JOHAN 21 - Cho Bible Common Language 2016

Ang Düihpüi Chih ah Ma ah Bawipa Jesuh Dang Ba ci

¹ Cun kawn ah Bawipa Jesuh cu Tiberias Tuili pei ah ang düihpüi gui ah ma ah ng’dang ba ci.

² Ang dang ba ah mawng cu: Simon Peter, Thomas (ang phi ah ming ci), Nathanaelah (Kalile kho Kana ah kaa), Zebedee ah hta goi la a hei ang düihpüi hnih goi ni gui cu a täng ah om ci gui.

³ Simon Peter naw, apaw gui-am, “Kei cu nga ka shui khai nei” cik ci. Apaw gui naw, “Keimi phi kami hteit tuk khai” ci u sei, ngami cu ng’hleiko awn nga shui khai gui ah hteit ci gui. Cun ung phi thai ne shui ne tumat phi kä phak ci gui.

⁴ Khohni a luhlaw yah ung Bawipa Jesuh cu tuikam ah ng’düi ci. Cun ung phi ang düihpüi gui naw kä hmat ci gui.

⁵ Bawipa Jesuh naw, “Ak hmaw gui awi, nga nami phak ci ang?” cine ng’shi gui ci. Ngami naw, “Kä kami phak ci nei” cik ci gui.

⁶ Bawipa Jesuh naw, “Nami hleiko ah k’patlam ung nami ng’vai cu hei vawi vä, nga nami phak khai nei” ci na gui ci. A pyein ah mäih ah ngami naw ng’vai hei vawi u netah, ng’vai chaang ne kä ami näng vai ah nga phak ci gui.

⁷ Cun kawn ah Bawipa Jesuh ah a hnu ah ang düihpüi naw, “Mik mi ah Bawipa nei” cine Peter-am m’thein ci. Peter cu cun ang yak vai-am akhtu suut ne akhei k’htün netah tui ung yung phäi ci.

⁸ Ang düihpüi amshah gui cu nga be ciah ng’vai so ne, hleiko awn tuikem lam ah hteit ci gui.

⁹ Ngami cu tuikem ah ami gawk law ung m’htut gui la nga ng’shai cu hmuk ci gui.

¹⁰ Bawipa Jesuh naw, “Tuhbäi nami phaa ah nga amshah law püi vä” cik ci.

¹¹ Simon Peter cu hleiko khan ah kai ba netah, nga be ciah ng’vai cu kawng ah kaih lawk ci. Phiaa la hma-kip-lei-thum ah däm ciah nga awk sei phi ng’vai cu kä teek ci.

¹² Bawipa Jesuh naw, “Law ne ei law vä” cik ci. Ang düihpüi gui ami van naw ami Bawipa ah hmat yawp ci gui kya ne, a u naw phi, “Nang a u ang” cine käng shik ci.

¹³ Bawipa Jesuh cu ami om nak ah law netah, m’htut cu ngami-am pe gui ci, nga phi pe gui ci.

¹⁴ Bawipa Jesuh sih nak ungka a thawh ba kawn ah ang düihpüi gui ah ma ah ang dang ba cu tuhbäi awn thum vei lawk ci.

Bawipa Jesuh La Peter

¹⁵ Cun ah ami ei kawn ah Bawipa Jesuh naw Simon Peter-am, “Johan ah hta Simon, a hei gui naw ami nam hni ah däm pi ciah kei na nam hni ci ang?” cine ng’shik ci. Peter naw, “Ä ya Bawipa, kei naw ka ning m’hni cu nang na hmat ci nei” cik ci. Bawipa Jesuh naw, “Ka Htome gui na m’htei vai nei bäi” ci nak ci.

¹⁶ Ak hnih vai nak ah Bawipa Jesuh naw, “Johan ah hta Simon, kei na nam hni ci ang” cine ng’shi ba mä ci. Peter naw, “Ä ya Bawipa, kei naw ka ning m’hni cu nang naw na hmat ci nei” ci ba ci. Bawipa Jesuh naw, “Ka htome gui nam htei vai nei bäi” ci ba ci.

¹⁷ Ak thum vei nak ah Bawipa Jesuh naw, “Johan ah hta Simon,” Kei na nam hni ci ang?” cine ng’shi ba mä ci. Cun ah ak thum vai nak ah ng’shi ba mä khätah, Peter cu thüi netah, “Bawipa, nang naw a päng avan na hmat ci nei, kei naw ka ning m’hni cu na hmat ci nei” cine pyein ci. Bawipa Jesuh naw, “Ka htome gui nam htei vai nei bäi,

¹⁸ Kei naw akcang ka pyein cu; nang cu nak hmaw yah ung ng’düi law ne na hteh nak hlü ah na hteit man ci, cun ung phi nang cu na ghi law ung na kut vang goi vei k’shäng ci sei chang naw ning khitpawng ne, kä na hteh nak hlü ah ning hteh püi khai” cik ci.

¹⁹ (Cun a cicu Khanpughi ah bämang nak dang khai ah Peter ah a sih vai ah mawng a pyein ah kyak ci.) Cun kawn ah Bawipa Jesuh naw, “Na läk ä” ci nak ci.

Bawipa Jesuh La Ang Düihpüi Hei Tumat

²⁰ Peter cu mang shüi shüi netah, akhnu ah Bawipa Jesuh naw, am hni ah ang düihpüi tumat cu hmuk ci. Ani cu mü-ei ami ei yah ung, “Bawipa, ga ah kut ung nang ning ap khai cu, a u ang?” cine ng’shik ciah chang ah kyak ci.

²¹ Peter naw ani cu hmu netah, “Bawipa, ani mä a i ah kyak khai ang?” cine ng’shik ci.

²² Bawipa Jesuh naw, “Kei ka law ba güt ung ani ghing ne a om vai ah kei naw kang yak hlü ah a kyak ung, nang naw a i na pyein vai kä om ci, ka hnu ah na läk ä” cine pyen nak ci.

²³ Cun ah kyasei, ‘Cun ah ang düihpüi cu kä si hlawt khai’ ciah Bawipa Jesuh ah ang düihpüi gui ami van ung ng’thu yat ci. Cun ung phi Bawipa Jesuh naw ani kä sik khai ah a pyein ah kä kyak ci, “Kei ka law ba güt ani ghing ne a om vai ah, kei naw kang yak hlü ung phi, nang naw na pyein vai kä om ci” a ciah kyak ci.

²⁴ Shin ah a mawng gui pyein ne gu ne m’dang cicu ani ah kyak ci. Ani ah pyein gui küm ciah mikmi naw mi hmat ci.

Khümnak

²⁵ Bawipa Jesuh ah bi a hei akda om ba ci. Cun gui cu avan tumat täi ah guk vai sü ung, cun gui guk nak ah ca uk gui gim nak vai cu, khomdek khan ung a i kä om khai ah ka ngai ci nei.