JOHAN 10 - Cho Bible Common Language 2016

Htoshäm awn Amtumtäng Nak

¹ Bawipa Jesuh naw, “Kei naw akcang ka pyein cu, htochaam ah kyong ah m’kawt ung kä lut ne, a hei lam ung lut cicu m’guk ei ah kiak ci.

² M’kawt ung lut cicu htoshäm ah kyak ci.

³ M’kawt ngäng naw htoshäm-am m’kawt hmawn pek ci. Hto gui naw, htoshäm ah k’aw ngai ci gui. Ani naw hto gui ami ming ung khü gui ne khahpüi gui ci.

⁴ Hto gui a chah gui van ung, amät ma ne hteit sei hto gui naw ak’aw hmat ne a hnu ah läk ci gui, ngami naw chang hei kä läk ci gui,

⁵ Chang a hei ami hmuh ung, ani ah k’aw kä hmat ci gui kya ne püi ne dawng ci gui.

⁶ Bawipa Jesuh naw, “Shin ah m’tumtäng nak am thein gui cu a i ah pyein hlü ah kä hmat ci gui.

Bawipa Jesuh Htoshäm Ni

⁷ Bawipa Jesuh naw a pyein ba mä cu,” Kei naw akcang ka pyein cu, kei cu hto gui ah luh nak m’kawt ah ka kyak ci.

⁸ Kei ah ma ung lawk ci gui avan cu, m’guk ci gui ah kyak ci, ngami ah ng’thu cu hto gui naw kä ngai ci gui.

⁹ Kei cu m’kawt ah ka kyak ci, cun ah m’kawt ung kei awn lut ci phung cu hun nak gah khai, ani cu lut ng’laang ne khu ali nak hmuk khai.

¹⁰ M’guk ei cu, m’guk khai, ngawn khai, plawhsheh khai ah lawk ci. Kei läi cu nangmi naw ghin nak nami gah vai la ghin nak akümbe vai ah ka lawk ci.

¹¹ “Kei cu Htoshäm Ni ah ka kyak ci. Htoshäm ni cu hto gui ah hmawk ah a hnun ghin nak phi pek ci.

¹² Chang ghüh cu htoshäm ah kä kyak ci, hto gui ah ami mah ah phi kä kyak ci, cun ah kya ne, hngei a law ung hto gui cu nawng shüt gui ne dawng sei, hngei naw hto gui cu lo gui ci, hto gui phi püi ne dawng yawp ci gui.

¹³ Chang ghüh cu ng’vah ah kyak ne, hto gui nawng gui ne dawng ci.

^14-15 Kei cu htoshäm ni ah ka kyak ci, Kapa naw kei cu na hmat ci, kei naw phi Kapa cu ka hmat ci, acun ah mäih ah kei naw ka hto gui ka hmat gui ci, ngami naw phi kei cu na hmat ci gui. Kei cu ka hto gui ah hmawk ah sih vai ka yum ci.

¹⁶ Shin ah chaam kyong ah kä lut law tu phak ciah a hei hto gui phi kei naw ka khäm ci, cun gui phi ka chum ba gui khai, ngami naw kang thu na ngai khai gui. Cun ah kyasei htomak tumat htoshäm tumat bäng ah kyak khai.

¹⁷ Kei cu ghin nak gah ba vai ah hmawk ah ka ghin nak ka pek ci kia sei, Kapa naw kei cu nam hni ci.

¹⁸ A u naw ghin nak kä na peit sak ci, ka mät ah ngaih ah ka peit ah kyak ci. Kei ung ghin nak ka peit nak hning la ka gah nak ba hning om ci. Cun ah ka bi vai ah Kapa naw ana täk ah kyak ci.

¹⁹ Cun ah a ng’thu ah phäh ah chang gui ami ngaih ng’pai ba mä ci.

²⁰ Chang amshah naw, “Ani cu khoshe ah kai, ak gu nei, a i vai ang thu nami ngaih ang” cik ci gui.

²¹ Chang amshah naw, “Khoshe ah kai cu, cun ah kä ng’thu hning khai, khoshe ah kai naw a i chaa ah a mik m’dauh käm dei ba sak hlawt khai” cik ci gui.

Bawipa Jesuh Ami Shedam nak

²² Cun yah cu khohting kho ah kya ne, Jerusalem ung taigü-im ap nak pawi bi yah ci gui.

²³ Bawipa Jesuh cu taigü kyong, Solomon ah k’caw ah hteit shüi shüi ci.

²⁴ Chang gui naw ani cu k’Koi u netah, “Keimi naw kami ngaih khit vai ah nang, a i güt na kyak khai ang? Messiah ah na kyak ung keimi-am ang dang ah nam thein gui ä” cik ci gui.

²⁵ Bawipa Jesuh naw, “Kei naw ka ning n’thein gui pyi ci, cun ung phi nangmi naw kä nami yum ci. Khanpughi ah nam cäi ah kabi nak naw kei ah mawng cu saksi ci.

²⁶ Nangmi cu kei ah htome ah kä nami kyak ci kya ne, kei cu kä nami na yum ci.

²⁷ Ka htome gui cu kang thu ngai ci gui, kei naw ngami ka hmat gui ci, ngami naw phi kei na läk ci gui.

²⁸ Kei naw angtäi ghin nak ka peit gui ah kya ne, ngami kä si hlawt khai gui. A u naw kei ah kut ung kaa, ngami cu kä na gut hlawt khai.

²⁹ Ngami gui kei-am na ap ciah Kapa cu, avan ah hlüngtai pi ci kia ne, a u naw phi cun ah htome gui cu Kapa ah kut ung kaa kä gut hlawt khai.

³⁰ Kapa la kei cu tumat ah kani kyak ci” cik ci.

³¹ Cun ci khätah chang gui naw ami vawih nak vai lung kaw ba mä ci gui.

³² Bawipa Jesuh naw, “Kapa naw na tüi täk sei, kei naw akni gui ka bi pyi ci, cun gui yung kaa a i ah phäh ah, kei lung awn nami na vawih hlü ang?” cik ci.

³³ Ngami naw, “Akni nabi ah phäh ah kami ning vawih hlü ah kä kyak ci, nang cu chang ah kya lang ne, Khanpughi ah ng’shei ne nang thu ah phäh ah kami ning vawi khai” cik ci gui.

³⁴ Bawipa Jesuh naw, “Nami ng’thu khän ung Khanpughi naw, Nangmi cu Khanpughi ah mäih ah nami kyak ci cine pyein ci. Cacim ung om cicu angtäi ah bä ciah mi hmat ci.

³⁵ Khanpughi naw ang thu a peit gui cu, “Khanpughi ah mäih ah kia ci gui” cik ci.

³⁶ Khanpughi naw kei cu na ghü ne khomdek khan ah na tüi lawk ci. Cun ah kyasei, ‘Kei cu Khanpughi ah na Htapa ah ka kyak ci’ ka ci ah phäh ah Khanpughi m’kat ne thu ka pyein ah, a i chaa ah nami pyein hning khai ang?

³⁷ Kapa ah ng’yak hlü ah kä ka bi ung kä nami na yum vai, kabi ung kei kä nami na yum ung phi kabilawh cu nami yum vai.

³⁸ Cun ung vah Kapa cu kei ung om sei, kei cu Kapa ung ka om cu, na mi hmuhmat lawk khai” cik ci.

³⁹ Cun ci khätah chang gui naw, Bawipa Jesuh cu phak khai gui ah tha nak ci gui, cun ung phi ani naw lek gui ne a hei ah hteit ci.

⁴⁰ Bawipa Jesuh cu Jordan tui hei gaa ah vang kat ba ne, tuihnim Johan naw, tuihnim a peit nak man ah hteit ba ne om ci.

⁴¹ Chang akda cu Bawipa Jesuh ah gawk law u netah, “Johan naw a i phi cäcat vai käm dang ci, cun ung phi shin ah chang ah mawng Johan ah pyein avan cu küm ci nei” cik ci gui.

⁴² Cun ah kyasei, chang akda naw Bawipa Jesuh cu yum lawk ci gui.