JOSHUA 20 - Cho Bible Common Language 2016

Ng’yii nak ah Mang gaw gui

¹ Bawipa naw Joshua a pyen nak

² Israel chang gui am nam thein gui vai cu, “Ng’yii nak ah mang gaw gui cu na ghü vai, cun ah mang gaw gui a ning m’thein vai ah Moses am ka ng’thumkhän pyi ah kyak ci.

³ Chang tumat naw acapka ah chang a ngawn ah a kyak ung acu ah hteit ne ng’tungyii khai, cun ung phu tuk vai ah ami shui law ung phyawn nak khai.

⁴ Ani cu shin ah mang gaw tumat mat ung dawng hning ci, mang gaw m’kawt valuh nak ah m’khoicha nak ung hteit ne, amawng ma cu angvai gui am am thein gui vai. Cun ung ngami naw mang gaw kyong ah luh püi u ne, a om ak vai ah hmun pek khai gui, ani acun ung om hning ci.

⁵ Ani ah khan ah phu tuk khai naw a cu ah aläk law ah a kyak ung, mang gaw ung chang gui naw cun ah chang am, ani cu kä ami ap en vai. Ngami naw ami shungvong vai, a i ah kyasei ci ung, ani naw chang cu acapka ah a ngawn ah kyak ci, m’lungshe ne a ngawn ah kä kyak ci.

⁶ Ani cu chang ah ng’lung ah kä ami m’khoicha pha ah chuih, cun yah ung om ciah taigütung kä a sih pha ah chuih, ani cu cun ah mang gaw ung om hning ci. Cun kawn ah cun ah chang cu, a dawng taak ah amät ah pigaw ah hteit ba hning ci.”

⁷ Cun ah kyasei Jordan ah akhei täng, Kalile khaw, Naphtali khawgui ung Kedesh; Ephraim khawgui ung Shechem; Judah khawgui ung Hebron gui cu ghü ci gui.

⁸ Jordan akiang täng, Jerikho ah aking khaw ng’gau ung Reuben khopäng Beyera cu ghü ci gui. Kad khopäng Kilead ung Ramoth; la Manasseh khopäng Bashan ung Kolan cu ghü ci gui.

⁹ Shin gui cu Israel chang avan la ami ng’lung ah om tuk ciah khuihei chang gui ah hmawk ah ami ghü ah ng’yiinak mang gaw gui ah kyak ci. Chang tumat naw acapka ah chang a ngawn ah a kyak ung, phu tuk khai ah chang a phyawn nak vai ah a cu ah hteit ne ng’yii hning ci. Ani cu chang ah ng’lung ah m’khoicha nak kä a om pha ah chuih a u naw kä ngawn hning ci.