JOSHUA 21 - Cho Bible Common Language 2016

Levit gui ah Mang gaw gui

¹ Levit kyong chang gui ah ami ng’vaihta gui cu Taigü Eleazar, Nun ah hta Joshua la Israel pakhui avan ah kyongchang gui ah ami ng’vai gui ah hteit ci gui.

² Kanaan khaw Shilon ung ngami naw ami pyen nak gui cu, “Bawipa naw Moses ung ang thumkhän cu, Keimi kami om nak vai ah mang gaw gui nami na pek gui vai ah kyak ci. Kami vuhchah gui ah phäh ah khuli khaw gui phi nami na pek gui vai ah kyak ci” ciah kyak ci.

³ Cun ah kyasei Bawipa naw ang thumkhän ah mäih ah Israel chang gui naw ami mät ah khopäng ungka mang gaw gui la khuli khaw gui cu Levit gui am pe gui ci gui.

⁴ Levit khawchang Kohath pahta am ak htük bäih ah mang gaw gui cu pe gui ci gui. Taigü Aaron ah htangshon kyongchang gui am Judah, Simeon la Benjamin gui ah khopäng ungka mang gaw gha lei thum pe gui ci gui.

⁵ Pawih ba ciah Kohath pahta gui am Ephraim, Dan la Akheitäng Manasseh gui ah khopäng ungka mang gaw gha cu pe gui ci gui.

⁶ Kershon pahta am, Issakha, Asher, Naphtali la akheitäng Manasseh gui ah khopäng ungka, mang gaw gha lei thum cu pe gui ci gui.

⁷ Merari pahta kyongchang gui am Reuben, Kad la Zebulun gui ah khopäng ungka, mang gaw gha lei goi cu pe gui ci gui.

⁸ Bawipa naw Moses am ang thumkhän ah mäih ah Israel chang gui naw, Levit gui am m’shüih tawk sak gui ne, shin ah mang gaw gui la khuli khaw gui cu pe gui ci gui.

⁹ Shin gui cu Judah la Simeon gui ah khopäng ung mang gaw gui ah ming gui ah kyak ci, cun gui cu

¹⁰ Aaron ah ng’shon gui, Levit ah ng’shon Kohath pahta gui am ami pek gui ah kyak ci. Ngami am pek gui vai cu a htük ah ami bi ah kyak ci.

¹¹ Ngami am Arba mang gaw (Arba cu Anak ah pa) cu ami pek gui, Cun cu tuhbäi Hebron ah pyen ci gui. Cun cu Judah khawgui ung om ci, angveing ung khuli khaw gui om ci.

¹² Cun ah mäih ah mang gaw khuli gui, acun ah gawnu gui, Jephunneh ah a hta Kaleb am akaa nak vai ah ami pek pyi ah kyak ci.

¹³ Hebron ami k’be nak ah (mang gaw ng’yii nak tumat) Shin ah mang gaw gui cu Taigü Aaron ah htangshon gui am ami pek gui ah kyak ci, cun gui cu Libnah,

¹⁴ Jattir, Eshtemoa,

¹⁵ Holon, Debir,

¹⁶ Ain, Juttah, la Beth Shemesh, cun gui la ami khuli khaw gui; Judah la Simeon pakhui ungka mang gaw kaw,

¹⁷ Benjamin khopäng ungka mang gaw phli ami pek gui; cun gui cu Kibeon, Keba,

¹⁸ Anathoth, Almon la ami khuli khaw gui,

¹⁹ Avan mang gaw gha lei thum la ami khuli khaw gui cu Aaron ah htangshon taigü gui am ami pek gui ah kyak ci.

²⁰ Ahei Levit kyongchang gui ah kyak ciah Kohath pahta gui am Ephraim khopäng ungka mang gaw amshah cu pe gui ci gui.

²¹ Ngami am mang gaw phli pe gui ci gui: cun gui cu Shekhem la acun ah khuli khaw, Ephraim khawgui (ng’yiinak mang gaw tumat) Keyera,

²² Kibyaim la Beth Horon, la ami khuli khaw gui.

²³ Dan gui ah khopäng ungka mang gaw phli pe gui ci gui, cun gui cu Eltekeh, Kibbethon,

²⁴ Aijalon la Kathrimmon, la ami khuli khaw gui,

²⁵ Akheitäng Manasseh khopäng ungka mang gaw hnih pe gui ci gui; cun goi cu Taanak la Kathrimmon la acun ah khuli khaw gui.

²⁶ Kohath pahta kyongchang gui naw avan mang gaw gha la ami khuli khaw gui gah ci gui.

²⁷ Ahei Levit gui Kershon pahta naw a kiangtäng Manasseh ah khopäng ungka, mang gaw hnih gah ci gui, Bashan ungka Kolan (ng’yy inak ah mang gaw tumat) la beeshterah, la acun ung khuli khaw gui ah kyak ci.

²⁸ Issakha gui ah khopäng ungka, mang gaw phli gah ci gui, Kishion, Deberath,

²⁹ Jarmuth, la Enkannim la acun ung khuli khaw gui ah kyak ci.

³⁰ Asher gui ah khopäng ungka, mang gaw phli gah ci gui, Mishala, Abdon,

³¹ Helkath, Rebob la acun ung khuli khaw gui ah kyak ci.

³² Naphtali gui ah khopäng ungka, mang gaw thum gah ci gui, Kalile ung Kadesh la acun ung khuli khaw gui (ng’yiinak mang gaw tumat), Hammoth, Dor, Kartan, la acun ung khuli khaw gui.

³³ Kershon pahta ungka kyongchang avan naw avan ah ng’dawn ah mang gaw gha lei thum la acun ung khuli khaw gui gah ci gui.

³⁴ Pawih ba ciah Levit gui, Merari pahta naw Zebulun khopäng ungka mang gaw phli gah ci; Jokneam, Kartath,

³⁵ Dimnah, Nahalala, la acun ung khuli khaw gui ah kyak ci.

³⁶ Reuben khopäng ungka ngami naw mang gaw phli gah ci gui. Beyera, Jahaz,

³⁷ Kedemoth, Mephaath, la acun ung khuli khaw gui ah kyak ci.

³⁸ Kad pakhui ah kaa ungka mang gaw phli gah ci gui, Kilead ungka Ramoth lacun ung khuli khaw gui (ng’yiinak mang gaw tumat), Mahanaim,

³⁹ Heshbon, Jayera lacun ung khuli khaw gui ah kyak ci.

⁴⁰ Cun ah kyasei Merari pahta am avan ah ng’dawn ah mang gaw gha lei goi pak ci gui.

^41-42 Israel chang gui ah kaa nak ah khaw ungka avan ah ng’dawn ah mang gaw phlikip lei cheit lacun gui ah ng’veing ung khuli khaw gui cu Levit gui am pek gui ci gui.

Israel gui naw Khaw cu Kaa nak ci gui

⁴³ Cun ah kyasei Bawipa naw Israel gui am khaw avan pe gui ci, cun cu ani naw a pek gui vai ah ami pupa gui am aküikyang ah ashaitak ah kyak ci. Ngami naw cun ah ami kaa nak awn ah acun ung ng’lei leh ne om ci gui.

⁴⁴ Bawipa naw ami pupa gui am shai atak ah mäih ah khaw avan ung dinggei nak pe gui ci. Ami ga avan ungka tumat phi ngami kütnet püi gui ne ng’düi khai a u kä om ba ci, a i ah kyasei ci ung Bawipa naw Israel gui ami van ah khan ah näng nak a pek gui ah phäh ah kyak ci.

⁴⁵ Bawipa naw Israel gui ung abi ah shaitak päng cu paang khenggeng ci.