JOSHUA 22 - Cho Bible Common Language 2016

Joshua naw Akyang täng Pakhui gui cu Ami Im ah Tüi gui ci

¹ Joshua naw Reuben, Kad la a kyangtäng Manasseh pakhui gui cu a täng ah khü gui ci.

² Ani naw ngami am, “Bawipa ah changshäm Moses naw, bi vai ah ng’thu akbäi phung cu, nangmi naw nami bi pyi ci, kei ah thumkhän avan phi nami läk ci.

³ Shin ah khin avan ung nangmi naw nami Israel paw gui cu kä nami nawng gui ci. Nangmi naw geing na ne Bawipa nami Khanpughi ah thumkhän cu nami läk ci.

⁴ Tuhbäi a shaitak ah mäih ah Bawipa nami Khanpughi naw nami Israel paw gui am ding gei nak pe gui ci. Cun ah kyasei nami kaa nak vai ah klhaw, nami im ung hteit ba vä. Cun cu Bawipa ah changshäm Moses naw a ning pek gui ah Jordan ah a kyangtäng khaw ah kyak ci.

⁵ Moses naw a ning thumkhän gui ah thukhän cu ng’hteicha khai ah nami läk vai. Bawipa nami Khanpughi cu nami m’hni vai, angyak hlü ami bi vai, ang thumkhän nami läk vai, ani ung nami bekhüt vai, nami m’lung kyong ghin nak avan awn akhuut nami bi vai” cine m’cäi gui ci.

^6-8 Joshua naw hriham pe gui ne ami im ah tüi ba gui neta, shin ah m’cäi gui ci, “Nangmi cu ang htei ah bühmang ne, nami im ah nami hteit ba ci, vuhchah akda, ngui, ghui, kyei, m’sii la suisak akda nami hteh püi ci. Nami ga gui ah kaa nami lak gui cu nami pakhui chang paw gui am nami pai tu gui vai” ciah kyak ci. Cun kawn ah ngami cu ami im ah hteit ba ci gui. Moses naw Jordan a kyangtäng khaw cu Manasseh pakhui ateih am pe gui ci. Cun ung phi a hei ateih am Joshua naw Jordan akhei täng khaw cu a hei pakhui gui awn ngtäi khai ah pe gui ci.

⁹ Cun ah kyasei Reuben, Kad la Akiang täng Manasseh pakhui gui cu amiim ah hteit ba ci gui. Ngami naw Kanaan khaw Shilon ung pawih ciah Israel gui cu nawng shüt gui ci gui. Cun ung tün ne ami mät ah khaw, Kilead khaw ung ng’tün ci gui. Cun cu Bawipa naw Moses ung ang thumkhän ah mäih ah ngami naw ami läk ah kyak ci.

Jordan Pei ah Sonkyang

¹⁰ Reuben, Kad la a kyangtäng Manasseh pakhui gui cu Keliloth, Jordan ah akhei täng ung gawk law u neta, ngami naw tuinu kem ung akdäm angtai ah sonkyang cu co ci gui.

¹¹ Pawih shüt ciah Israel chang gui am, ami m’thein gui cu, “Ngai vä! Reuben, Kad la a kyangtäng Manasseh pakhui gui naw Jordan tuinu ah mikmi täng, Keliloth ung sonkyang co ci gui nei” ciah kyak ci.

¹² Cun cu Israel chang gui naw ng’ya u neta, chang bum avan Shilon ung law u ne, a kyangtäng pakhui gui ng’tuk püi gui vai ah pawng ci gui.

¹³ Israel chang gui naw taigü Eleazar ah hta Phinehas cu Kilead khaw, Reuben, Kad la akyang täng Manasseh pakhui chang gui ah tüi ci gui.

¹⁴ Phinehas awn a täng ah ng’vaihta gha hteit tuk ci gui. Akhei täng pakhui gui ungka, khui ät ung tumat ciah kyak ci, cun gui cu pahta kyong chang ungka, ami ng’vai tumat ciah kyak ci.

¹⁵ Ngami cu Kilead khaw Reuben, Kad la Akyang täng Manaseeh chang gui ah law u neta,

¹⁶ Bawipa ah chang bum avan ah phäh ah ng’thu pyen ci gui. Ngami naw ami pyen nak gui cu, “A i ah kyasei nangmi naw Israel Khanpughi hnungtuk püi ne, akshe nami bi ang? Nangmi naw nami mät ah hmawk ah shin ah sonkiang nami cawh nak awn Bawipa cu nami hnungtuk püi ci nei! Nangmi naw ani cu kä nami läk law ba ci nei!

¹⁷ Peor ung mi katnak cu nami shüm ba vai, Bawipa naw amät ah chang gui cu leigai awn m’kyuk gui ciah kä kya ne ang? Acun cu tuh güt mikmi naw mi yaica nak ci, Cun ah katnak cu kä ng’büh ne ma?

¹⁸ Tuhbäi nangmi ani läk vai ah nami mak khai ma? Tuhngawi nangmi naw Bawipa nami hnungtuk ciah a kyak ung, ngawi ung ani naw Israel chang päng ah khan ah m’lungshe khai nei.

¹⁹ Cun kawn ah nami khaw cu khawihnah nak vai ah kä nik ciah a kyak ung, a Phung ah om nak Bawipa ah khaw ung law ba vä, kami ng’lug ah khaw amshah cu la tuba vä, cun ung phi Bawipa cu kä nami hnungtuk püi vai, Bawipa mik Khanpughi ah sonkyang k’be nak ah keimi ah akpung ah sonkyang co ne hnungtuk nak kä nami bi vai.

²⁰ M’didap vai ah khawh gui ah mawng ung Zerah ah hta Akhan naw thumkhän kä a ngaih cu nami shüm ba vai. Acun ah phäh ah Israel chang bum avan cu m’kuk nak gah ci. Akatnak ah phäh ah Akhan amät bäng sik ciah kä kyak ci nei” cik ci gui.

²¹ Reuben, Kad la Akyang täng Manasseh pakhui gui naw akhei täng pakhui kyongchang gui ah ami ng’vai gui am ami m’shan tuba gui cu,

²² “Hlüngtai säih ci tumat cu Khanpughi nei! Ani cu Bawipa nei! Hlüngtai säih ci tumat cu Khanpughi nei! Ani cu Bawipa nei! A i ah kyasei shin ah kami bi cu ani naw hmat ci nei. Nangmi naw phi nami hmat vai ah kami ng’ya hlük ci nei. Keimi naw hungtuk u ne, Bawipa ung bekhüt nak kä kami paang ciah a kyak ung, keimi kä na ghin ba sak gui vä!

²³ Keimi naw Bawipa kä ngai u ne, m’khih ne douthak nak vai ah kami mät ah sonkyang kami co ciah a kyak ung, käcung cun cu htang douthak nak la khawtsheng douthak nak ah kami mang ah a kyak ung, Bawipa amät naw na m’kyuk gui sä.

²⁴ Ka nei shin ah kami bi cu ngawi ah nami htangshon gui naw, kami htang shon gui ami na ng’htau nak gui vaikami kyih ah hmawk ah kyak ci nei. Ngami naw, “Israel Khanpughi Bawipa ung a i ang nami bi?

²⁵ Ani naw Jordan tuinu cu keimi la nangmi Reuben gui la Kad chang gui ah ng’lak ung khogii ah pyang ci. Nangmi naw Bawipa ung ai nami bi vai kä om ci, Nangmi ah htangshon gui naw keimi ah htangshon gui cu, Bawipa khawihnah nak ung ng’düm sak hning ci gui.

²⁶ Cun ah kyasei sonkiang kami cawh ah kyak ci, m’khih ne khawihnah nak vai la douthak nak vai ah kä kyak ci.

²⁷ Cun ung phi nangmi ah chang gui la keimi ah chang gui mi ma ung lawk ciah htangshon gui ah phäh ah keimi naw m’khih ne douthak nak, khawihnah nak la hmuh-chum douthak nak gui awn theingcim ciah a Phung ah ma ah Bawipa akcang ah kami khawihnah nak cu m’hnüt nak ah kyak ci. Shin cu keimi naw Bawipa ung a i kä kami bik ciah nami htangshon gui naw ami pyen law vai cu k’pan nak ah kyak ci.

²⁸ Shin cu keimi ah ngaih-tüh nei, shin ah mäih cu angtäi ah a kyak ung, keimi ah htangshon gui naw, “Teng vä! Keimi ah pupa gui naw Bawipa ah sonkyang ah mäih ah sonkiang pyang ci gui nei. Shin cu m’khih ne douthak nak vai, käcung khawihnah nak vai ah kä kyak ci, keimi ah chang gui la nangmi ah phäh ah m’hnüt nak ah kyak ci” cik ci gui.

²⁹ Keimi naw Bawipa cu akcang ah kä kami hnungtuk püi ci, m’khih ne douthak nak vai, htang douthak nak vai la khawihnah nak vai ah sonkyang co ne, a hnu ah läk nak kami ng’düm ciah kä kyak ci. Bawipa ah om nak ah Phung ah ma ah ng’düi ciah Bawipa mi Khanpughi ah sonkiang ah kawn ah keimi naw a hei sonkyang kä kami co ci nei” cik ci gui.

³⁰ Taigü Phinehas la ani awn a täng ah law tuk ciah chang bum ung ami ng’vai gui, chang gha, akhei täng pakhui kyongchang gui ung ami ng’vai gui naw, Reuben, Kad la a kyangtäng Manasseh pakhui gui ah pyen cu ng’ya u neta, yum ngak ci gui.

³¹ Eleazar ah hta Phinehas. Taigüpa naw a pyen nak gui cu, “Bawipa naw na om püi gui ciah tuhbäi keimi naw kami hmat ci nei, Nangmi naw ani kä nami hnungtuk püi ci, cun ah kia ne Bawipa naw am kyuk nak vai ungka, Israel chang gui cu nami phyawn sak gui ci nei” cik ci.

³² Cun kawn ah Phinehas la angvai gui cu Kilead khaw, Reuben la Kad chang gui nawng shüt u ne, Kanaan khaw Israel gui ah om nak ah hteit ba u neta, a mawng ma cu m’thein tuba gui ci gui.

³³ Israel chang gui cu yeikyai m’lung üp u ne, Khanpughi m’taam ci gui. Reuben la Kad chang gui ah om nak ah khaw, tuk vai, m’di vai, cicu kä pyen ba man ci gui.

³⁴ Reuben la Kad chang gui naw, “Bawipa cu Khanpughi ah kyak ciah klia sei shin ah sonkiang cu mi van ah phäh ah saksi ah kyak ci” cik ci gui. Cun ah kyasei” saksi” ah aming sui ci ui.