JONAH 2 - Cho Bible Common Language 2016

Jonah ah Taigü

¹ Jonah cu nga ah puk khui ah a om yah ung a Khanpughi ah taigü ci.

² “O Bawipa, ka geinvai yah ung ning khü ngä sei, nang naw na na m’shang ci. Thuuk aih ciah sih nak ah khaw ung ka naw na na m’htei vai ah ng’khüngä sei na na ngaih pek ci nei.

³ Nang naw a thuuk nak ung na yuk shum ci, cun ung tui naw avan ah nak koi ci, Na m’gäi nak ah tui hnawk avan ka khan ah hnawk ci nei.

⁴ Kei cu na ma ungka na na k’täm ciah ka ngai ci nei na Taigü im theing cu kä ka hmu tuba hlawt khai ah ka ngai ci nei.

⁵ Tui cu ka khan ah long ne na üüp ci nei; tui naw na k’bing ci nei, tui khu gui naw ka lu cu na kyung ci nei.

⁶ Kei cu m’htung ah angnei bäih ah ka yung kyak ci nei, angtäi sei ng’khai ciah kho ng’lei ah kyak ci nei. Cun ung phi Nang, Bawipa, ka Khanpughi, a thuuk pi ungka ghin nak ah na na law püi ba pyi ci nei.

⁷ Ka ghin nak ng’pyi ciah ka ngaih yah ung, O Bawipa, nang ah ka taigü ci, na Taigü im theing ungka naw na na ng’yak pek ci nei.

⁸ Agup akholä khawihnah ci gui naw, ami ning chang m’sui nak cu nawng ci gui nei.

⁹ Cun ung phi kei naw ng’äi ne ka ning m’tam khai nei; Khawihnah nak ka ning douthak khai nei, ka shaitak ah mäih ah ka bik khai nei. Hun nak cu Bawipa ungka lawk ci nei!”

¹⁰ Cun kawn ah Bawipa naw nganu cu täkphan sei nganu naw Jonah cu tuikem ah m’sha ba ci.