JOSHUA 18 - Cho Bible Common Language 2016

Pawih ba ciah Khaw ami Ng’Pai ah Mawng

¹ Ngami naw khaw tu ne ami khäm kawn ah Israel chang bum avan cu Shilon ung bum u neta, Bawipa ah om nak ah Phung co gi gui.

² Cun yah ung ami chaw ah khaw kä gah tu phak ciah Israel chang pakhui chih om ci.

³ Cun ah kyasei Joshua naw Israel chang gui am, “Bawipa, nami pupa gui ah Khanpughi naw a ning pek gui ah khaw ung kä nami luh pha, kä nami lak pha ung, a i güt ang nami ngäng kaw?

⁴ Kei naw pakhui tumat ungka chang thum ci ka lak khai, khaw avan ung ka tüi gui khai, ngami naw ami kaa nak hlü ah khawpäng cu gu ne geei khai gui. Cun kawn ah kei ah law ba khai gui.

⁵ Khaw cu ngami ami van am chih ah k’pai gui vai. Judah cu a htüm täng amät ah khawpäng ung om khai, Joseph cu a siiptäng amät ah kgawpäng ung om khai.

⁶ Khaw ng’pai chih cu dang khai pung sawi neta kei ah law püi vä. Cun kawn ah kei naw m’shüih ning tawk sak gui vai ah Bawipa mi Khanpughi cu ka ng’shik thäh khai.

⁷ Cun ung phi Levit gui cu nangmi nami pawih ci awn a täng ah khaw ami chaw kä gah tuk khai gui. A i ah kyasei ci ung ngami ah chaw cu Bawipa ah taigü ah kia ne akhut bi vai ah kyak ci. A cu cha ah Kad la Reuben pakhui la a kiangtäng Manaseeh gui cu Jordan a kiangtäng ung ami khaw vai gah pyi ci gui ah kyak ci. Cun cu Moses, Bawipa ah changshäm naw a pek gui ah kyak ci.

⁸ Joshua naw shin ah m’shümthein nak a pek gui kawn ah chang gui cu hteit u ne, khaw bung ah pung geei ci gui. “Khaw avan ung hteit u neta pung nami geei vai, cun kawn ah kei ah nami law ba vai. Kei naw shin ah Shilon ung nangmi ah hmawk ah Bawipa shi thäh neta, m’shüih ka ning tawk sak gui khai” cik ci.

⁹ Cun ah kyasei chang gui cu khaw avan ung hteit u neta, ca awn akni ah gu ne, chih ah ami ng’pai vai ah pyen ci gui, gawnu gui phi tän ne guk ci gui, cun kawn ah ngami cu Joshua ah om nak Shilon phung ah hteit ba ci gui.

¹⁰ Joshua naw ngami ah hmawk ah Bawipa ng’shi nak ah m’shüih tawk ci, cun kawn ah pawih ba ciah Israel pakhui päng am khaw avang ci pe gui ci.

Benjamin am Pek ah Khopäng

¹¹ Benjamin pakhui kyongchang gui ah kaa nak ah khopäng cu a htük bäih ung pek gui ah kyak ci. Ngami ah khaw cu Judah la Joseph pakhui ah ng’lak ah kya ci.

¹² Ami khogii cu a siiptäng ah Jordan ung tün ne, Jerikho asiip khaw pem ung hang kai ne, akhei täng khawgui khaw hei kan ne, Bethaven khong gau ung khüt ci.

¹³ Khogii cu cun ungka naw, Luz (Bethela ah ami pyen) ah ahtum täng pem ung hteit ne, Ataroth Addar ung yu kyum ne, neim ciah Beth Haron ah ahtum täng khomhtung ung gawk ci.

¹⁴ Khogii cu vangtäng ung phi, shin ah khomhtung ah akhei täng ungka naw ahtum täng ah ng’hlat ne, Kiriah Baala (Kiriah Jearim) ung hteit ci, cun cu Judah pakhui ah khäm ah kyak ci. Shin cu akhei täng khogii ah kyak ci.

¹⁵ A htum täng ung khogii cu, Kiriah Jearim ah ang kit ung tün ne hteit ne, Nephtoah tuilawng ung gawk ci.

¹⁶ Cun ungka naw yu kyum ne, Hinnom khaw nawi yuk teng nak ah m’htung kem ung hteit ne, Rephaim khaw nawi ah asiip acawi ung gawk ci. Cun ungka ahtum täng ah hteit ne, Hinnom khaw nawi kan ne, Jebusit khawgui ah ahtum ung hteity ne Enrokela ung khüt ci.

¹⁷ Cun ungka naw a siiptäng ah ng’hlat ne, Enshemesh ung hteit ne, Adummim hteng hnu nak ciah Keliloth ung gawk ci. Khogii cu un ungka yu kyum ne, Bohan Lung (Bohan cu Reuben ah hta) ung hteit ne,

¹⁸ Jordan khaw nawi yuk hmuh nak ah a siiptäng khawgui yuk kaan ci. Cun ungka naw khaw nawi ung kyum ne,

¹⁹ Beth Hoklah khawgui ah a siiptäng kaan ne, tuisi tuinu ah a siiptäng tui ng’phyeek ung khüt ci, cun cu Jordan tuinu ung a kyuum nak ah kyak ci.

²⁰ Jordan tuinu cu a kiangtäng khogii ah kyak ci. Shin cu Benjamin pakhui kyong chang gui naw ami kaa nak vai ah ami gah ah khaw ah khogii ah kyak ci.

²¹ Benjamin pakhui kyongchang gui naw ami khäm ah mang gaw gui cu; Jerikho, Beth Hok Lah, Emek Keziz,

²² Beth Arobah, Zemaraim, Bethela,

²³ Avvim, Parah, Ophrah,

²⁴ Cheparammoni, Ophni, la Keba; mang gaw gha lei goi la angveing ung ah gawnu gui mah ah kyak ci.

²⁵ Cun kawn ah Kibeon, Ramah, Beeroth,

²⁶ Mizpah, Chephirah, Moyah,

²⁷ Rekem, Irpeela, Taralah,

²⁸ Zela, Haeleph, Jebus (käcung Jerusalem), Kibeah, la Kiriah Jearim; mang gaw gha lei phli la angveing ung ah gawnu gui mah ah kyak ci. Shin cu Benjamin pakhui kyongchang gui naw ami kaa nak vai ah ami gah ah khaw ah kyak ci.