JOSHUA 2 - Cho Bible Common Language 2016

Joshua naw Ng’däät Khai ah Chang gui Jerikho ah Tüi gui ci

¹ Cun kawn ah Joshua naw ng’däät khai ah chang hnih cu Akaciah phuung ungka naw Kanaan khaw, aktung pi ah Jerikho mang gaw cu adüm ah däät khai goi ah m’cäi ne tüi goi ci. Ngani cu mang gaw ah gawk ni neta, chang plet Rahab ah im ah hteit ne acu mü om tuk ci goi.

² A cu mü Israel chang gui naw khaw däät khai ah ami law cu, Jerikho ghangpughang naw ng’ya neta,

³ Rahab am ng’thu m’shäk lawk ci, “Na im ung om tuk ci gui cu khaw avan däät khai gui ah lawk ci gui ah kyak ci nei, law püi gui ä” cik ci.

^4-6 “Ani naw m’shang ne, “Chang gui ka im ah law hman ci gui nei, cun ung phi a hawi ah kaa ami law kä ka hmat ci. Ngami cu khohni a hang kyak sangung, mang gaw m’kawt kä ami khai pha ung htie ba ci gui nei. A hawi täng ah ani hteh kä ka hmuh goi ci, cun ung phi ang ghit ah nami k’täm goi ung nami pha goi khai nei” cik ci. (Rahab naw ng’däät cu m’dii cih khan ah kai püi goi neta, m’kum gong a tha nak ah kaa ah thup goi ci.)

⁷ Ghangpughang ah chang gui hteit ba u khäta, mang ah m’kawt cu khai ci gui. Ngami naw ng’däät ciah Israel chang goi cu Jordan tuinu kah nak ah lam ung khüt ne shui ci gui.

⁸ Däät ciah chang goi cu, cu mü ip tuk khai goi ah kä a ni pawng pha ung, Rahab naw m’dii cih khan ah hang kai neta,

⁹ a pyen nak goi cu, “Bawipa naw shin ah khaw ning pe gui ciah ka tmat ci nei, shin ah khaw ung om ciah chang päng naw ning ktih gui ci nei.

¹⁰ Egypt khaw nami hteh taak yah ung, nami ma ah Tuisen tuinu Bawipa naw a kawi sak cu kami ng’yak ci nei. Jordan ah a kiangtäng ung Amorit ghangpughang hnih Sihon la Ok nami ngawn goi cun phi kami ng’yak ci nei.

¹¹ Cun gui kami ng’yak vai am keimi cu kami kyik ci nei, nangmi ah om ah keimi kami thagui maih yawp ci nei. Bawipa nami Khanpughi cu khankhaw la shin ah m’dek Khanpughi ah kyak ci nei.

¹² Tuhbäi ani ung shai ka tak ci, kei naw m’gein ne ka ning m’htei goi ah mäih ah ka kyong khui chang cu nami m’htei vai nei, ka ning ngaih gep nak gui vai ah m’hnüt nak na pe shüt ni ä.

¹³ Shai ami tak vai, ka pa la ka nu, ka phäi nau gui, ka phäi nau gui ah ami kyong chang gui avan nami k’phyawn gui vai, chang am kä nami ngawn sak en gui vai” cik ci.

¹⁴ Cun ah chang naw hnumi am, “Kami pyen ah mäih ah kä kami bi ah a kyak ung Khanpughi naw kami ghin nak cu la sä! Keini naw kani bi gui cu a u am kä na m’thein ah a kyak ung keini naw shaitak ka ni ning pek ci, Bawipa naw shin ah khaw ana pek law gui ah a kyak ung, keimi naw akni ah kami ning m’htei khai.

¹⁵ Rahab cu mang gaw paang pei ah cawjh ah im ung om ci kia ne, ani naw cun ah chang goi cu im kawt ungka naw gui awn yuk chah goi ci.

¹⁶ Ani naw, “Khawgui täng ah hteit ni ä, kä cun ung ghangpughang ah chang gui naw ning hmu goi khai gui nei. Ngami kä ami ng’hlah law ba pha ah chuih hnüüp thum ung acu ah nani ng’thuh vai nei. Cun kawn ah nani hteh ba vai nei.

¹⁷ Cun ah chang goi naw ani am, “Kami ning pek vai ah na pyen ah shaitak cu keimi naw kami pang khenggeng khai nei.

¹⁸ Shin cu nang naw na bi vai nei. Keimi naw nami khaw kami tuk law ung keini na na yuk chah law nak goi ah m’kawt ung shin ah yih sen cu na yai vai nei. Na nu la na pa ni, na phäi nau gui ni, na pa ah kyong chang gui avan cu na im ung na bum gui vai nei.

¹⁹ Chang tumat cu im ah pung ah va lut neta, asih ah a kyak ung amät ah om ah kyak khai, keimi ah m’htei vai ah kä kyak khai. Cun ung phi im kyong ah nang awn a täng ah om ciah chang, nat nak a om ah a kyak ung keimi ah m’htei vai ah kyak khai nei.

²⁰ A i ah a kyak ung phi, keini naw kani bi cu, nang naw chang am na m’thein ah a kyak ung kami ning pek vai ah na pyen ah shaitak cu keimi naw kä kami pang kheng khai nei.”

²¹ Ani naw cun cu yum neta, ang ghit ah dawng sak goi ci. Ngani ani hteh ba kawn ah ani naw yih sen cu m’kawt ung yai ci.

²² Ng’däät ciah chang goi cu khomhtung täng ah dawng ne ng’thup ci goi. Ghangpughang ah chang gui naw hnüüp thum ung khaw avan ung shui goi ci gui. Cun ung phi kä hmu goi ci gui, cun ah kyasei ngami cu Jerikho ah hteit ba ci gui.

²³ Cun kawn ah ng’däät ciah chang goi cu m’htung ah kaa kyum law ba ni ne, tuinu hei kat ba ne Joshua ah om nak ah hteit ba ci goi. Ngani naw cun ah a mawng avan cu m’thein ni neta,

²⁴ ani pyen cu, “Akcang kani pyen ci, Bawipa naw shin ah khaw avan cu na pe gui pyi ci nei. Acu ah om ciah chang avan naw na kyih gui ci gui nei” cik ci goi.