JOSHUA 17 - Cho Bible Common Language 2016

Manasseh Akhei täng

¹ Jordan ah akhei täng khaw avang cu Joseph ah hta angvai ba Manaseh ah ang shon, amshah kyongchang gui am pek ah kyak ci. Kilead ah pa Machira cu Manasseh ah hta angvai pikbäih ah kyak ci, m’gäi ciah gakap ah kyak ci. Cun ah kyasei Jordan ah a kiangtäng Kilead la Bashan khaw cu ani am pek ah kyak ci.

² Jordan akhei täng khaw cu k’pawih ba ciah Manasseh kyongchang gui am pek gui ah kyak ci; cun gui cu, Abiezer, Helek, Asriela, Shechem, Hepher, la Shemida. Shin gui cu Joseph ah hta Manasseh ah hta ng’shon pami gui ah kyak ci. Ngami cu ami kyongchang vaihta gui ah kyak ci gui.

³ Zelophehad, Hepher ah hta, Kilead ah hta, Machira ah hta, Manasseh ah hta gui cu ami hta kä om ci gui, ami hta hnumi gui bäng om ci. Ami ming gui cu Mahlah, Noah, Hoklah, Milkah la Tiryah ah kyak ci.

⁴ Ngami cu taigü Eleayer, Nun ah hta Joshua la angvai gui ah hteit u neta, “Bawipa naw Moses am ang thumkhän cu, khaw avang cu keimi la kami mätyah gui pami gui naw kami kaa nak vai ah ana pek gui vai ah pyen ci “Cun ah kiasei Bawipa ah thumkhän ah mäih ah ngami cu ami mätyah pami gui awn a täng ah khaw cu pe gui ci gui.

⁵ Shin cu Jordan ah a kiangtäng ung Kilead la Bashan k’be nak vai ah pu gha cu Manasseh naw a gah ah kyak ci.

⁶ Cun yah ung ani hta hnumi ng’shon gui la hta pami ng’shon gui naw khawbung cu gah ci gui. Kilead khaw cu pawih ba ciah Manasseh hta shon am pek ci gui.

⁷ Manasseh ah khopäng cu Asher ungka naw Shekhem ah akiang Michethath ung khüt ci. Khawgii cu htumtäng ung hteit ne, Entappuah chang gui yukhäm ci.

⁸ Tappuah angveing ung khaw gui cu Manasseh gui ah ka ah kyak ci. Cun ung phi khawgii ung om ciah Tappuah gawnu cu Ephraim htangshon gui ah ka ah kyakci.

⁹ Khawgii cu cun ungka yu kyum vü ne, Kanah tuilawng ung khüt ci. Tuilawng ah ahtum täng ah mang gaw gui cu, Ephraim gui ah kaa ah kyak ci. Cun ung phi cun gui cu Manasseh khopäng kyong ah om ci gui. Manasseh khawii cu tuilawng ah a siiptäng pum ung han m’däm ah kya ne, Mediteranean tuinu ung yu khüt ci.

¹⁰ Ephraim ah khaw cu a htumtäng Manasseh ah khaw cu asiip täng, Mediteranean tuinu cu akhei täng khawgii ah kyak ci. Asher cu asiip-khei täng ah kya ne, Issakha cu asiip-kyang täng ah kyak ci.

¹¹ Issakha la Asher ah khopäng kyong ungka Manasseh ah kaa gui cu Beth Shan la Ibleam ah kia ne, ami pei yung ah gawnu gui mah ah kyak ci. Acun ah mäih ah Dora (Tuikem ung tumat ah kyak ci), Endor, Taanach, Mekiddo, la ami pei yung ah gawnu gui mah ah kyak ci.

¹² A i ah kyasei phi, Manasseh chang gui naw cun ah mang gaw gui ung om ci gui ah chang gui cu kä täm gui hlawt ci gui. Cun ah sei Kanaanit gui cu acun ung om tu lä ci gui.

¹³ Israel chang gui ami khüighat law kawn ung phi, Kanaanit gui avan kä täm gui hlawt ci gui, ngami naw bii bi sak gui ci gui.

Ephraim la Akhei täng Manaseh gui naw Khaw K’thäh ba mä ci gui

¹⁴ Joseph ah htangshon gui naw Joshua ah ma ah ami pyen cu, “A i ah kyasei khaw aveng hta bäng keimi ah kami kaa vai ah na na pek gui ang? Keimi cu ang htei ah chang kami da ci, a i ah kyasei ci ung Bawipa naw hriham ana pek gui ah kyak ci” cik ci gui.

¹⁵ Joshua naw m’shang gui ne, Nangmi cu chang nami da aih ah a kyak ung, Ephraim gui ah khawgui khaw cu, nangmi ah hmawk ah a läm aih ah a kyak ung, nangmi cu Perizzit la Rephaim khaw kyong bung hmu ah hteit ne, nami mät ah kaa vai ah m’dek cu k’sei vä” cik ci.

¹⁶ Ngami naw, “Khawgui khaw cu keimi ah phäh ah kä ng’büh ci nei, cun ung phi khawdou ung om ciah Kanaanit gui ung m’si-yatha om ci, Beth Shan la a pei yung ah gawnu gui ung om ci gui la Jeyreela khaw nawi ung om ci gui ami van ah kyak ci.”

¹⁷ Joshua naw Ephraim pakhui la akhei täng Manasseh gui a pyen nak gui cu, “Nangmi cu akcang ah nami da ci, ang htei ah nami huham mah ci, nangmi naw tumat ah däm ci nami chaw nam khai.

¹⁸ Khawgui khaw cu nangmi ah kaa ah kyak ci. Bung ah a kyak pang ung phi, nangmi naw chuvaw u neta, vang cawi ungka naw vang cawi ung khüt sei, nami kaa nak vai. Kanaanit gui cu m’si-yatha ta u ne, gaigawng ciah chang ah ami kyak ung phi, nami k’täm gui vai nei.”