JOSHUA 16 - Cho Bible Common Language 2016

Ephraim la Manasseh Akheitäng am Ami Pek ah Khopäng

¹ Joseph ah htangshon ui am pek ah khaw ah ahtum täng khawii cu Jerikho ah pei, Jordan tuinu ung tün ci, Jerikho tuihta gui ah a kyangtäng ung hteit ne, bung khaw ng’gau ung khüt ci. Jerikho ungka naw han kai vü ne, khawgui khaw ung hteit ne, Bethela ah gawk ci.

² Bethela ungka naw Luy ung hteit ne, Archit gui ah om nak ah Ataroth Addar kaan pah ci.

³ Cun ungka naw akhei täng ah hteit ne, Japhletits area ung gawk ne, Beth Horon ah akalam area ung khüt ci. Cung ka hteit ba ne Keyera ungka naw Mediteranean tuinu ung khüt ci.

⁴ Joseph ah htangshon Ephraim pakhui la Manasseh akheitäng pakhui gui naw, shin ah khaw cu ami kaa nak vai ah gah ci gui.

Ephraim

⁵ Shin cu Ephraim kyong chang gui ah khopäng ah kyak ci; cun ah khawgii cu Ataroth Addar ungka naw a kiangtäng ah hteit ne, akhanlam Beth Horon ung gawkci.

⁶ Cun ungka naw Mediteranean tuinu ung khüt ci. Ahan siip täng ung Michmethath om ci. Cun ah a kiangtäng ung khawgii ng’khep ne, Taanath Shilon ung gawk ne, a kiangtäng ung Janoah ah gawk ci.

⁷ Janoah ungka naw yu kyum ba ne, Ataroth la Naarah ung gawk ne, cungka Jerikho ung gawk ba ne Jordan ung khüt ci.

⁸ Akhei täng ung khawgii cu Tappuah ungka naw Kanah tuilong ung hteit ne, Mediteranean tuinu ung khüt ci. Shin cu Ephraim pakhui kyong chang gui am ami kaa nak vai ah pek gui ah khaw ah kyak ci.

⁹ Cun ung gawnu gui, gawhta gui phi da ci, cun gui cu Manasseh khawgii kyong ah kyak ci, cun ung phi cun gui cu Ephraim gui am pek gui ah kyak ci.

¹⁰ Cun ung phi ngami naw Kanaanit gui cu kä k’täm hlawt ci gui, ngami cu Keyera ung om ci gui. Cun ah kyasei Kanaanit gui cu Ephraimit gui ah ng’lung ah tuhngawi güt om tuk ci gui, cun ung phi ngami cu khleihtein ah tha gui ne bii ami bi sak gui ah kyak ci.