JONAH 4 - Cho Bible Common Language 2016

Jonah ah M’lungshe nak, Khanpughi ah chimgein nak

¹ A cun ah mawng ung Jonah cu am lung kä ni khäta m’lungshe ci.

² Cun ah kei sei a taigü cu, “Bawipa, shin ah mawng cu im kä ka hteh taak pha ung ka pyen ciah kä kya ne ang? Shin cu nang ah bi vai ah kyak ci nei! Cun ah kyasei kei naw akni pi bi ne, Spain khaw ah ka dawng ci nei. Nang cu m’hni ci la m’gein ciah Khanpughi ah na kyak cu ka hmat ci. Ang täi sei m’lung gei ne, chimgein ne, angtäi sei na m’lung m’thawng ge ne, a u kä na m’kyuk ci nei.

³ Tuhbäi, Bawipa, kei cu na sih sak ä. Kei cu ka ghin nakdam ka sih cu bä pi khai nei” cik ci.

⁴ Bawipa naw, “Nang ung na m’lungshe nak hning vai a i om ne ang?” cine kyak nak ci.

⁵ Jonah cu mang gaw ah hni law lam ah hteit ne ngok ci. Ani naw amät ah phäh ah phung tu neta, a hniim ung ngo ne, Nineveh mang gaw a i ah a kyak law ah teng ci.

⁶ Cun kawn ah Bawipa Khanpughi naw, Jonah naw hmiim sei a om ani nak vai ah sing cu ghing sak ci. Cun ah kyasei ani cu a om nipi ci. Cun ah sing ghing ah phäh ah Jonah cu yei aih ci.

⁷ Cun ung phi a ngawi ung khawngawi Khanpughi naw, m’kyiit täk ne sing ghing cu ei sak sei, sing ghing cu sik ci.

⁸ Khaw sou law khäta Khanpughi naw ng’liing ciah hnilaw khokhi cu khi sak khäta, Jonah ah lu ah khan ah hniliing yuk so sei, a cun ah ng’ling ung geinvai ci. Cun ah kya ne ani cu si hlük ci. Ani naw, “Ka ghin nah dam ka sih cu bä khai nei” cik ci.

⁹ Cun ung phi Khanpughi naw, “Shin ah sing ghing ah phäh ah nang ung na m’lungshe nak hning vai a i ang a om?” Jonah naw, “Kei cu ka m’lungshe hning ci, ka sih nak vai ah ka m’lungshe hning ci” cik ci.

¹⁰ Bawipa naw ani am, “Shin ah sing cu mü ät ghing ne, a ngawi ung maih ba ci nei, Shin ah hmawk ah nang naw a i phi kä na bik ci, ng’ghaw ah phi kä a ng’ghaw sak ci, cun ung phi shin ah phäh ah na thüi ci!

¹¹ Cun ah mang gaw Nineveh ah phäh ah kei a i hlawk ah däm sei ka yei khai ang? Cun kawn ah a cun ung, akatnak kä om ciah a hmaw hta gui 120, 000 ah däm cicu om ci nei, a cun ah mäih ah sei me akda phi om ci gui nei!”