JOSHUA 14 - Cho Bible Common Language 2016

Jordan Akhei täng Khopäng ami ng’Pai ah Mawng

¹ Shin gui cu Kanaan khaw Jordan tuinu ah akhei täng cu Israel chang gui naw a i hawkcha ah ami ng’pai ciah mawng ah kyak ci. Taigü Eleayar, Nun ah hta Joshua la Israel pakhui kyong chang ung ami ng’vai gui naw chang gui am k’pai gui ci gui.

² Bawipa naw Moses ang thumkhän ah mäih ah pakhui kaw la pakhui ateih Jordan akhei täng ungka am m’shüih tawk ne k’pai gui ci guii.

^3-4 Moses naw Jordan a kiang täng khaw cu pakhui goi la a teih am a pek gui pyi ah kyak ci. (Joseph ah htangshon gui cu pakhui hnih ah ng’pai ci gui: Manasseh la Ephraim.) Cun ung phi Moses naw Levit gui am a i khawpäng phi kä pe tu gui ci. Acun nak vaisü ung ngami naw ami om nak vai ah mang gaw gui gah ci gui. Acun ung sei, me htome gui ah phäh ah bung akni gui om ci.

⁵ Bawipa naw Moses ang thumkhän ah mäih ah Israel chang gui naw khaw cu ng’pai ci gui.

Kaleb am Hebron Pek ci

⁶ Hnüüp ät ung Judah pakhui ungka chang amshah cu Joshua ah om nak Kilkal ah lawk ci gui. Ngami ungka Kenizzit chang Jephunneh ah hta Kaleb naw a pyen nak cu, “Kadesh Banear ung, nang la kei ah mawng, Khanpughi ah chang Moses am Bawipa naw a pyen nak cu nang naw na hmat ci.

⁷ Bawipa ah changshäm Moses naw shin khaw k’tä vai ah Kadesh Banear ungka naw ana tüih yah ung kei cu khokum phlikip ka lawk ci. Kei naw düng ciah ng’thu law püi ne ka m’thein law ba ci.

⁸ Cun ung phi kei awn a täng ah kami hteit ciah chang naw mi chang gui kyikyawk khai gui ah bik ci. Cun ung phi kei naw Bawipa ka Khanpughi cu bekhüt ne ka läk ci.

⁹ A i ah kyasei cun ah kabi ci ung Moses naw kei ung shai atak cu, kei naw ka ng’leh nak ah khomdek phung cu kei la ka hta nau gui nau gui naw akami kaa vai ah kami gah vai ah kyak ci.

¹⁰ Cun ung phi tuhbäi, teng ä, Bawipa naw Moses am ng’thu a pyen nak cu, kum phlikip lei hma law pyi ci nei. Cun cu Israel ui naw bungpuk ami kan law yah ung ah kyak ci, Bawipa naw a shaitak ah mäih ah na k’pang ne tuh ä ghin nak na pek ci. Na teng ä, kei cu kum cheitkip lei hma ka lawk ci nei.

¹¹ Moses naw ana tüih yah ungka ah mäih ah tuhngawi kei cu ka gai ci nei. Kei cu ng’tuk bi vai a kyak ung phi, a i bi vai a kyak ung phi ka gai sang ci nei.

¹² Cun kawn ah kei la ka chang naw ng’thu kani pyen law ba hnüüp ung, Bawipa naw shaitak ana pek ah kyasei, khawgui khaw cu na peä. Keimi naw kami ning m’thein ci, Anakim ciah chang dämcham pakhui gui cu, acu ah mang gaw däm gui vongpaang ne om ci gui nei. Bawipa naw kei cu na om püi khai nei. Bawipa naw a pyen ah mäih ah kei naw ka k’täm gui khai nei” cik ci.

¹³ Joshua naw Jephunneh ah hta Kaleb cu hriham pe neta, Hebron mang gaw cu a kaa nak vai ah pek ci.

¹⁴ Hebron cu tu ä güt ung, Kenizzit chang, Jephunneh ah hta, Kaleb ah htangshon naw kaa nak ci. A i ah kyasei ci ung ani naw Israel Khanpughi Bawipa cu bekhüt ne a läk ah hmawk ah kyak ci.

¹⁵ Kä cun pha ung Hebron cu Arba mang gaw ah khü ci gui. (Arba cu Anakim gui ah akdäm pikbäih ah kyak ci.) Cun ah khaw ung tuhbäi dimdeeih nak kä om ci.