JONAH 1 - Cho Bible Common Language 2016

Jonah naw Bawipa ah Ng’thu kä ngai ci

¹ Hnüüp ät ung Bawipa naw Amittai ah hta Jonah cu pyen nak ci.

² Ani naw, “Nineveh mang gaw nu ah hteit ne hnungtuk ne ng’thu na pyen vai nei. Cun ah gaw ung chang gui a i hlawk ah ami shetkat cu kei naw ka hmat ci nei” cik ci.

³ Cun ung phi Jonah cu pawng ne Bawipa hnu na ne a lam hei ung hteit ci. Ani cu Joppa ah hteit ci, cun kawn ah Spain ah hteit khai ah htinpaw cu hmuk ci. Ani naw htinpaw ah ang khah pe ne ngami awn atäng ah hteit tuk ci. A cu ah ani cu Bawipa awn ang shawng vai ah phäh ah kyak ci.

⁴ Cun ung phi Bawipa naw tuinu ah khan ah pui khokhi yuk chah lawk ci. Pui kho ak chün ah khi sei htinpaw ng’gäi ne di law vai ci.

⁵ Htinpaw ung bik ci gui cu cäicat u neta, m’htei gui khai ah ami khanpughi phäh phäh cu khü ci gui. Cun kawn ah htinpaw a yaang vai ah ami phui gui cu ghawt ci gui. Cun sangung Jonah cu ka ah yu kyum neta htinpaw akheng ah ng’yän ne hnai ne ip ci.

⁶ Htinpaw kepting naw ani cu hmu neta, “A i ah kyasei na ih ang? Tho law ne na Khanpughi ah taigü ä! Ani naw mikmi ah hmawk ah ng’ä neta, mi hnun gui nak phyawn gui hman khai nei” cik ci.

⁷ Htinpaw ung bik ci gui cu ami mät ng’htau u ne, “A u ah cheishoh nak awn shin ah mi awt law cu hmat nak vai ah m’shüih mi tawk vai nei” cik ci gui. A cun ah m’shüih tawk u neta Jonah ah ming ung ng’süh sei hmat ci gui.

⁸ Ngami naw Jonah am, “Tuhbäi na m’thein gui ä! a i katnak bik ci sei ang mikmi ah khan ah shin ah a gawk law? Nang shin ung a i na bik ci ang? A i khaw ah ka na lawk ci ang? Nang a u ni pakhui ang?” cine ng’shik ci gui.

⁹ Jonah naw, “Kei cu Hebru chang nei, Khomdek la tuinu tüisho ciah Bawipa, Khankho Khanpughi cu ka khawihnah ci nei” cik ci.

¹⁰ Jonah naw ktäi ne Bawipa hnu na ne a dawng law ah mawng cu m’thein tu gui ci. Htinpaw bik’bi gui cu cäicat u neta, ani am, “A i kyasei na dawng ang? cine ng’shik ci gui.

¹¹ Khokhi cu khi law pi k’täi ci. Cun ah kyasei htinpaw bik’bi gui naw, “Khokhi tui hnawk ang düm vai ah nang ah khan ah a i ang kami bi kaw?” cine ng’shik ci gui.

¹² Jonah naw, “Shin ah puikhaw akhi law cu kei ah katnak ah hmawk ah kyak ciah ka hmat ci nei. Cun ah kyasei kei cu tui ung na yuk shum vä, cun ung ng’düm khai nei.”

¹³ Cun ung phi ngami naw htinpaw tuikam ah a gawk vai ah ami thagui avan awn tha nak ci gui. Cun ung phi kä ci hlawt ci gui. Khokhi tui hmawk cu däm law piktäi ci. Ngami hawi kä gawk hlawt ci gui.

¹⁴ Cun ah kya khäta ngami cu Bawipa ah m’lau ci gui, “O Bawipa, kami taigü ci nei, Shin ah chang ah hnungui na lak nak vaisü awn keimi sih nak ung kä na m’kyuk en gui ä! Nang Bawipa cu shin gui avan na bi hning ci nei. Shin cu nang ah bi ah kyak ci nei.”

¹⁵ Cun kawn ah Jonah cu chang ne tui ung yuk shum ci gui, a cun vai am khokhi ng’düm ci.

¹⁶ Cun ung bii bik ci gui naw Bawipa cu kyih aih u neta, khawihnah nak pe u ne, abii bik khai gui ah shaitak ci gui.

¹⁷ Bawipa naw atäkphan ah nganu naw Jonah cu m’yawih sei, ani cu mü thum la hnüüp thum ung nga ah puk kyong ah om ci.