JOSHUA 10 - Cho Bible Common Language 2016

Amorit gui Hnim gui ci gui

¹ Adonizedek, Jerusalem ghangpughang naw ang yak cu; Joshua naw Jerikho la a ghangpughang a ciah mäih ah, Ai cu tu ne, avan m’di ne, ghangpughang cu ngawn ci. Kibeon gui cu Israel gui awn dimdeeih nak bi u ne, ami ng’lung ah om tuk ci gui” ciah kyak ci.

² Jerusalem chang gui cu aktung ah cäicat ci gui, a i ah kyasei ci ung Kibeon cu a hei mang gaw gui ah mäih ah däm ciah kyak ci, acun ung ghangpughang om ci, Ai ah däm pi ci, a chang gui cu ng’tu thei ci gui ah kyak ci.

³ Cun ah kyasei Adonizedek naw shin ah thu cu, shin ah ghangpughang gui am m’khäh gui ci; Hebron ghangpughang Hoham, Jarmuth ghangpughang Piram, Lachish ghangpughang Japhia la Eglon ghangpughang Debira.

⁴ “Law ne na kum law vä, Kibeon cu tuk vai nei, a i ah kyasei ci ung a chang gui naw Joshua la Israel gui awn dimdeeih nak bik ci gui nei” ciah kyak ci.

⁵ Shin ah Amorit ghangpughang k’hma, Jerusalem, Hebron, Jarmuth, Lachish, la Eglon gui cu ng’dawn u neta, Kibeon cu khaai u ne tuk ci gui.

⁶ Kibeon chang gui naw, Kilkal phung ung om ciah Joshua am ng’thu m’khäh law u ne, “Kä na nawng en gui ä, ang ghit ah law ne na gung law gui ä! Na hun law gui ä! Khawgui khaw ung om ciah Amorit ghangpughang gui ami van ng’dawn u ne, na tu law gui ci gui nei!” cik ci gui.

⁷ Cun ah kyasei Joshua la gakap avan, gakap akipi gui mah ah Kilkal ungka pawng ne lawk ci gui.

⁸ Bawipa naw Joshua a pyen nak cu, “Kä nami kyih gui vai nei, kei naw näng nak ka ning pe gui pyi ci nei. Ngami ungka chang tumat naw phi ng’düi ne kä ning kütnet püi gui hlawt khai nei.

⁹ Joshua la a gakap gui cu mü pum pum Kilkal ungka naw Kibeon ah hteit u ne, Amorit gui cu ang ghit ah tu gui ci gui.

¹⁰ Bawipa naw Amorit gui cu Israel gakap gui ah ma ah ang ghit ah kyikyawk sak gui ci. Israel gui naw Kibeon ung ngawn gui u ne, Beth Horon phlän ciah khomhtung ah khüt ne gawt gui u ne, ahtum täng Ayekah la Makkedah ung khüt ne k’pang ne tu gui ci gui.

¹¹ Amorit gui cu Israel gakap gui phlän ne dawng u sei, Azekah ah ami dawng nak ah lam pum ung Bawipa naw gäilung nu gui awn yuk chah shi gui ci. Akda pi cu Israel gui ah ngawn gui ah ta, gäilung ah ngawn gui ah kyak ci.

¹² Bawipa naw Israel gui am, Amorit gui näng nak a pek gui ah hnüüp ung, Joshua naw Bawipa ah ma ah thu pyen ci. Israel chang gui ah ma ah ani naw, “Nu hni aw, Kibeon gui ah khan ah ng’düi lä ä! Pa cha aw, Aijalon khaw nawi ah khan ah ng’düm lä ä” cik ci.

¹³ Chang pakhui naw a ga gui kä a näng pha ah chuih khohni cu düi lä ne, cha cu kä ng’nawn phung ci. Shin cu Jashara ca uk ung ami guk ah kyak ci. Khohni cu khomik ah ang lung ung düi lä ne, hnüüp ät lüng ne kä hteit ba ci.

¹⁴ Cau phi shin ah mäih ah kä kia man ci, ngawi ah phi shin ah mäih ah kä kia ba khai. Hnicim chang ah thu Bawipa naw a ngaih yah ung shin ah mäih ah khaw hnüüp cu kyak ci. Bawipa cu Israel gui täng ah om ne ng’tuk bik ci.

¹⁵ Cun kawn ah Joshua la a gakap gui cu Kilkal phung ah hteit ba ci gui.

Amorit Ghangpughang Hma cu Joshua naw Tu ne Näng gui ci

¹⁶ Cun ah kyasei phi Amorit ghangpughang hma cu phiawng u ne Makkedah ah lung khui ung thup ci gui.

¹⁷ Chang tumat naw hmu gui neta ami ng’thuh nak cu Joshua am m’thein ci.

¹⁸ Ani naw, “Lung khui ung valuh nak vai ung lungnu gui yuk täng neta, chang gui am ngäng sak gui ä,

¹⁹ Cun ung phi na mät cun ung kä na om vai. Ga gui ah hnu lam ah om neta, a hnu täng ung nami tuk vai. Ami mang gaw gui ah kä hteit en ba khai gui ah nami ci gui vai. Bawipa nami Khanpughi naw ngami ah khan ah näng nak ning pe gui ci nei”

²⁰ Joshua la Israel chang gui naw ngawn gui ci gui. Cun ung phi ami mang gaw paang kyong ah amshah cu phyawng ci gui, cun gui cu kä ngawn gui ci gui.

²¹ Cun kawn ah Joshua ah chang gui cu ami van phyawng u ne ami om nak Makkedah phung ah law ba ci gui. Cun ah khaw ung a u naw phi Israel chang hnungtuk püi ne thu kä pyen ci.

²² Cun kawn ah Joshua naw, “Lung khui ung luh nak ah m’kawt cu hmawng vä, ghangpughang hma cu plawk ne law püi gui vä” cik ci.

²³ Cun ah kyasei m’kawt cu hmawng ci gui, Jerusalem, Hebron, Jamuth, Lachish la Eglon ghangpughang gui cu plawk u ne,

²⁴ Joshua ah ma ah law püi ci gui. Joshua naw Israel chang avan a pei ah khü gui neta, ani awn a täng ah hteh vai lawk ciah bawi gui cu, thukbäi gui sei, ghangpughang gui ah ami hnügawn khan ah ami khaw awn ng’leh ci gui. Ngami naw cun ah bik ci gui.

²⁵ Cun kawn ah Joshua naw a bawi gui am, “Kä nami kyih vai, kä nami tha ken vai, nami khüi ghat vai, nami thamah vai, a i ah kyasei ci ung shin cu Bawipa naw nami ga avan ah khan ah a bi law vai ah kyak ci nei.

²⁶ Cun kawn ah Joshua naw ghangpughang gui cu ngawn gui ne, sing ghing hma ung tai gui sei, ami pumsa cu mühun güt acun ung om ci.

²⁷ Khohni a hang kyak yah ung Joshua naw thukbäi gui sei, ami pumsa gui cu chang ba u ne, ami ng’thuh nak te ah khui ung ghawn gui ci gui. Khui ung valuh nak cu lung ang kawm nu gui awn plu shi ci gui, cun gui cu acun ung om lä ci gui.

Joshua naw Amorit gui ah Khopäng gui Tu ne Khäm ci

²⁸ Joshua naw Makkedah la cun ung ghangpughang cu, acu hnüüp tu ne khäm ci, mang gaw ung om ci päng ngawn ci, a u kä m’ghin ci. Ani naw Jerikho ghangpughang a ciah mäih ah Makkedah ghangpughang phi cik ci.

²⁹ Cun kawn ah Joshua la a gakap gui cu Makkedah ungka naw Libnah ah hteit ne tu ne khäm ci gui.

³⁰ Bawipa naw Israel gui am, shin ah mang gaw la ghangpughang ah khan ah näng nak phi pe gui ci. Ngami naw a u kä phyawn ci gui, cun ah kyong ung om ciah chang nü ngawn ci gui. Jerikho ghanpughang ami ciah mäih ah cun ah ghangpughang phi cik ci gui.

³¹ Cun kawn ah Joshua la a gakap gui cu Libnah ungka naw Lachish ah hang kai u ne, khaai ne tu ne khäm ci gui.

³² Bawipa naw ami ng’tuk nak ah hnüüp goi hnüüp ung Israel gui am, Lachish ah khan ah näng nak pe gui ci. Ngami naw Libnah ung ami bi ah mäih ah a u phi kä phyawn ci gui, mang gaw kyong ah ka chang nü ngawn ci gui.

³³ Keyera ghangpughang Horam law ne Lachish cu kum lawk ci. Cun ung phi Joshua naw a mät la a gakap gui cu hnim gui ci, a u phi kä m’ghin ci.

³⁴ Cun tawi ne Joshua la a gakap gui cu Lachish ungka naw Eglon ah hang kai u ne, khaai ne tu ne khäm ci gui.

³⁵ Ngami naw cun cu a cu hnüüp khäm u ne, Lachish ung ami bi ah mäih ah chang nü ngawn ci gui.

³⁶ Cun kawn ah Joshua la a gakap gui cu Eglon ungka naw khawgui täng ah hang kai u ne, Hebron cu tuk ci gui,

³⁷ khäm ci gui. Ngami naw a pei ah gawnu gui ung ami ciah mäih ah ghangpughang phi ngawn u ne, mang gaw ung chang nü phi ngawn ci gui. Joshua naw Eglon ung a ciah mäih ah mang gaw avan m’di ci. Cun ah kyong ung chang a u phi kä ghing ba ci.

³⁸ Cun kawn ah Joshua la a gakap gui cu ng’hlat law ba u ne, Debira cu tuk ci gui.

³⁹ Ani naw cun cu, cun ung om ciah ghangpughang la a pei yung ah gawnu gui mah ah khäm ci. Acun ung ci nü cu ngawn ci gui. Joshua naw Hebron la Libnah la acun ung om ciah ghangpughang ah khan ah a bi ah mäih ah Debira ghangpughang ah khan ah phi bik ci.

⁴⁰ Joshua naw khaw avan khäm ci. Ani naw ghangpughang gui ah kyak ciah, khawgui täng ungka, a kiangtäng khaw pem ungka, akhei täng m’htung nawi ungka gui la ahtum täng khawng gau khaw ungka gui cu hnim gui ci. Ani naw a u kä pawih nak ci, chang nü cu ngawn ci. Shi cu Bawipa Israel Khanpughi ah thumkhän ah kyak ci.

⁴¹ Joshua naw tu ne a khäm nak cu, ahtum täng Kadesh Barnea ungka naw tuikem pei Kaza ung khüt ci. Koshen khaw avan la a siiptäng Kibeon ung khüt ci.

⁴² Joshua naw hnü ät ng’tuk lam awn ghangpughang gui avan la ami khawpäng gui cu khäm yawp ci, a i ah kyasei ci ung Bawipa Israel Khanpughi naw Israel gui ah phäh ah ng’tuk a näng ah kyak ci.

⁴³ Cun kawn ah Joshua la a gakap gui cu Kilkal phung ah law ba ci gui.