JOSHUA 11 - Cho Bible Common Language 2016

Joshua naw Jabin la Ak-tai gui Hnim gui ci

¹ Israel gui ah näng nak ah mawng cu Hayor ghangpughang Jabin naw ng’ya neta, Madon ghangpughang Jobab, Shimron la Achshaph ghangpughang gui am ng’thu m’khäh gui ci.

² Cun kawn ah a siiptäng khawgui khopäng ung ghangpughang gui, Kalile tuili ah ahtum täng Jordan khaw nawi, m’htung kem gui la Dor ah pei tuikam gui.

³ Ani naw shin gui am phi thu m’khäh gui ci; Amorit gui, Hittit gui, Perizzit gui la khogui khaw ung om ciah Jebusit gui ah kyak ci. Mizpah khaw Hermon m’htung nawi ung om ci gui ah Hivit gui am phi thu m’khäh gui ci.

⁴ Ngami cu ami gakap avan ci awn lawk ci gui, gakap gui cu tuikem ah laigin chü ah da ci gui. Ngami ung sela gui la yatha gui phi akda om ci.

⁵ Ghangpughang gui ami van ng’dawn u ne, a täng ah law u ne, Merom tuihta ung phung tu u ne, Israel gui tuk gui vai ah pawng ci gui.

⁶ Bawipa naw Joshua am, “Kä na kyih gui vai, ngami ung ashin ah khin ung Israel gui ah hmawk ah kei naw ami van ka ngawn gui khai. Nangmi naw ami ng’sela gui cu tuthat u ne, ami yatha gui cu nami m’khih vai” cine m’thein ci.

⁷ Cun ah kyasei Joshua la a chang gui naw, ang ghit ah Merom tuihta ung tu gui ci gui.

⁸ Bawipa naw ngami ah klhan ah näng nak Israel gui am pe gui ci; Israel gui naw tu gui u ne, a siiptäng Misre Photh Maim la Sidon, a kiangtäng Miyypah khaw nawi ung khüt ne gawt gui ci gui. Ng’tuk nak cu ga a u phi kä a ghin ba güt ah kyak ci.

⁹ Bawipa naw a thumkhän ah mäih ah Joshua naw ngami ah khan ah bik ci. Ani naw ami sela gui cu tuthat gui ne, ami yatha gui cu m’khih ci.

¹⁰ Cun kawn ah Joshua cu ng’hlat ba ne, Hayor tu ne, cun ung ghangpughang cu ngawn ci. (Cun yah ung cun ah uknak kho avan ung Hayor cu huham mah pikbäih ciah kyak ci)

¹¹ Ngami naw cun ung chang nü cu ngawn ci gui, a u phi kä ghing ba ci, mang cu m’khih ci gui.

¹² Joshua naw shin ah mang gaw gui avan la ami ghangpughang gui cu khäm yawp ci, chang nü ngawn ci, cun cu Moses, Bawipa ah changshäm naw ang thumkhän ah kyak ci.

¹³ Cun ung phi Israel gui naw Hayor ah kawn ah m’htung lai ung ami cawh ah mang gaw gui cu kä m’khih ci gui. Hayor cu Joshua naw am khih ah kyak ci.

¹⁴ Israel gui naw mang gaw gui ungka a phu küi gui la vuhchah gui cu la u ne, kaa nak ci gui. Cun ung phi chang nü ngawn ci gui, a u kä m’ghin ci gui.

¹⁵ Bawipa naw a thumkhäm cu a chanshäm Moses am a pek, Moses naw cun gui cu Joshua am a pek ba, Joshua naw cun gui cu läk ci. Ani naw Bawipa naw Moses am a pek ah thumkhän gui phung cu bik ci.

Joshua naw Alak ah Khopäng

¹⁶ Joshua naw khaw avan khäm ci, Khogui gui la m’htung nawi gui, asiip la ahtum avan, Koshen khaw avan la acun ah m’htung täng khaw ng’gau khaw, la Jordan khaw nawi ah kyak ci.

^17-18 A htum täng Edom ah pei, Halak m’htung ungka naw hei m’shawng ah khaw, a siiptäng Baalkad ung khüt ci, Hermon m’htung ah ahtum Lebanon khaw nawi ung khüt ci. Joshua cu shin ah khopäng gui ah ghangpughang gui awn ak shou ng’tuk bik ci. Cun ung phi ani naw ami van khäm gui ne sih nak pe gui ci.

¹⁹ Israel gui awn dimdeeih nak bik ciah mang gaw cu Kibeon bäng ah kyak ci. Cun ung Hivit amshah gui om ci gui. Ahei gui avan cu ami näng gui ah kyak ci.

²⁰ Bawipa naw ngami am Israel gui tuk nak vai ah khüighat nak pe gui ci. Cun ah kyasei ngami ami van m’di gui vai ah am kyuk gui ah kyak ci. Ami van kä m’gein gui neami ngawn gui ah kyak ci. Shin cu Bawipa naw Moses am a thumkhän ah kyak ci.

²¹ Cun yah ung Joshua naw hteit ne chang dämcham pakhui gui cu m’di gui ci. Ngami cu Anakim ah ami pyen gui, khogui khaw ah kyak ciah Hebron, Debira, Anab la Judah la Israel gui ah khogui khaw avan ung om ci gui. Joshua naw chang avan la ami mang gaw gui m’htin ne m’di gui ci.

²² Israel khaw ung Anakim chang a u phi kä om ba ci; cun ung phi Kaya, Kath la Ashdod ung api om ci gui.

²³ Joshua naw khaw avan khäm ci, cun cu Bawipa naw Moses am a thumkhän ah kyak ci. Joshua naw Israel gui am ami kaa nak vai ah pe gui ne, tän ne k’bou gui ci, khui ät naw bung ät ci gah ci gui. Cun ah kia ne chang gui cu ng’tuk nak ungka ng’düm ci gui.