JOSHUA 13 - Cho Bible Common Language 2016

Lak ba gui vai ah Khaw

¹ Joshua cu ang htei ah ghi lawk ci. Bawipa naw ani am, “Nang cu ang htei ah na hi lawk ci, cun ung phi lakba vai ah khaw akda om ba ci:

² Philistia la Keshur khopäng avan,

³ acun ah mäih ah a htumtäng ah Awim khopäng avan ah kyak ci. (Cun ah khaw cu Shiora tuihta Egypt khawgii ungka naw, a siiptäng Ekron khawgii ung khüt cicu Kanaanit gui ah khaw ah kyak ci. Philistin ghangpughang gui cu Kaya, Ashdod, Ashkelon, Kath la Ekron ung om ci gui.)

⁴ Cun kawn ah Kanaanit gui ah khaw avan, la Mearah (Sidonian gui ah päng), Amirit khawgii Aphek ung khüt ci;

⁵ Kebalit gui ah khaw, Lebanon avan ungka naw akiang täng, Baalkad ungka naw, cun cu htumtäng Hermon m’htung ungka naw Hamath hteng ung khüt ci.

⁶ Cun ung Sidonian gui ah khopäng avan k’um ci. Ngami cu khogui khaw Lebanon khomhtung gui la Misrephoth Maim ah ang lak ung om ci gui. Kei naw shin ah chang gui avan cu Israel chang gui ah ma ung ka k’täm gui khai. Kei naw na bi vai ah ka ning thumkhän ah mäih ah shin ah khaw cu Israel gui am na k’pai gui vai.

⁷ Cun kawn ah a hei pakhui kaw la Manasseh pakhui amshah am na k’pai gui vai, ngami naw ami kaa nak vai ah kyak ci.

Jordan Kyang täng Khopäng ami Ng’pai ah Mawng

⁸ Reuben, Kad pakhui la Manasseh pakhui amshah cu, Bawipa ah changshäm Moses naw pe gui sei, khaw gah pyi ci gui ah kyak ci, cun cu Jordan ah a kiangtäng ah kyak ci.

⁹ Ngami ah khopäng cu m’shawng u sei, Aroer (Arnon khaw nawi ah kit) lacun ah khaw nawi ah ang lung ung om ciah mang gaw, la Medeba ungka naw Dibon ung khüt ciah khawsang gui avan ah kyak ci.

¹⁰ Cun cu Ammon khawgii ung khüt ba ne, Amorit ghangpughang Sihon ah uknak mang gaw gui avan ah kyak ci, ani naw Heshbon ung om ne uk ci.

¹¹ Acun ung Kilead, Keshur la Maakah khaw, Hermon m’htung avan la Salekah ah khüt ciah Bashan khaw avan ah kyak ci.

¹² Rephaim ung akhnu ah kyak ciah Ok ah uknak phi k’um ci, ani naw Ashtaroth la Edrei ung om ne uk ci. Moses naw shin ah chang gui cu hnim gui ne k’täm gui ci.

¹³ Cun ung phi Israel gui naw Keshur la Maakah ung chang gui cu kä täm gui ci gui, tuh güt Israel khaw ung om ci gui.

¹⁴ Moses naw Levit pakhui am khaw kä pe tuk ci. Bawipa naw Moses a pyen nak cu, Levit gui naw ami chaw ah ami gah vai cu Bawipa Israel Khanpughi am sonkyang ung m’khih ne khawihnah nak ah kyak ci.

Reuben am Pek ah Khopäng

¹⁵ Moses naw khaw avang cu Reuben pakhui kyong khui gui naw ami kaa nak vai ah pe gui ci.

¹⁶ Ngami ah khopäng ami m’shawng cu Aroer (Arnon khaw nawi ah kit) la khaw nawi ah ang lung ung om ciah mang gaw, Msdeba khawsang gui avan ah kyak ci.

¹⁷ Acun ung Heshbon la khawsang ung om ciah mang gaw avan Dibon, Bamoth, Baala, Beth Baalmeon,

¹⁸ Jahay, Kedemoth, Mephaath,

¹⁹ Kiriathaim, Sibmah, Zereth shahar khaw nawi m’htung ung om ci.

²⁰ Bethpeor, Piskah m’htung khawdou, Beth Jeshimoth ah kyak ci.

²¹ Cun ah khawsang ung mang gaw gui avan la Amorit ghangpughang Sihon ah uknak ah khaw avan ah kyak ci, ani naw Hesbon ung om ne uk ci. Moses naw ani cu hnim ci, Midian uktu gui phi hnim gui ci; cun gui cu Evi, Rekem, Zura Hura, la Reba ah kyak ci. Ngami ami van naw ghangpughang Sihon ah hmawk ah khaw cu uk ci gui.

²² Cun gui ah ng’lung ah Israel chang gui naw, ami ngawn ah chang tumat cu ng’cängbang ciah Balaam, Beor ah hta ah kyak ci.

²³ Jordan cu Reuben pakhui ah akhei täng khawgii ah kyak ci. Shin ah mang gaw ui l; a gawnu gui cu Reuben pakhui kyong chang gui am, ami kaa vai ah pek gui ah kyak ci.

Kad am Pek ah Khopäng

²⁴ Moses naw khaw avang cu Kad pakhui kyong chang gui am ami kaa nak vai ah pe gui ci.

²⁵ Ngami ah khopäng ung Jayer la Kilead mang gaw avan, Ammon khaw ateih Aroer ung khüt ci, cun cu Rabbah ah a kyangtäng ah kyak ci.

²⁶ Ngami ah khaw ah ang shawng cu Heshbon ungka naw Ramath Miypah la Betonim, Mahaniam ungka naw Lodebar khawgii ung khüt ci.

²⁷ Jordan khaw nawi ung Beth Haram, Bethnimrah, Sukkoth, la Zaphon, pawih ba ciah Heshbon ghangpughang Sihon ah uknak khaw avan. Akhei täng ung ami khawgii cu Jordan tuinu ah kia ne, a siiptäng ah Kalile tuili ung khüt ci.

²⁸ Shin ah mang gaw gui la gawnu gui cu Kad pakhui kyong chang gui am ami kaa nak vai ah pek gui ah kyak ci.

Akyang täng Manasseh am Pek ah Khopäng

²⁹ Moses naw khaw avang cu Manaseeh pakhui kyong chang gui am ami kaa vai ah pe gui ci.

³⁰ Ngami ah khopäng ah ang shawng cu Mahaniam la Bashan khaw avan, Bashan ghangpughang Ok ah uknak khaw avan, la Bashan khaw Jair pigaw chuk ah kyak ci.

³¹ Acun ung Kilead khaw ateih, Bashan khaw, Ok ah uknak ung mang gawnu ah kyak ciah Ashtaroth la Edrei gui k’um ci. Shin gui avan cu Manaseeh ah hta Machir ah ng’shon kyong chang a teih am pek ah kyak ci.

³² Shin cu Moses naw Moab khaw dou ung ami om yah ung Jerikho la Jordan ah a kiangtäng khaw ak bou gui ah kyak ci.

³³ Cun ung phi Moses naw Levit pakhui am a i khaw phi kä pe tuk ci. Ani naw am thein gui cu ngami naw ami kaa nak vai ah ami chaw cu Bawipa Israel Khanpughi am ami douthak ah kyak ci.