JONAH 3 - Cho Bible Common Language 2016

Jonah naw Bawipa cu ngai ci

¹ Bawipa naw Jonah cu pyen na ba mä ci.

² Ani naw, “Nineveh mang gaw ah na hteh vai, ka ning pek ah thuni cu chang gui ah ng’lung ah na shäu vai “ci ne kyak nak ci.

³ Cun ah kyasei Jonah cu Bawipa ah ng’thu ngai ne, Nineveh ah hteit ci. Cun ah mang gaw cu däm aih ne hnüüp thum hteh nak vai kyak ci.

⁴ Jonah cu mang gaw kyong ah lut ne hnüüp ät mü ne a hteh kawn ah, ani naw ng’thu shäu ci. A hnüüp phlikip ung Nineveh mang gaw cu dimaih khai nei!” cik ci.

⁵ Nineveh chang gui naw Khanpughi ah ng’thu cu yum ci gui. Chang päng naw ei hlawi vai ah k’bäi u ne, chang avan akbä pi ungka naw ak ghawipi ung khüt sei, ng’yu nak m’dang nak ah suishe sui ci gui.

⁶ Nineveh ghangpughang naw cun ah mawng cu ng’ya neta, Mangkyang ungka tho law ne, a suinu suut ne, m’vut ung ngok ci.

⁷ Ani naw Nineveh chang gui am ng’shäu nak thu m’shäk gui ci, “Shin cu ghangpughang la a bawi gui ah ng’thu küi nei; A u naw a i kä ah ei awk en vai; chang avan, sei avan, htome avan naw a i kä a ei awk vai ah kami k’bäi ci nei.

⁸ Chang avan, akghing avan naw ng’yu nak ah sui a sui vai nei.

⁹ Khanpughi naw am lung m’thawng ei hman khai, am lungshe nak m’düm ei hman khai, cun ung mikmi kä mi sik khai!” cik ci gui.

¹⁰ Cun ah ami bi cu Khanpughi naw hmu gui ci, ami katnak ami ng’hlah taak phi hmu gui ci. Cun ah kyasei ani naw am lung m’thawng ne, a pyen te ah mäih ah kä m’di gui hnga ci.