 - Cho Bible Common Language 2016

Joshua ah Gidam nak Ng’thu

¹ Shohta khäta Bawipa naw, Israel gui cu koi gui ne om ciah ami ga gui ungka shungvong gui ci. Cun yah ung Joshua cu anghtei ah ghi lawk ci.

² Cun ah kyasei ani naw Israel gui ami van a ghi gui, angvai gui, suki gui la ami bawi gui khü gui neta a pyen nak gui cu, “Kei cu ka ghi law aih ci,

³ Bawipa nami Khanpughi naw nangmi ah bi nak awn shin ah pakhui gui avan ah khan ah a päng a bi cu nangmi naw nami hmu pyi ci. Bawipa nami Khanpughi naw nangmi ah phäh ah ng’tuk bik ci.

⁴ Kei naw om ba ciah pakhui gui ah khaw phi, nangmi ah pakhui naw nami kaa nak vai ah ka ning pe gui ci, Kei naw ka näng pyi ah pakhui khaw avan phi ka ning pe gui ci, cun cu a kiangtäng ung Jordan tuinu ung khüt ne, akhei täng ung Mediteranean tuinu ung khüt ci.

⁵ Bawipa nami Khanpughi naw nangmi ungka naw ng’hlah ba sak gui khai, namima ung a hei ah ktäm gui khai. Bawipa nami Khanpughi ah shaitak ah mäih ah nangmi naw nami khaw cu nami kaa nak khai.

⁶ Cun ah kyasei geing na ne nami läk vai, Moses ah thumkhän ca uk ung ami guk phung cu nami bi vai. Api phi kä nami nawng en vai.

⁷ Nami ng’lung ah pawih ba ciah shin ah chang gui awn kä nami guigong vai, ami khanpughi gui ah ming kä nami pyen tu vai, acun gui ah ming awn kä nami ng’phyun vai, cun ah khanpughi gui kä nami khawihnah vai, ami ma ah kä nami m’khuukdong vai.

⁸ Cun kan vaisü ung tuhbäi ung khüt sei nami om ah mäih ah Bawipa ung nami bekhüt vai.

⁹ Bawipa naw däm ne huham mah ciah pakhui gui cu namima ung k’täm pyi ci. Nangmi nin hnungtuk püi gui ne a u phi kä düi hning ci.

¹⁰ Nangmi ungka chan tumat naw chang phia khak dawng khai ah bi hning ci, a i ah kyasei ci ung a shaitak ah mäih ah Bawipa Khanpughi naw nangmi ah phäh ah ng’tuk bik ci.

¹¹ Cun kawn ah nami geing nak vai, Bawipa nami Khanpughi nami m’hni vai.

¹² Nangmi cu kä bekhüt ne, nami ng’lung ah om ba ciah shin ah pakhui gui awn, nam ing’dawn tu ah a kyak ung, ngami awn nami chungla ah a kyak ung,

¹³ nangmi ung ckcang ah, Bawipa nami Khanpughi naw shin ah pakhui gui cu nami ma ung kä k’täm gui khai. Cun kan vaisü ung ngami cu nangmi ah hmawk ah kyihkyawk vai ah kyak khai, m’hling, khui, nami pang ung thah mäih ah, nami mik ung ng’hling ah mäih ah kyak khai gui. Cun gui cu Bawipa nami Khanpughi naw a ning pek gui ah shin ah khaw ni ung, nangmi a u phi kä nami om ba güt ung kä ng’pyi khai nei.

¹⁴ “Tuhbäi kei ka sih nak vai ah akhin gawk lawk ci nei. Nangmi chang päng naw am lung kyong, a ngaih kyong ung nami hmat ci, Bawipa nami Khanpughi naw a shaitak ah mäih ah akni phung avan ning pe gui pyi ci. Ani naw a shaitak phung cu pang kheng geng ci, tumat phi kä yu kyak ci.

¹⁵ Ani naw shai atak päng pang ne, nangmi ung bii bik ci, cun ah kyasei ani naw shedam nak päng law püi khai.

¹⁶ Bawipa nami Khanpughi naw nami pan vai aha ning thumkhän gui ah thukhän cu kä nami k’pan ah a kyak ung, a hei khanpughi gui ah a khut bi ne, nami khawihnah ah a kyak ung, ani naw am lungshe nak awn ning m’kyuk gui khai. Acun ung nangmi tumat phi, a ning pek gui ah shin ah khawni khaw ung kä nami law ba ge khai.”