JOSHUA 1 - Cho Bible Common Language 2016

Kanaan Tune Khamvaiah Khanpughi naw Joshua Khän ci.

¹ Bawipa ah changshäm Moses asih kawn ah Bawipa naw Moses ah ng’düihpüi, Nun ah hta Joshua cu ng’thu püi ci.

² Ani naw, “Ka changshäm Moses cu si pyi ci. Tuhbäi pawng ge ä, nang la Israel chang avan naw Jordan tuinu hei kat ne, ka ning pek gui ah khaw ung lut vä.

³ Moses ka pyen nak ah mäih ah nang la ka chang gui avan naw, ma na ne nami khäm vai ah khaw avan ka ning pe gui ci nei.

⁴ Nami khawgi cu a htumtäng bungpuk ungka naw a siiptäng Lebanon m’htung gui ung khüt khai; a kyangtäng Euphratis tuinu ungka naw Hittit khawbung kaan ne akhei täng Mediteranean tuinu ung khüt khai.

⁵ Joshua, nang na ghin ah chuih a u naw kä ning m’di hlawt khai nei. Kei naw Moses ka om püi ah mäih ah ka ning om püi khai nei. Kei naw angtäi sei ka ning om püi khai, kei naw kä ka ning nawng phung khai.

⁶ Na khüighat vai, na thamah vai, nami pupa gui am ka shaitak ah khaw nami khäm law ba ung nang cu khawngmang ciah na kyak khai.

⁷ Na khüighat vai, na thamah vai, ka changshäm Moses naw a ning pek gui ah thukhän avan ng’htei khai ah na läk vai. Cun ungka api phi kä na nawng vai, cun ung na hteh nak päng ah na näng khai.

⁸ Thukhän ca uk cu nami khawihnah nak phung ah phat vai ah nami hteingcha vai. Amü ahnüüp na phat vai, acun ah kyong ung guk phung na läk ah mawng na ng’hteicha vai. Cun ung nang cu bämang ne na näng khai.

⁹ Na shüm ba vai, kei naw ka ning thumkhän cu, Na khüghat vai, na thamah vai! Kä na kyih vai, na k’tha kä a ken vai, Kei, Bawipa na Khanpughi naw na hteh nak päng ah ka ning om püi ci nei.”

Joshua naw Chang gui Thukbai gui ci

¹⁰ Joshua naw angvai hta gui cu thukbäi gui ne

¹¹ phung pigaw cu phlän ne hteh sak gui neta, chang gui a pyen nak gui cu, “Ei vai m’hnüt ne nami pawg ge vai, a i ah kyasei ci ung hnüüp thum ah kyong ung, nangmi naw Jordan tuinu kat ne, Bawipa nami Khanpughi naw a ning pek gui ah khaw cu nami khäm khai.

¹² Joshua naw Reuben la Kad pakhui la Manasseh pakhui amshah am a pyen nak gui cu,

¹³ “Nami shüm ba vai, Moses, Bawipa ah changshäm naw, a ning pyen nak gui cu, Bawipa nami Khanpughi naw shin ah khaw, Jordan ah a ktyangtäng cu nami im vai ah ning pe gui ci nei.

¹⁴ Nami chu gui, nami hta gui la nami vuhchah gui cu ashin ung om u sä. Cun ung phi gakap gui la ng’tuk’bi gui cu nami Israel paw gui ah han lu täng ah hei kaan u ne ngami bawm gui khai ah hteit u sä.

¹⁵ Bawipa nami Khanpughi naw a pek gui ah Jordan akhei täng khaw kä ami khäm pha ah chuih ah kyak khai nei. Ani naw Israel pakhui avan am, phyawn nak a pek kawn ah, nangmi cu law ba u ne, Jordan a kiangtäng nami mät ah khaw ung khäng ne nami om khai. Cun cu Moses, Bawipa ah changshäm naw a ning pek gui ah kyak ci.”

¹⁶ Ngami naw Joshua ami m’shan tuba cu, “Keimi naw na na pyen nak gui päng kami bik khai nei, na na tüih nak gui päng ah kami hteit khai nei.

¹⁷ Moses ah ng’thu kami ngaih ah mäih ah na ng’thu kami ngai khai nei, Bawipa, na Khanpughi naw, Moses a om püi ah mäih ah ning om püi sä!

¹⁸ Nang ah na huham ng’shithäh ne, na ng’thukbäi api phi kä läk ci phung cu, ngawn vai nei. Khüighat ä, thamah ä!”